我嘅職業係專溝人地個女朋友: 12.47

李立仁嘅說話或多或少點醒咗李思柔同時亦令佢諗起一件舊事，比起相信自己喺郭子安心目中唔夠重要，佢更加願意相信父親所講郭子安係唔想大家難做所以佢選擇忘記自己，特別係佢昏迷前聽到自己剖白同啟光一齊過得好幸福，於是兩日後佢嚟咗探郭子安。
 
「思柔?」雖然失咗憶，但經過眾人嘅解釋，郭子安已經認得李思柔，從新認識知道哩個人嘅存在。
 
「子安，你幾好嗎?」當然，從對方叫自己做思柔而唔係柔柔，李思柔就知對方並唔係真係記得返自己。
 
「幾好呀，係瞓得太耐四肢仲係無咩力同埋都係記唔返以前啲嘢囉，對唔住呀…」郭子安抱歉說道。
 
「傻啦，你係為咗救我先攪成咁，應該係我同你講對唔住先啱… 慢慢嚟啦，努力train返啲 muscle就無事㗎喇。」李思柔同樣帶有歉疚地講。
 




「嗯… 係呢，我地以前真係好friend好熟㗎?」郭子安突然問。
 
「係呀，我地年紀相約由細玩到大，都真係好似…親兄妹咁㗎…」李思柔懷念地答。
 
「咁希望有一日我會記得返我地以前嘅嘢啦…」郭子安略帶黯然地道。
 
「唔好比咁大壓力自己，有啲嘢急唔嚟，一切隨緣啦。」
 
(如果你有日真係記得返，可能你又會後悔自己點解要記得返起...或者上天真係有佢自己嘅安排啦…) 李思柔邊安慰郭子安邊諗起父親嘅說話。
 




「嗯…好快我就可以出院返屋企，話唔定到時會有幫助嘅~ 依家日日瞓醫院真係好悶…」郭子安抱怨道。
 
「可以返屋企都好，舒服啲又無咁鬱悶，循序漸進啦~」李思柔笑著說。
 
「係呀，不過應該都仲要捱多幾日先出得院...」但郭子安就仍然有啲悶悶不樂。
 
「 如果...你真係覺得好悶，我送本書比你睇下呀~」猶豫咗一陣，李思柔就邊講邊喺手袋拎咗本書出嚟。
 
「十首歌一個故事? 咦，作者同你同名嘅? 唔通係你寫?」郭子安接咗本書望咗陣後就講。
 




順帶一提，好彩郭子安記得嘅語文除咗講外仲記得點聽、睇同寫，唔係佢就好大機會要重新讀過幼稚園同中小學。
 
「係呀，入面仲有我親筆簽名，將來可能好值錢㗎~」李思柔講笑道。
 
「 原來你係大作家嚟嘅~多謝! 咦，”一切是最好的安排”?」郭子安打開第一頁見真係有個簽名，同時上面寫咗一句說話於是問。
 
「大咩作家呀，好彩先終於出到一本書... 至於句嘢，無呀，純粹有感而發覺得或者世間萬事嘅安排都有上天嘅用意，所以相信哩個安排係最好的咁我地會開心啲啫~  好啦，我都喺返工前嚟探下你，走先喇，祝你早日康復!」交低咗本書，李思柔好似放低咗心入面一啲嘢咁，之後就打算離開。
 
「拜拜~」
 
(你唔記得咗哩句說話其實係你教我，就等一切都交比個天安排啦...) 李思柔離開嗰陣同時諗道。
 

李思柔走咗後，郭子安見悶就拎起本書諗住開始睇。
 




「郭子安，夠鐘去做物理治療喇~」
 
但當佢打開咗第一頁諗住睇嗰陣有姑娘就嚟帶咗佢去做物理治療，於是佢就放低返本書入櫃桶，然後到做完返到嚟又因為郭非凡一家嚟左探佢，結果慢慢佢就唔記得咗本書嘅存在，直至出院嗰日先記得將佢放返入袋拎埋佢返屋企。
 
而返到屋企後因為多好多娛樂可以做，所以之後佢都再無記得過哩本書嘅存在。