我嘅職業係專溝人地個女朋友: 12.46

「思柔，雖然子安完全唔記得你我明你會覺得好難受，不過哩個對你同對佢，或者反而係一個最好嘅結局。」見李思柔仲係滿懷心事咁嘅樣李立仁有日就同佢講。
 
「點解咁講? 佢唔記得咗我喎，我地明明由細一齊玩到大，有好多共同回憶㗎…」李思柔傷心地說。
 
「你應該已經知道咗佢其實一直都鍾意你，你覺得佢如果睇住你同啟光結婚，佢真係會開心?」李立仁問
 
「係佢自己唔爭取啫… 你知唔知點解佢之前咁多年都唔敢接受我? Uncle Kwok話佢係因為驚自己會出軌然後傷害到我… 哩個係理由嚟㗎咩? 如果佢真係鍾意我，點解唔可以控制好自己對我專一? 咁証明佢對我嘅感情都係不過如此啫…」李思柔開始有啲激動咁講。
 
「坦白講，我都係咁諗，所以我自己一直都偏向支持你同啟光多啲㗎…」李立仁表示認同。
 




「所以之前嗰啲咩澳門開心遊嘅機會係你特登比啟光?」李思柔突然醍起就問。
 
「嗯… 算係暗地裏幫佢一把啦…」李立仁帶點尷尬笑道。
 
「咁恭喜你最後你都得償所願啦…」李思柔有啲不滿被自己嘅父親咁擺佈而自己竟然一直慒然不知。
 
「本身我都以為件事總算解決咗，我個女終於可以得到幸福，點知… 子安救你嘅行為又似乎話緊比我地聽我地係錯，佢對你嘅感情並唔係真係咁少… 
 
其實如果佢真係唔緊張你，大可以照接受你然後由得自己傷害你… 所以我都唔識解釋…」李立仁搖頭苦笑道。
 




「曾經我都係咁諗，不過當見到佢醒返後淨係記得屋企人但就唔記得我，咁咪再一次証明咗我喺佢心目中唔係真係咁重要囉...」李思柔帶有少少怨氣又痛心地說。
 
「其實你有無諗過唔係你唔重要，而係佢潛意識上可能唔想記返起你? 一直以嚟，你就好似佢屋企人咁，所以如果佢記得屋企人，理應都會記得返起你。但你又有無諗過如果佢真係記得返起你，你又點面對哩個困局? 不論你點選擇，你都會傷害到佢或者啟光其中一個，甚至傷害埋你自己...
 
而依家佢選擇唔記得咗你，咁你就可以了無牽掛咁同啟光結婚，佢亦唔需要為此感到傷心難過，咁從結果睇唔係最好嘅結局? 所以我個人覺得，係佢自己選擇唔要記返起你，而唔係因為你喺佢心目中唔夠重要...」李立仁慨嘆道。
 
「...真係咁?」李思柔不確定。
 
「我當然無辦法証明，但你唔記得嗲哋以前係做咩職業咩? 我睇嘅嘢好少會錯。而且思柔你要明白，你地嘅經歷同回憶並唔會因為佢失憶就無咗，只要你仲記得佢地就繼續存在緊，你就當放過佢等佢可以開開心心咁過埋下半世啦…」李立仁安慰李思柔道。
 




「知道…」