我嘅職業係專溝人地個女朋友: 8.24

視察完畢我又直接約左佢地出黎飲野再將我嘅觀察話比佢地聽。
 
「Nicole覺得男朋友唔了解佢? 咁我可以點幫佢呀?」聽完我講後軒爺好緊張咁問。
 
「你做個了解佢嘅男朋友咪得囉。」我飲左啖酒然後好淡然咁答。
 
「下? 都話我唔係想搶走佢咯…」軒爺聽到後就面有難色。
 
「軒爺，其實只要你對佢係認真唔係玩玩下，確信自己比佢男朋友更比到幸福佢，男未婚女未嫁又無小朋友，咁其實有咩問題?  你只係比多一個選擇佢，但唔代表你一定成功。如果佢地係無問題，你唔會介入到，如果佢地係有問題，咁就算你唔介入問題遲早都係會發生。一陣比個PK乘虛而入咁咪仲衰?
 




如果你係夠愛佢，就唔好比世俗嘅眼光影響左你，應該好man咁講，為左令佢可以幸福，我就算做衰人受千夫所指又有咩所謂? 一切都係為左佢好! 你係咁鍾意佢就應該要有衣個覺悟~」我努力鼓勵佢道。
 
事實上一直做開溝人地個女朋友衣個職業嘅我，又點會覺得衣件事喺道德上會有問題呢。
 
「估唔到阿仁你講得出衣番咁有見地嘅說話，講得太好喇~ 就憑你衣段發人深省嘅說話就值得我地乾左衣杯佢!」而郭非凡就喺側邊食住花生咁講。
 
本身軒爺都有d比我說動左，但聽到郭非凡咁講完又有返d猶豫。
 
「你唔好講咁多野啦，你次次撓完人長腳最後都唔係比到更好嘅人生對方而只係惡夢囉…」我見咁就叫郭非凡唔好再講多餘嘅野。
 




「我每次一開始果陣都真係咁諗架，每次我都好希望佢就係可以令我修心養性果個人，可惜佢地唔係啫~」佢聽到我咁講仲想狡辯。
 
「廢事睬你…不過軒爺，我信你係得架，比d信心自己，下定決心去馬啦!」而我都費事再理佢繼續鼓勵軒爺。
 
「之但係佢男朋友如果都唔理解佢唔知佢需要d咩，咁我咪更加難?」軒爺仍然猶豫。
 
「所以我先要搵埋衣條友出黎... 要講了解女人心，又有邊個比佢更有心得? 雖然你可能好不齒佢嘅行為同方式，但無可否認佢對女人確實係有一手先可以攻無不克，呀唔係，係”接近” 攻無不克先岩~ 所以黎緊你可能真係要請教下佢嘅心得喇…」我手指住郭非凡講。
 
至於點解後尾加返”接近”兩個字係因為醒起佢近排都遇到個攻唔入嘅女仔，然後引來左佢一下嘅敵視。
 




「下?」軒爺一臉懷疑同不滿咁望向郭非凡。
 
「叫聲我師傅我就教你~」而啤左我一下後郭非凡好快就一臉得戚同笑得好賤咁同軒爺講。
 
「你唔好咁得戚住… 你個case分分鐘仲難攪過佢，我勸你對軒爺好d，話唔定將來有日你要搵返佢幫手…」但我好快制止左郭非凡。
 
「點解咁講?」郭非凡一臉不解同擔心咁望住我問。
 
「直覺。」而我當時心入面單純諗嘅係Eva同軒爺都係一個好人，價值觀可能比較相近。
 
「唉… 其他人講我會講得佢9up，但由你把口講出黎，我就唔可以唔信…」雖然好想打我，但郭非凡又唔敢唔信我。
 
「同埋你個case可能真係要等運到，未必急得黎…所以你都係認真咁教下軒爺先啦。」我再補充一句。
 
「咁好囉....但我人都未見過，好難知佢係邊類型喎，最好都係比我接觸下佢先，唔係估估下我驚最後害左軒爺咋…」一牽涉到自己福祉郭非凡就即刻屈服。




 
「咁軒爺你諗下辦法比非凡接觸下Nicole啦。不過郭非凡你接觸還接觸，唔好接接下食埋呀下，唔係你衣世都會受到我地嘅報復…」驚郭非凡亂黎我再比左個警示佢。
 
「放心啦，我一向盜亦有道，唔會攪自己兄弟target嘅~」佢笑得好燦爛搭住軒爺膊頭講。
 

於是日文堂裏第二個星期就多左個插班生上堂，而係軒爺介紹下非凡亦都認識左Nicole。