我嘅職業係專溝人地個女朋友: 8.23

軒爺嘅對象叫Nicole，係一個名小學老師，有高挑嘅身型，臉蛋唔算好靚但就散發出一種獨特嘅氣質。至於佢男朋友係一個做工程嘅project manager，樣貌不算太好仲有一個大肚腩。
 
軒爺同Nicole係之前一齊報讀日文班時認識。一向要求極高嘅軒爺，竟然好快被Nicole嘅氣質吸引，加上接觸認識後覺得對方係一個好有愛心同熱誠嘅人，所以越接觸得耐對佢就越有好感。
 
由於軒爺外在同內在都咁優秀，應該無咩女仔會對佢反感，所以Nicole自然亦樂於同佢做朋友。二人不時都有傾下偈交下心，但就只限於朋友，直至軒爺留意到Nicole近排成日好似有d唔開心悶悶不樂咁，傾開偈Nicole先同佢講同男朋友相處上有d問題，只係又唔願意講太多。
 
軒爺因為擔心Nicole想佢開心返又唔知點幫佢，所以先想搵我幫下手。
 
今次同以往case唔同，因為唔係要溝Nicole而只係要了解佢同男朋友之間相處有咩問題，所以我無咩機會認識Nicole再了解佢嘅心路歷程而只係搵出佢同男朋友之間嘅問題或者切入點，搵出佢男朋友滿足唔到佢嘅地方。
 




喺軒爺比嘅資訊下我搵到佢地，然後再喺煙霧下見到佢地之間有咩問題。簡單講就係Nicole覺得佢男朋友並唔了解佢，好多時都唔清楚Nicole真正需要或者想要嘅係咩，都算係好典型男女間常常會有嘅問題。
 
 
至於非凡嘅目標叫Eva，係一名醫生。比郭非凡睇得上嘅，質素當然有返咁上下，所以Eva唔單只係一個醫生，仲係一個集身材同樣貌於一身嘅醫生。我深信除左郭非凡外，平時喺醫院佢應該都有好多狗公埋身。
 
不過雖然係咁，但唔代表Eva就好高竇好港女或者要求好高，相反佢仲幾平易近人。佢個男朋友係一個中學同學，現職一名警察督察。
 
觀察下我覺得佢地兩個感情其實幾好，Eva亦應該係一個專一嘅女仔，難怪食女無數嘅郭非凡對住佢都投晒降苦無辦法。
 
不過雖然係咁，但佢地嘅關係又未至於真係完全牢不可破無任何切入點，因為我見到喺佢地骨子裏，有d價值觀係完全唔同，只係似乎佢地大家未有機會發現。