我嘅職業係專溝人地個女朋友: 8.25

之後我無再干涉佢地，而不出兩星期非凡就有左結果，其實都係最老土嘅問題-男女之別。
 
「有無聽過有個理論，話男人係天生解決問題，女人係天生制造問題?」郭非凡一開始就講。
 
「無…」軒爺直接答。
 
「簡單講，當你遇到一個問題，你會點?」郭非凡問。
 
「解決囉...」軒爺覺得非凡問左個好白痴嘅問題。
 




「你自己解決唔到呢?」郭非凡再問。
 
「搵人幫手一齊解決?」軒爺試探性答。
 
「無錯，我地男人好多時聚焦嘅都係想盡快將個問題解決。我地唔開心係因為有難題未解決，我地開心係因為個問題已經解決左。」郭非凡滿意咁點左下頭講。
 
「係呀，咁跟住呢?」軒爺唔明白郭非凡想講咩。
 
「但女人好多時其實都唔係咁諗。」郭非凡略帶神秘咁答。
 




「咁佢地係點諗?」
 
「無架，佢地可能純粹想同你呻下架咋，同你講九成時間其實都唔係想你比解決方法佢而只係單純想搵人傾下或者等你care下佢。」
 
「咁幫佢地解決問題其實都係care佢地等佢地唔駛再煩呀?」軒爺仍然不明白。
 
「所以你真係唔了解女人… 佢講你聽，係想話比你聽佢好辛苦好唔開心，而唔係想解決個問題，甚至其實佢自己本身個心入面已經有解決嘅方法添。衰d講，你唔理佢佢最後都會解決到個問題，但同樣地就算你即刻幫佢解決左個問題佢地都未必會即刻開心返。
 
所以如果你只係不斷諗方法比solution佢，佢其實並唔會開心，相反仲會覺得你根本唔關心佢唔體諒佢嘅辛苦。衣個時候你同佢講句知道佢好辛苦好煩心好為佢心痛，有用過你比十個解決方法佢。」郭非凡一副專家口吻分析。
 




「係真唔係呀…」軒爺就充滿懷疑。
 
「你當我地男人世界入面難題同開唔開心係一種因果關係，而對女人黎講難題同開唔開心係一個週期關係，咁你可能會易明d。
 
我舉多個例子你聽，假如有日你做野比上司鬧唔開心，你會點?」
 
「多數自己收埋係心，冷靜諗下上司講嘅野岩唔岩，匿埋唔開心一陣掛…」軒爺諗左諗後答。
 
「衣段時間你係咪想自己一個多d唔想人煩你?」郭非凡再問。
 
「正常係，不過有時可能都會想搵班friend出黎呻下。」
 
「咁如果你女朋友搵你呻話佢今日比上司鬧完咁你會點?」郭非凡又問。
 
「我會同佢冷靜分析下佢上司講嘅野岩唔岩，岩嘅就聽唔岩嘅就唔駛理佢，希望佢會進步。」軒爺一臉認真咁答。




 
「咁你就死得喇，就算比你同到Nicole一齊佢都唔會開心…」郭非凡一副”萬事皆休”嘅樣子。