我嘅職業係專溝人地個女朋友: 8.22

「不過講開你嘅工作，我近排有件事其實想搵你幫手…」過左陣郭非凡突然講。
 
「咩事?」
 
「我近排鍾意左個女仔，但佢有男朋友，而我努力左段時間都無辦法…」郭非凡言簡意賅咁講。
 
「咁証明你唔岩佢，唔好害人啦…」我即刻拒絕左佢嘅請求。
 
非凡知自己紀錄唔好無再出聲。
 




 
「其實… 我都有樣野想問下你可唔可以幫手架…」隔左陣又輪到軒爺吞吞吐吐咁講。
 
「咩?」我問。
 
「我近排其實都鍾意左個女仔…」軒爺有d唔好意思咁講。
 
「真係? 你終於有對象?難得喎!恭喜恭喜~咦，不過你話有野想我幫手，唔通…」聽到軒爺難得有對象我真心替佢高興，但諗諗下又好似有d唔對路。
 
「係呀，佢有男朋友…」軒爺有d尷尬咁講。




 
「車，平時成日話我，你咪又係想搶人女朋友!」難得有機會郭非凡即刻忍唔住挖苦軒爺。
 
「唔係咁架! 其實我都鍾意左佢一段時間，本身知佢有男朋友我都唔諗住做d咩，但近排我留意到佢好似成日唔開心，應該係佢同佢男朋友相處並唔好，所以想知佢地到底有咩問題再睇下幫唔幫到佢地咋…」驚我地誤會軒爺立刻解釋。
 
「救命! 又係聖人mode…」郭非凡成個陶大宇心花放上身咁用手遮住自己雙眼講。
 
「難得你有對象，我點都幫你，不過你真係唔為自己打算下?」信得過軒爺人品我真心想幫佢搵到好歸宿。
 
「唔喇，我只係想佢開心返…」軒爺堅定咁講。




 
「咁等我睇下佢地咩問題先再決定啦…」我當然亦尊重佢嘅決定。
 
「李立仁，你唔可以偏心幫佢唔幫我!」但郭非凡聽到我肯幫軒爺後又抗議。
 
「人地係為左想個女仔開心先咁做，你呢? 肯定你只係為左滿足自己嘅獸慾…」我無好氣咁望一望佢再反個白眼講。
 
「唔係架，今次佢係唔同架，我feel到我今次可能會…認真…」郭非凡講到最後自己都有d底氣不足講得好細聲。
 
「頂你，咁都講得出?你真係為求目的講乜都得架喎…」我忍唔住鬧佢。
 
「總知你幫佢就一定要幫埋我!」郭非凡繼續纏繞住我。
 
「唉… 等我睇下咩情況先啦…」唔想比佢日哦夜哦我諗我都係走唔甩…
 




結果係未有答案前，我暫時無再將我個能力用喺我嘅工作度，而係為兩兄弟嘅幸福謀求福祉，亦即係可能大家一開始最易諗到衣個能力嘅用途-撓人長腳。