我嘅職業係專溝人地個女朋友: 8.21

「夠喇! 你地講嘅都有道理，唔好再拗喇…仲有另一樣野問你地意見，佢話我衣家做緊嘅工作係唔岩，你地點睇?」聽住佢地係咁嘈攪到自己更加心煩所以忍唔住stop左佢地轉移話題。
 
「其實關於你衣家做緊嘅野我不嬲都有保留… 痛係一種自我保護機制黎，未痛過就唔識驚唔知咩叫危險。好似我地細個果陣如果我未試過比打火機燒過覺得熱同痛，未比刀界過流血知道痛，我地可能永遠唔知火同刀係咁危險識避開，最後受嘅傷可能仲大。
 
就好似無當年嘅傷，又邊有衣家嘅我? 諗返都應該要多謝之前hurt我果條女…
 
當然，我明你嘅出發點係好，只但係衣個做法係咪真係好，我唔敢講…
 
始終受傷係令人成長最快嘅途徑，唔撞板就永遠都唔會長大。」郭非凡諗左陣後答。
 




「難得我認同你講嘅說話… 其實我比較buy善潼所講，每個人都有自己要成長嘅路。你嘅介入可能令件事變好亦可能令件事變差，但無人一開始會知道，咁點解唔順其自然比佢按上天既定嘅劇情發生?
 
天嘅決定無人控制到亦無人需要負責任，但如果係你令情況更差，咁你就係施害者要負上絕大部份責任。」難得軒爺同郭非凡竟然都意見一致。
 
「突然間你地又咁齊心… 咁又唔見你地一早同我講叫我唔好?」見兩個老死原來都反對我就抱怨。
 
「講你都唔會聽啦，正如頭先所講唔撞過板就唔會識大。而且我地都知你咁做背後原因都係因為未放得低你個青梅竹馬…
 
最重要係我地無例子去証明，你自然亦唔會聽。所以善潼真係唔簡單，幫你調查好晒等你無得唔接受。」郭非凡解釋。
 




「咁我都真係無諗過原來佢為我做過咁多野…」我帶點唏噓咁講。
 
「所以佢對你咁好，你都係接受佢比次機會大家啦~」非凡即刻食住個勢講。
 
「就係因為佢對你咁好，你先更加唔應該傷害人呀…」軒爺又不甘示弱。
 
「得，唔好又鬧交，我再諗多陣啦…」喺大戰再爆發前我先一步stop左佢地。