我嘅職業係專溝人地個女朋友: 7.7

稍為諗通左我就開始左構思追求善潼大計劃。
 
不過衣家嘅善潼，又好似同以前果個唔同左。
 
如果佢真係乜都學晒佢家姐，咁佢d喜惡應該真係會唔同晒，始終以前嘅佢地都真係幾南轅北轍。
 
所以首先第一步應該都係要再次了解衣家嘅佢係點先，然後希望慢慢可以解開佢心結等佢做返自己。
 
我相信逼自己去扮另一個人係點都唔會舒服，就好似之前Connie咁…
 




 
自從出黎做野有左基本嘅經濟能力，我就自己搬左出去住，因為果度太易令我諗起善柔。所以再唔係住喺善潼佢地隔黎嘅我，亦因而同佢地少左好多聯絡，甚至我根本就係有d想避開佢地。
 
不過藉住一晚返完老豆老母屋企食飯，我就順勢搵下善潼睇下佢係唔係度。
 
 
「仁仔? 咁好返左黎呀? 想搵潼潼?」
 
開門嘅係善柔媽咪，衣幾年我都好少見佢地了，感覺兩老都蒼老左好多，始終當年善柔嘅死對佢地打擊好大… 好彩最後佢地都總算可以撐過來。
 




「Auntie你好~係呀，佢喺唔喺度?」熟悉親切嘅感覺令我同鄺太打左個靚招呼。
 
「喺呀，佢岩岩返左黎。潼潼，仁仔黎左搵你呀~ 仁仔一係你入黎坐陣飲碗湯? Auntie都好耐無見你喇，比我望下你啦…」鄺太一臉溫柔咁講。
 
「好呀…」面對鄺太誠意嘅邀請我都無拒絕，始終以前佢都親如我半個阿媽，細個果陣好多時間都係佢屋企打擾佢地，我知佢同鄺生都當左係我半個仔咁。
 
佢聽到我話好就好開心咁捉住左我隻手帶左我入屋。
 
 
一入到去已經見到善潼係房出左黎。間屋佈局無咩點變，但感覺就有d既熟悉又陌生。




 
熟悉係因為衣度都算係陪住我成長嘅地方，陌生係因為喺度已經再見唔到果個人同聽到佢把聲…
 
「仁哥哥? 做咩咁好黎探我呀?」潼潼見到我有d興奮咁問。
 
「返開屋企食飯咪順便黎睇下你囉，上次應承左你嘛~」我笑笑口答道。
 
「咁守信用? 不過返開屋企先過黎好無誠意喎…」善潼聽完有d唔滿意。
 
「咁下次再好有誠意咁約你出街玩囉，驚你男朋友介意嘛~」我只好再開多張空頭支票。
 
「你點同呢? 放心啦，我唔會比佢介意! 一場黎到一陣落樓下行陣?」善潼果然開心返然後提議。
 
「好呀。」本身就係想接近善潼所以我當然答應。