我嘅職業係專溝人地個女朋友: 7.5

敗興而歸，食完飯後我就送善潼返屋企順便同佢傾下偈。
 
「你覺得軒爺點呀?」我問道。
 
「咩點呀? 你好想我移情別戀咩?頭先擺到明係咁想制造機會比我地…」善潼不滿咁責備我。
 
「explore下多個機會其實都無壞啫…」我解釋道。
 
「但可惜我係一個專一嘅女仔~」善潼就完全唔接受。
 




「你衣家個男朋友真係好好咩?」我忍唔住問。
 
「唔關好唔好事，咁一齊得就梗係要努力架啦，唔係同緊一個一齊個心又諗住去搵第二個架嘛，家家都係咁教我架…」善潼搬出大道理。
 
「所以咪…」
 
我無講完句句子，然後大家就陷入左沉默。
 
 
「不如你試下比一次機會同佢出下去呀，如果你同佢出完去後諗法都係無改變，咁我都唔會再提衣件事…」隔左陣後我盡最後努力又講。




 
「你真係好古怪喎… 突然間搵返我，然後就好努力咁塞個男人比我… 你係咪有咩野暪住我?」到善潼忍唔住問。
 
「因為我想你可以開心同幸福咋…」我講。
 
「… 你覺得我衣家好唔幸福咩? 而且你知對方實對我有興趣?」善潼反問。
 
「一定有! 我個潼潼又叻又靚女點會無呢~」我仲當左佢係以前個小朋友咁邊讚佢邊氹道。
 
「如果我唔應承你你係咪唔會死心?」善潼眼仔一碌諗左諗後問。




 
「又唔會逼你嘅，不過會至少繼續努力一排囉…  阿軒真係好好架!」我繼續sell。
 
「咁如果我應承你，你可唔可以應承返我一樣野?」善潼似乎態度軟化左。
 
「應承你咩?」
 
「我地可唔可以返返去之前咁，你唔好再成日消失唔再搵我唔再應我?」善潼停左腳步望實我問。
 
「好…」我諗左陣後帶住歉意咁答。
 
「咁我都應承你，不過只此一次…」得到我承諾，善潼終於答應，然後又繼續行。
 
「好，只此一次，下不為例!」
 




 
於是我終於成功幫佢地制造左次單獨約會嘅機會。
 
 
「軒爺，你果日一定要施展晒你所有溝女嘅絕技，將自己所有嘅優點無限放大!
 
記住佢鍾意食XXX…鍾意玩XXX….」
 

我將善潼所有喜好都講晒比軒爺聽希望佢可以投其所好，制造一種大家好夾嘅感覺。然後我又提佢要識表示欣賞對方，展示多d自己嘅優點，大方得體，細心溫柔等等。
 
我唔敢講軒爺可以一次就將善潼收服，但至少應該都有良好進展可以留個好印象比善潼等大家有繼續發展落去嘅機會。
 
但估唔到結果竟然再一次令我大跌眼鏡。
 




軒爺同佢出完街後同我講，話我同佢講善潼果d喜好全部都係錯。
 
例如我話善潼鍾意朱古力味雪糕，結果善潼卻話自己鍾意雲尼拿味；
我同佢講善潼鍾意睇科幻英雄片善潼卻同佢講自己鍾意睇文藝愛情片。
 
 結果攪到佢一開始就失左唔少分數，而對方最後亦暗示佢唔好再approach自己，就算佢係我個friend都好。
 
我好震驚係因為我無理由唔了解善潼，除非佢衣幾年d個人喜好係真係完全變晒。
 
不過諗起果日見佢成個人外表都唔同左，加上軒爺頭先所講嘅野，我突然有左另一個諗法…