我嘅職業係專溝人地個女朋友: 7.4

「男仔?」善潼敏銳地問。
 
「係呀，完美男人一個~」我裝作輕描淡寫咁講。
 
「下? 但我有男朋友喇喎…」善潼面有d難色。
 
「係? 幾時嘅事呀? 完全無聽你講過嘅?」我扮作完全唔知道露出一副驚訝嘅樣子。
 
「都就快兩年喇…  你唔知係因為你完全唔關心我啫!」善潼又作勢發脾氣咁。
 




「對唔住呀… 咩人黎架? 好唔好仔架?」我只好再次道歉然後再乘勢問。
 
「搵日介紹比你識你再幫下我眼話返我聽啦~」諗起男朋友善潼露出一副好似好幸福咁嘅樣子。
 
「好呀… 咁今日當普通識下朋友囉，反正都約左，識多個朋友都無壞呀~」我裝作順其自然不經意咁嘅樣。
 
「咁唔係靚仔我就嬲你!」善潼講笑道。
 
「車，咁頭先又即刻扮晒忠貞非君不嫁咁~」我忍唔住窒佢。
 




「無關係架喎，靚仔可以係純粹對美好事物嘅欣賞，無話一定要鍾意或者有事發生~」善潼答辯道。
 
「不過我無擔心過嘅，喺我心目中佢真係可以話係堪稱完美嘅男人~」我為軒爺笠定朵高帽。
 
「有無咁誇張呀?」見我咁有信心善潼都開始有左好奇心。
 
「一陣你自己睇下囉~ 嗱，一講曹操曹操就到~」咁岩我見到軒爺已經係遠處行緊過黎就講。
 
「我介紹，衣個係我大學老死張肇軒，衣個係我半個妹鄺善潼~」 我為佢地兩個作出簡單介紹。
 




「Hello/你好~」
 

起初我都有寄望過憑住軒爺俊朗嘅外表加上磁性嘅聲線同談吐，或者可以打開少少善潼封閉嘅心，開一條少少嘅裂縫制造一個切入點。
 
可惜一切似乎都只係我自欺欺人，一廂情願。
 
雖然我好努力為佢地制造話題，不過成餐飯個氣氛都持續喺一種怪異嘅氣氛。軒爺受我所託都有釋出善意嘗試表現得好健談，但善潼就好似有d排斥軒爺，故意表現得冷淡唔想同佢熟絡咁，咁同我認識開活潑健談嘅佢有d唔同。
 

(睇黎真係因為有左男朋友所以個心抗拒唔舒服唔想識另一個人， 果然係無任何切入點， 連對方係一個型男都完全不為所動...)
 
我不禁想道…