我嘅職業係專溝人地個女朋友: 7.3

「我諗過喇，我可以比你搵人幫手，但如果一個月後都無進展，我希望你可以親自出手，如果真係唔得咁我就放棄計劃照直同佢講啦」大概兩個鐘後，我收到Tony嘅回覆。
 
「好…」
 

衣個Tony感覺都係個怪人，不過出得黎做生意，都無得點揀客人啦，只係得一個月，對住無切入點嘅善潼都真係有d難度。
 
不過就算唔得，buy time拖住先都好…
 
既然衣個case難度咁高自己又唔方便出馬，我只好搵我身邊最完美嘅朋友軒爺出馬。




 
高大、靚仔、運動勁、唱歌好聽、識彈琴同結他… 不論外型同內型都可以話係堪稱完美，典型係如果衣個世界係公平嘅話佢一定唔駛十歲就會英年早逝果隻。
 
而且軒爺都真係一個好人黎，用情亦好專一，完全無利用過自己得天獨厚嘅天賦去呃呃氹氹或者濫情。就我所知佢之前拍過一次拖分手後就都無再遇到過自己鍾意嘅人。
 
如果佢最後同潼潼真係可以發生感情，我會由衷替佢地開心。
 
所以論條件同吸引力點睇軒爺都遠遠拋離果個Tony 十條街，再加上有我衣個背後軍師坐陣，理論上應該無得點輸。
 
不過可惜感情其實係最無理性同道理可言，所以如果最後真係咁都唔得，咁就…到時先再諗啦…




 
衣家都只可以見步行步。
 
因為得一個月時間，我都唔想再攪咁多野浪費時間，所以決定直接約善潼出黎食個飯。
 

「立仁哥哥? 」餐廳內遠處佢見我已經有位坐低左就過黎叫我。
 
「好耐無見喇潼潼~ 」我堆起大哥哥親切嘅笑容咁講。不得不再講，衣家嘅善潼真係好似佢家姐…
 




「哼! 你都知哩! 自從家家出左事後，你就無再點搵過我… 我搵你你又成日唔理我!」一講起善潼就忍唔住對我渲泄佢積壓已久嘅不滿。
 
「係我唔岩… ，所以衣家咪黎搵你囉~ 不過估唔到你變左咁多喎…」雖然有原因，但我都承認係我唔岩。
 
「係咪靚左好多呢~」善潼轉眼就變臉笑住咁講。
 
「哈哈，係呀… 同埋你越黎越似你家姐…」我忍唔住講。
 
「咁係好定唔好呀?」善潼收起左個笑容問。
 
「無話好定唔好嘅， 始終你係你，佢係佢…  最緊要你自己開心舒服啫。」我模稜兩可咁答。
 
「嗯… 咁你今日約我係做咩? 咁耐無搵突然搵返我，多數唔係好野啦…」善潼感受到我應該係有目的搵佢。
 
「無呀，耐無見想見下你，同埋順便介紹個朋友你識啫~」而我當然口講係無目的。