我嘅職業係專溝人地個女朋友: 6.21

之後Queenie就去左海灘旁邊一間餐廳坐低左，而我就坐左喺遠處嘅另一張枱。
 
似乎Queenie係衣度嘅熟客，因為我見個waitress認得佢仲同佢傾左幾句偈。
 
不過當Queenie叫左杯野飲，飲左幾啖後我就見佢仆左喺枱面度喊。我諗衣度應該係佢同Wayne有特別回憶嘅地方，所以佢先選擇喺衣頭自殺，而臨死前想黎衣度再懷緬一下佢地嘅過去。
 
但無論點，我都要阻止佢唔比佢咁快咁衝動落衣個決定。
 
我喺遠處一直望住Queenie，而同時間我發現頭先個waitress望到Queenie喊喺後面臉上露出左少少難色，然後就上左上層一段時間先再落返黎。
 




佢拍左Queenie一下，同佢講左兩句，然後將一支類似筆嘅物體比左Queenie後就又行開左。
 
Queenie望住支筆發呆左一陣，然後見佢將支筆放左喺自己耳邊，好似聽緊支筆講野咁，好快我又見佢淚流滿臉，然後又仆左係張枱度喪喊…
 
雖然唔知咩事，但我都只可以係遠處望住佢等佢渲泄晒所有唔開心嘅情感出黎…
 
過左大概一個鐘，佢開始冷靜返落黎，然後就走左黎我度。
 
 
「衣度…係我同Wayne一齊後第一次正式約會嘅地方，然後每一年我地都會黎衣度慶祝我地嘅anniversary。Wayne講過佢好鍾意衣度，話如果第日退休可以係度起間屋，好似衣間小店咁上面住人，下面就經營間café，咁人生就完滿喇…」佢帶住懷念同哀傷嘅語氣講道。




 
「所以你臨走前想再黎衣度懷緬下?」我問。
 
「嗯…」
 
「唔怪得頭先個waitress好似識你咁啦，原來係熟客…」我恍然大悟。
 
「佢其實係衣間餐個老闆黎架…」Queenie修正我嘅錯誤。
 
「咁後生? 睇唔出喎…」我有d驚訝，因為頭先個女仔望落都唔似過30歲。




 
之後Queenie無再應我，我地就陷入左一陣寧靜。
 
「我決定聽你講試下比一年時間自己…」過左陣後佢又講。
 
「咁就好! 不過點解突然有咁嘅決定?」聽到佢咁講我終於鬆左一口氣。
 
「我比d野你聽下，可能對你都會有幫助。」
 
之後佢拎住頭先老闆比佢支筆，然後襟左筆上面個制一下，原來衣支係一支錄音筆。

而隨住Queenie襟左個制，我亦聽到阿Wayne久違了嘅聲音...