我嘅職業係專溝人地個女朋友: 6.20

---回到現實---
 
「竟然有d咁神奇嘅事? 你衣個能力應該可以令好多嘅人羨慕喎…」Queenie聽完後暫時忘記左Wayne嘅事露出一副匪夷所思嘅表情。

「對其他人黎講可能係嘅… 但每次做完一單job果陣我都會諗，當我有對象嘅時候我無衣個能力，只可以用d小學雞方法講對方壞話結果弄巧反拙，既傷害對方又傷害自己。到到衣家我有左衣個能力嘅時候又偏偏已經再無想對佢用嘅對象係度… 你話唔諷刺咩?」講左咁耐我都收晒眼淚無表情咁講。
 
「咁…將來嘅野無人知嘅，可能你第日會有目標呢? 」Queenie又嘗試安慰我。
 
「係囉，你都識講將來嘅野無人知，但你如果衣家死左就咩可能都無，仲好多人會為你傷心添…」而佢嘅說話正中我下懷用黎勸勉返佢轉頭。
 




「但我唔想有其他可能，我唔想鍾意另一個人呀… 你頭先都有講你睇唔到我地之間有任何切入點，咁你應該明白我地之間嘅感情有幾深啦…」但Queenie抗拒。
 
人都係講人就叻，但講自己就永遠做唔到。
 
「我明，我都有經歷過衣個階段… 但就算衣刻你唔想有另一個，都唔代表你要跟佢一齊去架嘛… 而且你應該知佢臨死前嘅心願，如果你真係跟佢走，佢一定會內疚一世，死不瞑目…」我再勸道。
 
「所以我應該為左等佢唔駛內疚而令自己痛苦一世?」Queenie反問。
 
「我唔知… 不過衝動往往係魔鬼，感覺亦會隨時間而改變… 我希望你至少比多d時間自己，唔好咁快落衣個決定。例如試下比一年時間自己，如果一年後你仲係咁痛不欲生咁想死，咁我都無話可說，亦唔會再阻止你…」我提出一個折衷嘅方法。
 




「咁… 你個青梅竹馬走左咁耐後，你衣家嘅感覺有咩唔同?」Queenie諗左諗後問。
 
「唔呃你，我都仲會成日諗起佢掛住佢，同埋發覺佢原來真係教左我好多野… 其實我有唔少case，都係要靠佢當日講過嘅野做借鏡最後先成功到，唔係就算我知個切入點係咩都未必知道應該用咩方法去利用佢。
 
但亦因為咁，令我覺得我要代替佢生活埋佢果一份，將佢對我嘅影響繼續影響其他人… 而且始終人生唔只淨係得一個人一種感情一樣野，總會有其他值得自己繼續活下去嘅理由。」
 
「你唔發覺分手就好似一種情感嘅轉換? 當兩個人關係一變，就可以瞬間將所有嘅開心變為唔開心。 明明所有嘅記憶入面嘅自己都係好開心好甜蜜，但諗起衣d記憶果陣嘅自己就只係得返傷心同苦澀。我真係好辛苦呀… 我諗唔到可以有咩誘因去繼續支撐我生存落去…」Queenie痛苦地說。
 
「佢同我講過因為人嘅感覺係一種比較值而唔係絕對值。以前越開心，失去果陣就會越傷心，就好似你將隻手放左入熱手再放入涷水，同你一開始就放入涷水感覺都好會好唔同…
 




但其實耐左適應左，最後你感受到嘅溫度慢慢都會變成一樣，所以時間真係會幫到你架… 而且慢慢你會發現，其實佢會一直以另一個方式存在陪伴緊你…」
 
就好似善柔不時都仍然會存在喺我記憶中適當嘅時候會出黎提醒我，某程度上我自己其實都滿有佢嘅影子。
 
「咁到底我要幾耐先可以適應，先可以唔再痛苦?」Queenie問。
 
「有人話要忘記一個人嘅時間係兩個人一齊時間嘅一半…不過我覺得都好睇你自己個人嘅諗法。」我諗左諗後答。
 
「我唔知道… 你可唔可以比d時間我自己一個? 我應承你我唔會自殺住，有個地方我想去一去先…」
 
「我可以比你自己一個靜下，但我會留喺遠處望住你…」我讓步比私人空間佢，但唔想佢離開我嘅視線範圍，始終多年前我已經錯過一次…
 
「咁隨便你啦…」好彩Queenie亦無堅持。