我嘅職業係專溝人地個女朋友: 6.19

「凡，衣排其實我一直好想同你講句對唔住，以前你失戀果陣我唔體諒你唔支持你不得只仲講過d咁過份嘅說話… 雖然唔一樣，但衣家我都終於明白失去愛人嘅果種痛…」
 
見到郭非凡，諗起當年自己曾經試過指責對方因為失個戀就攪到自己人唔似人好無用，我個心就有種內疚嘅感覺，於是藉酒精作用下鼓起勇起同對方道歉。
 
「果陣我真係好嬲你，覺得你根本完全唔明白我仲要咁話我… 所以其實當年我心入面有不斷咁詛咒你快d試下失戀，仲要有咁慘得咁慘等我可以笑返你。不過衣家見你咁，仲要係咁嘅方式失戀，我都真係笑唔出喇，心入面對你嘅果條刺亦消失得無影無踪…」郭非凡帶住點唏噓咁講。
 
「真心同你講對唔住，衣家我先知原來失去真係可以好痛…你話人有咩方法可以無痛失戀? 咁就唔會有人再為情傷心同自殺…」我摸住個酒杯問。
 
「有呀，做飛人果個唔好做比人飛果個囉~只要你對對方感覺淡左，甚至做主動提出分手果個，咁就算分手自然都唔會太痛…」郭非凡笑住咁講。
 




事實上，當日嘅郭非凡從失戀嘅傷痛振作復原返後，就再無比自己受過一次傷，因為之後都只有佢飛人而無人飛佢，佢完完全全成為左一個玩家。
 
我唔知佢係無再投入過一段感情，定抑或每段感情佢都為自己設左一個期限夠期就會走。但可以肯定嘅係果次失戀真係令佢變左好多。
 
而佢岩岩嘅說話，卻突然令我靈機一觸。
 
(係喎，只要被分手果個變心先，或者唔再咁愛對方，咁分手果陣對佢嘅傷害咪自然可以減到最低? )
 
理論上雖然好似係咁，但要做到衣件事一d都唔容易。 不過如果有我衣個突如其來嘅能力配合呢? 諗落咁難度又好似可以降低好多。
 




如果我真係咁做，或者可以幫到好多人都唔定…
 
(柔柔，你話衣個係咪上天比我嘅旨意去償還對你嘅傷害?)
 
於是我開始從事衣個職業，幫一d想分手但又唔想做衰人或者唔想對方傷心嘅男人去溝佢地女朋友等佢地變心。
 
我唔知我咁做岩唔岩，但至少我覺得我應該可以令好多人生活好過d，拯救到唔少生命嘅同時亦可以令自己過得舒坦一d…