我嘅職業係專溝人地個女朋友: 6.18

試過衣種感覺後，雖然未至於上癮，但就形成左我每次諗起善柔唔開心或者因為其他事有壓力果陣都會落樓下食支煙冷靜舒緩一下情緒。
 
而有晚當我又落左去樓下食煙嘅時候，咁岩一對同hall嘅情侶拖住手好sweet咁經過。然後當我從煙霧下望住佢地嘅時候，我腦入面突然閃入左一d信息，我感覺到佢地兩個嘅價值觀存在著好大嘅差異。
 
果陣我都無特別為意以為自己食多左煙傻左亂諗野，但個多月後適逢佔中事件發生，然後無耐我就聽到衣對情侶分左手，原因係因為男嘅覺得佔中班人好唔岩攪攪震，女嘅就覺得唔應該怪佢地因為佢地係為緊一d不公義嘅事發聲，係政府逼佢地咁做。當佢地為此鬧過幾次交後女方接受唔到男方嘅思想就決定分手。
 
聽到佢地分手嘅原因令我諗返起當晚嘅古怪感覺，不過一次半次我當然唔會諗到d咩﹐只會覺得係咁岩得咁橋並無特別為意。
 
只係隨住我幾次夜晚喺hall樓下食煙見到唔同hall入面認識嘅情侶最後都因為自己一早已經感受到嘅理由而分手，我終於對自己衣種”預判”產生左懷疑同好奇。
 




認真思考完一輪，我發覺之前每一次衣種感覺都好似係喺我食煙嘅時候經過d白霧阻隔咁望住情侶時發生。
 
有左合理猜想後，我立刻反覆搵左幾對情侶做試驗，發覺真係每次食住煙咁望住佢地嘅時候都會有d特別感受出現係腦海入面。
 
而當衣d感受經過時間引證最後發現衣d情侶最後分手或者有第三者嘅原因都同我之前嘅感覺吻合，我就確定左衣個係我喺食煙嘅時候擁有嘅一種能力
 
- 我可以睇得出一對情侶之間唔協調或者唔適合嘅地方，又或者係男方滿足唔到女方渴望自己另一半會擁有嘅特質。 

所以我睇到Winnie從Jason身上得唔到讚賞同認同嘅失落，睇到Connie同Jacky完全無共同興趣嘅問題，睇到Maggie同Louis從性方面得唔到滿足，睇到Vienna從Joe身上得唔到安全感。
 




不過就算知道自己有衣種能力，起初其實我對此都無點特別上心，因為唔覺得衣種能力對自己有咩用。
 
直至有晚，我同郭非凡出左黎佢陪我飲酒。