我嘅職業係專溝人地個女朋友: 6.17

知道善柔嘅死訊，我大受打擊，既傷心又內疚，意志極度消沉。
 
係我將一切都睇得太簡單，成日淨係諗住佢地散左就無問題，結果完全忽略左善柔嘅感受…
 
當然，我真係無諗過平時咁樂觀強大嘅善柔，會因為一次咁嘅打擊就選擇結束自己嘅生命。
 
到衣家我都唔明白，果個黎浩明真係咁好值得為左佢犠性自己條命，扔低其他所有愛錫佢嘅人?
 
我唔明，我真係唔明…
 




我嬲自己嘅同時，亦有d嬲善柔點解會為左個渣男而扔低自己。
 
原來喺佢心目中，黎生真係比自己重要咁多。
 
突然間，我有種想傷害自己嘅衝動。
 
我想做d傷害自己嘅野，等善柔內疚同心痛。
 
我想報復佢等佢後悔就咁扔低左我然後令我變成一個壞左嘅人…
 




於是我同女朋友分手，開始亂攪男女關係，過左段荒淫無道嘅生活。
 
總知佢唔鍾意我做嘅野我通通都要去做…
 
如果果陣唔係已經係yr3中後期大部份成績都塵埃落定，我甚至根本唔會畢到業。
 
 
不過做左一段時間，我就發覺衣d野根本完全減輕唔到我心入面嘅痛楚同哀傷…
 
我仍然好掛住佢




我仍然好唔開心
我個心仍然係穿左個窿
 
 
然後有晚，我食左人生第一口煙。
 
從小，學校同父母都教育我地食煙係唔岩，係壞人先做嘅事，加上陣味真係好難聞，所以一直我都真係好唔鍾意食煙嘅人。
 
不過果晚，當我又因為諗起善柔而失眠，然後我就一條友落左hall樓下諗住出去望下月光。結果見到其中一個hallmate正係度擔住支煙食得津津有味，於是我就行埋去成為左佢嘅一份子。
 
既然要變壞，要做d傷害自己，做d善柔唔會鍾意我做嘅事去傷害佢，食煙自然係其中一個好好嘅選擇。
 
一開始吸其實好唔習慣，一吸入肺就不停咁咳。不過隨住吸多幾啖身體慢慢適應左，感覺個腦開始有d反應後，我發覺我竟然有一種寧靜嘅感覺，個人好似無再咁down同咁sad，有少少抽離同超脫左現實嘅感覺。
 
突然間，我開始明點解明知對身體有害都仲有咁多人食煙，原來佢真係有種舒緩情緒嘅作用，又或者可以將佢形容為心理上嘅麻醉藥。




 
然後我又諗起善柔曾經講過，有d野自己未試過，真係唔應該去judge人，因為你唔會明白人地嘅感受。
 
我唔係話食煙係好，不過如果自己未試過食煙時果種放鬆恬靜嘅感覺，其實或者我地都唔應該不斷猛烈咁批評食煙嘅人。