我嘅職業係專溝人地個女朋友: 6.8

---回到現實---
 
聽完Queenie嘅剖白，我終於明白Wayne點解咁古怪，亦明白點解我會搵唔到佢地之間任何嘅切入點。
 
對於佢地兩個黎講，雙方都視對方為至寶，著緊對方嘅感受遠遠高於自己。當雙方都愛對方遠多於自己嘅時候，而兩個人又咁夾咁清楚大家嘅性格同優點，試問仲邊有空間同可能去比第三者介入？
 
只恨天公不造美，佢地相處嘅時間好快就要去到盡頭。
 
 
「好，我應承你...」




 
聽完衣個故仔，我無可能拒絕幫忙。只係無諗過本身諗住幫Wayne去呃Queenie，但衣家就會變成係幫Queenie呃返Wayne轉頭。
 
今次我估應該係我唯一一次會接受女仔嘅委託。
 
 
不過雖然話會幫Queenie，但要成功呃到Wayne都唔係咁易，至少如果有日Queenie突然無啦啦同Wayne講自己變左心要分手，咁Wayne應該都幾難會相信。
 
所以一方面Queenie都要慢慢對Wayne變得冷淡，又扮到成日好似唔得閒咁，另一方面我又暗地裏同Wayne講自己進度良好，同Queenie越黎越close甚至開始有d曖昧。
 




而經過一段時間嘅鋪排同蘊釀後，我終於光明正大咁見到阿Wayne，仲係以Queenie新男朋友嘅身份。
 
 
你或者會疑問點解要以新男朋友身份去見阿Wayne，而我亦不得不承認當時嘅情境在我而言亦確實係有d odd…
 
正常情侶如果因為第三者而分手，一來未必如實咁講，二來就算如實咁講都唔會帶埋個第三者去。但或者Queenie想增加說服力去令Wayne相信自己真係鍾意左另一個人，所以佢選擇左帶埋我衣個”証據”去見阿Wayne。
 
「我地已經一齊左咁耐，本身就親密到好似屋企人咁樣，所以就算我鍾意左第二個決定同佢一齊，我都唔想呃你隱暪你，同埋想比你見下佢係一個點嘅人。
 
因為將心比己如果你同我講你鍾意左另一個人要同佢一齊，我都會想見下果個新歡到底係咩人…」衣個係Queenie同Wayne講帶埋我出現嘅解釋。




 
不過聽完佢咁講，我又明多左除左加強說服力外，其實Queenie 應該係想比Wayne見下我真人係一個點嘅人，等佢可以真正咁放心自己有個好好嘅新歸宿，唔駛再擔心自己。
 
諗落其實如果我唔係Wayne自己搵返黎嘅人，我估Wayne應該真係會想見下Queenie嘅新對象，因為佢確實會想知對方係個咩人，會唔會比人呃，對方可唔可以付託終生等等。
 
佢地…真係好了解對方嘅性情同諗法。
 
不過Queenie唔會諗到嘅tricky point，係 Wayne原來一早已經認識我同埋知道背後嘅”真相”，所以就算Queenie無帶我出現，其實佢都唔會提出衣個要求。
 
而因為Queenie唔知衣個真相，所以佢要求我一齊出現。