我嘅職業係專溝人地個女朋友: 6.6

「喂，我頭先岩岩見過Wayne喎 !」過左唔知幾耐嘅一日阿Roy突然同我講。
 
「下?點解嘅? 咁岩撞到?」我緊張咁問。
 
「唔係呀，我專登去搵佢架。」點知Roy竟然咁答。
 
「下，你搵佢做咩?」我更加緊張。
 
「示愛囉~」Roy笑住咁講。
 




「喂呀! 你又話唔會嘅?」聽完Roy講我即刻好驚好著急。
 
「講笑咋，你睇下你個樣驚到~ 見你衣個月悶悶不樂成日茶飯不思咁，咪索性去左幫你問清楚佢囉~」
 
或者係關心則亂，如果係平時冷靜嘅我一定會分到佢頭先係講笑。
 
聽到佢話講笑我稍為鬆左口氣，點知聽到後面又令我再次驚慌起黎。
 
「攪錯呀! 你點可以同都唔同我講就咁做架!」我好驚又好嬲。
 




「咁你當我無講過我走先囉...」但Roy實在太了解我。
 
「喂! 唔好走呀!.」我只可以大為著急然後比佢食住。
 
「點呀? 反正你都唔想我咁做咪當我無做過囉...」Roy繼續想玩下我。
 
「咁你唔做都做左喇， 追究都無意思啦.... 咁... 佢點答你?」而我亦真係好唔爭氣服軟左。
 
「車~ 你睇下你呀，幾無性格~」Roy繼續笑我。
 




「唔好玩啦，快d講我聽啦!」而我當然唔理佢嘅挖苦繼續問。
 
「首先，果個Ceci唔係佢女朋友。」而佢亦終於玩夠講返d有用嘅野。
 
「真係?」聽到衣個資訊我掩飾唔到自己嘅開心。
 
「其次，佢之所以望我嘅眼神怪怪地，係因為佢以為我係你男朋友...」
 
「下? 佢點會咁諗架... 最衰都係你呀!搵我扮你女朋友攪到佢誤會我!咁你有無同佢解釋返清楚?」知道Wayne誤會左我，岩岩好返嘅心情又再差返，而且仲好焦急。
 
「我唔似你咁有異性無人性呀，梗係有啦! 而且我仲因為咁發現左佢一個秘密~」
 
「咩秘密?」我再追問。
 
「佢之前之所以專登避開你，係因為佢以為你已經有男朋友~」Roy不懷好意咁笑住講。




 
「下... 佢真係傻...唉... 咁佢衣家應該知我無啦…」我有d六神無主唔知點算。
 
「你個傻妹... 你仲get唔到背後嘅意思?」見我方寸大亂Roy都忍唔半笑半嘆氣咁講。
 
「背後嘅意思? 咩呀? 唔明呀...」而我仲係唔明。
 
「佢以為你有男朋友後就即刻避開你， 咁除左代表佢對你都有意思外我真係諗唔到仲有第二個解釋可以解釋到...」Roy一副”無你乎”咁嘅樣講。
 
「你...講真?」果日我嘅心情真係好似坐過山車咁又高又低。
 
「衣家誤會已經釐清左喇，你睇下之後佢對你有無唔同咪知囉~」
 
果然如阿Roy所講，之後Wayne對我完全唔同晒，無再避我之餘仲好主動咁追我。因為經過衣個小波折，我都唔想再浪費時間好驚之後又有咩意外會發生，所以好快我就接受左佢嘅追求，正式左我地嘅初戀。
 




 
一齊後我就知我一開始嘅直覺並無錯，Wayne對我一直都好好，萬般嘅寵愛亦令我感到自己好幸福。
 
每次感受到佢雖然對其他所有人都好好，但對我就特別更加多左份疼錫同著緊，衣種與別不同令我心入面都會感到異常嘅甜蜜同自滿。
 
然後不知不覺我地就一齊左十年，衣十年我地已經成為左彼此不可分割嘅一部份。能夠喺初戀就搵到一個咁好咁完美嘅另一半，我真係好感恩，我亦深信我地衣一世都可以繼續咁樣幸福快樂落去。
 
不過喺近衣幾個月，我卻開始覺得佢有d唔對路...
 
佢好似故意有少少想疏遠我，但有時我又仲感受到佢係好關心我。
直覺話我聽佢應該有野暪住我，只係當我問佢佢就話我多心咩事都無。
咁多年黎佢都無呃過我，所以我都選擇信佢，但心入面就總係有種不安嘅感覺。
 
不過衣個世界有時個天如果想比你知，你就點都會知道。