我嘅職業係專溝人地個女朋友: 6.5

「下? 點解?」無諗過佢會提出衣樣野，雖然正中我下懷但我都係有d驚訝。
 
「你對我唔係都有d意思咩?」佢無答我而係直接反問返我。
 
「… 係嘅…」我估可能因為我一直對佢都算有少少主動所以佢好敏銳咁察覺到我唔純潔嘅動機。而為左要達成目的，我當然都唔能夠否認。
 
「咁你幫我衣個忙呀，話唔定因為咁我地熟左你可能有機會呢?」然後佢向我拋出一個誘惑。
 
「我可唔可以知道原因?」我直接問。
 




「如果你一定要知，我可以講比你知，但你可唔可以幫我保守秘密?」Queenie諗左陣後答。
 
「當然可以啦。」
 
「因為我想同我男朋友分手。」Queenie望住遠處答道。
 
 
---Queenie視角---
 
我叫溫向兒，英文名Queenie。




中學果陣因為有個同學邀請，所以我開始左跟佢返教會，亦因而認識左第一個亦係暫時唯一一個令我有心動感覺嘅男仔。
 
Wayne係一個好熱情，好識care人嘅一個男仔。
佢對身邊嘅人好似永遠都好好，好有耐性，好有一種大哥哥嘅感覺。
身邊嘅組員如果有咩唔開心或者難題，個個都會主動搵佢幫手同傾訴，而佢亦永遠都好有耐心咁聽佢地講幫佢地解決問題。
 
見住衣個咁暖男感覺嘅男仔，我心入面不禁開始有個疑問。
 
佢對朋友都已經咁好咁溫柔，咁唔知佢對女朋友會係點呢? 如果佢對女朋友係再更加疼錫同照顧多d，咁衣個女仔咪一定會超幸福?
 




然後，唔知由幾時開始我會想自己可以成為果個幸福嘅女仔。
 
本身我地因為同組可以成日見同接觸，發展機會都有唔少。但唔知點解突然有日開始，我覺得佢成日好似想避開我咁，一見我就好似有d唔自在咁，例如行行下見到我會立即改變行路方向，又或者突然拎轉同佢隔黎果個人講野等等。
 
不過慢慢我又好似搵到原因，因為我發覺佢同另一個組友Ceci好似行得好埋。次次佢唔想理我果陣佢側邊都係Ceci，試過有兩次約佢佢又係話約左Ceci唔得閒。
 
估唔到第一次鍾意人未開始就已經要結束。因為咁我第一次經歷左鍾意一個唔鍾意自己嘅人嘅酸同苦，原來真係好難受同唔開心。
 
我個青梅竹馬Roy察覺到我成日好似悶悶不樂咁就問我咩事，於是我就將自己嘅感覺話左比佢聽。
 
講起Roy，我都要簡略介紹下佢。因為住得近，所以佢一直都係我兒時玩伴。不過大大下，佢就發現左自己嘅獨特之處，就係佢發現左自己原來係鍾意男人。
 
衣樣野當然唔會構成我地之間相處嘅問題，相反仲令我地可以更加亳無保留咁信任對方同對方熟絡。
 
有段時間佢因為比另一個唔鍾意嘅男仔纏撓得太犀利，另一方面亦唔想比身邊嘅朋友同同學知道自己係gay然後傳返去父母度，所以就成日搵我做煙幕去扮做佢女朋友。




 
因為咁，佢黎過幾次教會門口接我走，亦因而見過阿Wayne嘅真身。
 
 
「都係你自己以為啫，可能佢地無野呢，點解唔直接問清楚佢?」有日見我愁眉不展Roy就忍唔住問我。
 
「下? 佢衣家都避開我咯...仲問衣d咪盞自己仲瘀仲尷尬?」我搖頭拒絕。
 
「咁起碼得個知字可以死心嘛...」
 
「我唔制呀... 」潛意式我唔想真係死心去接受衣個現實，因為一旦知道真相，就會連幻想嘅空間都無埋。
 
「不過唔知係咪我feel錯，我覺得佢對上兩次見到我果陣望住我嘅眼神都有d古怪... 」Roy一副若有所思嘅樣。
 
「喂! 你唔係睇中左佢所以自己凝住佢對你有野呀嘛... 」我即刻好緊張驚佢”睇中”左阿Wayne。




 
「咪玩啦，佢唔係我鍾意果type囉~  你都知我唔鍾意靚仔格，唔係之前都唔駛搵你幫手啦… 而且知係你對象我更加掂都唔會掂啦! 」Roy笑住否認。
 
「算你啦~ 不過其實你掂唔掂都無影響啦... 」諗起Wayne同Ceci我又開始灰心。