我嘅職業係專溝人地個女朋友: 6.4

跟據Wayne所講，Queenie有個習慣就係每星期佢都有兩日會去一間朋友開嘅泰拳館度打拳keep fit。於是我問完Wayne拎 Queenie嘅上堂時間後就去左衣間拳館報名上堂，然後亦好自然係Queenie上堂嘅時間入面遇到佢成為左拳友。
 
果間拳館係Queenie個朋友自己開，除左打拳仲有PT，每堂泰拳一般都係2-4個人一齊上，所以都同學之間都好易有interaction。
 
而因為係自己生意唔似d連鎖式經營嘅鋪頭，老闆都當佢d客係自己朋友，好多時上完堂如果得閒會同佢地吹下水。為左咁佢仲專登喺個Corner位整左張大枱同埋一部啤酒機等d客上完堂又唔趕時間嘅話可以留低大家一齊叫外賣食下飯飲下酒吹下水。
 
所以d熟客好多時玩完都會留低放鬆聯誼下，而Queenie亦係其中之一。
 
當我上左兩三堂開始同佢地熟絡後我都主動咁join左佢地dinner，而因為知Queenie住邊區所以完左後我又扮都係住喺果一區然後乘機同佢一齊走。
 




我知要令Queenie變心本身就係好困難嘅一件事，所以都係諗住慢慢同佢熟絡d了解佢多d先再執生睇下有無咩機會同可能性。
 
好彩因為一齊上過幾次堂大家都唔算生外，而佢亦算係一個健談嘅人，所以同佢一齊行嘅路上都傾左唔少偈了解佢多左。
 
正如Wayne所講，Queenie把聲真係好溫柔好好聽，而佢份人亦都好nice好caring。聽佢講佢係喺藥廠做sales，我估以佢嘅性格同外表應該好易sell到比d醫生。
 
佢知我初學泰拳又專登分享左好多自己嘅心得比我。
 
「係呢，點解你會黎打泰拳嘅?」佢問我。
 




「無呀，以前我都有踢開波，但衣家越黎越難約喇，一係就比人book晒d場，一係就唔夠人，所以咪想搵其他運動玩下囉~ 咁你呢?」我答。
 
「我本身其實無特別興趣架，但見朋友自己創業咪諗住支持下囉，點知玩玩下又覺得幾好玩，之後就成為左習慣順便當relax下~」Queenie好輕鬆咁答。
 
「咁慣性做運動係幾好嘅，可以keep fit個人又可以精神d~」
 
「係呀，以前出黎做野一段時間後我成日都覺得個人好累好眼訓，但打左泰拳後發現個人真係會精神左無咁易成日想訓覺，所以都真係有用架~」Queenie笑住講。
 
「對女仔黎講減肥應該係最有用同最大動力~」我講笑道。
 




「哈哈都係呀~ 不過初初其實都好累，但就係體力上而唔係精神上，然後慢慢習慣左就好了。」
 
「我都認同，有運動開我打完都覺得好累...」玩左幾堂我都唔可以否認衣項運動好消耗體力。
 
「咁用嘅肌肉唔同嘅~ 記住開始前做好熱身，完後又拉返筋就好，唔係會容易整親架~」Queenie好心提醒我道。
 
「知道喇大師姐~」
 
 
就係咁，經過幾次一齊走後我同Queenie都越黎越熟仲交換左電話閒時無聊會傾一兩句偈。
 
雖然衣個都算係成功左第一步，但距離要達成目標都真係仲有一段好遠嘅距離…
 
到底下一步我應該點做呢? 太主動又會嚇親人，唔主動又好難有進展。睇黎無外力或者一d契機幫助下，我都好難再同Queenie有進一步嘅可能…
 




只不過我無諗過當我仲苦惱緊下一步應該點做果陣，契機竟然真係會突然出現左。
 
 
「Ryan，你可唔可以幫我一個忙?」有次同佢一齊走果陣佢突然問我。
 
 
「當然可以啦，不過咩忙先~」有機會獻殷勤我當然唔會放過衣個機會啦。
 
「你... 可唔可以扮我男朋友一段時間?」Queenie猶豫左一段短時間後就問。