我嘅職業係專溝人地個女朋友: 6.3

---回到現實---
 
「Queenie係一個好好嘅女仔，我唔想佢傷心…」Wayne好黯然咁講。
 
「明白，不過我要觀察一日你地拍拖嘅情況先。」
 
一齊耐左感情轉淡都係常見嘅情況，所以我都無再多問照做返平時嘅野。
 
「無問題。」Wayne爽快答應。
 




 
兩日後，我就如常咁跟住阿Wayne同佢女朋友Queenie去睇下佢地嘅拍拖情況。但出乎意料之外，當我擔住支煙從遠處望住佢地果陣，我發覺我竟然咩都睇唔到，任我左望右望點望我都完全搵唔到佢地之間有任何嘅切入點…
 
衣個情況係我自從有左衣個能力後都從未預到過。
 
同時間，或者真係一齊得太耐所以就算無左感覺感情都仲好深? 睇住佢地拍拖我亦察覺到Wayne對Queenie似乎仲係滿有感情。
 
雖然佢好似刻意咁對Queenie有少少冷淡，但從佢一d表情同肢體語言好易睇得出佢仲係好關心同著緊Queenie。
 
而且佢上次同我講自己同Queenie個故仔果陣，從佢把聲聽得出果種幸福同甜，係直至去到最後講要我幫手，佢把聲先開始變得黯然。




 
我覺得佢自己應該都好唔捨得衣段關係，而咁亦令我對佢嘅新歡有少少好奇到底係一個咩人。
 
 
「你衣個case有d難攪喎，我睇得出你女朋友真係好鍾意你…」
 
果晚我打左比佢同佢講，因為睇唔出切入點嘅唯一解釋就係佢女朋友真係好鍾意佢暫時完全無變心或者想分開嘅可能。
 
「下? 咁點算呀? 咁係咪無辦法?」Wayne即刻好緊張咁問。
 




「我都仍然會盡力試下嘅，但保証唔到成功… 同埋我睇得出你對佢都仲係好有感情，唔似變左心想分手咁… 你真係諗清楚想咁做? 定其實你仲有野未同我講?」我提出我嘅勸告同懷疑。
 
「無呀… 可能一齊左咁耐，大家之間感情點都真係會好深掛… 不過我諗得好清楚係想同佢分手所以先搵你幫手。你一定要令佢變心唔再鍾意我呀!」Wayne頗頗為肯定咁講。。
 
「咁我努力嘗試下啦…」
 
始終我都係專業，就算睇唔出佢地嘅弱點，未試過有咁嘅經驗，我都要努力嘗試下。必要時睇下可唔可以自己努力咁為佢地制造一個弱點出黎。