我嘅職業係專溝人地個女朋友: 6.2

果日咁岩Queenie有事無返青崇，而我離開教會果陣就見到Roy喺門口舉手同我打左個招呼再示意我佢有事搵我。
 
「你近排係咪專登避開Queenie呀?」打左聲招呼好快佢就單刀直入咁問。
 
「下? 無呀... 佢咁同你講?」我好驚訝佢竟然會咁問，但就當然唔會承認。
 
「佢近排好似好唔開心咁呀，佢覺得你好似專登迴避佢，同時間又同另一個女仔行得好埋...」Roy望實我咁講。
 
「下! 邊有呀? 佢指邊個?」衣個消息令我更震驚，亦令我開始擔心到底邊個令Queenie對我有衣個誤會。
 




「其實你地d感情事我唔想介入太多... 不過我唔想Queenie唔開心。佢係一個好好嘅女仔黎架，而我亦未見過佢咁緊張另一個異性，所以無論你有無鍾意嘅人或者女朋友都好，希望你唔好傷害佢啦...」Roy誠懇又擔心咁講。
 
對於Roy嘅暗示，我真係唔太明。佢好似講到Queenie對我有意思咁，但明明佢先係Queenie男朋友。咦…唔通...
 
「其實... 點解你會咁講? 你唔係先係佢男朋友?」我終於鼓起勇氣問。
 
Roy聽到後有d驚呆，然後就開始忍唔住大笑起黎。
 
「哈哈哈，我係Queenie男朋友? 你一直都咁諗?」佢笑到咁上下就問。
 




「唔係咩?」雖然從佢反應我知自己好大機會一直都誤會左，不過仍然再問。
 
「唔怪得我之前覺得你望我d眼神有d奇怪啦... 所以你係因為咁而避開佢?」佢突然好似諗通左d野然後問。
 
我無出聲答佢但其實即係默認。
 
「所以你對佢都有意思?」佢見我唔答再問。
 
我繼續保持沉默。
 




「咁就真係太好喇! 不過你誤會晒喇Wayne…」佢如釋重負咁講。
 
 
原來Roy係Queenie由細識到大嘅青梅竹馬，但就絕對唔係佢女朋友，因為Roy原來係一個同性戀者鍾意男人。不過為左暪住身邊嘅朋友，加上果陣佢比另一個唔鍾意嘅男仔纏擾得好犀利，所以佢先搵Queenie扮佢女朋友令對方知難而退，順便做下煙幕掩人以目。
 
前排佢見Queenie成日好似唔開心咁，一問之下發現原來喺因為感受到我對佢越黎越疏離，同時間同另一個女仔又好似行得好埋咁，所以佢就唔開心，亦因而引發左佢今日襯Queenie唔係度就黎搵我問過究竟嘅念頭。
 
我聽完後好開心，亦無諗過原來事實係咁。所謂好事多磨，經過衣一波三折，我唔想再浪費時間就下定決心正式追求Queenie，然後好快就正式同左佢一齊。
 
之後問返佢我先知原來之前我為左避開佢就成日搵左另一個組員做藉口，成日扮搵佢或者約左佢，結果造成左Queenie嘅誤會。
 
 
一齊左之後嘅好多年，我地都好開心，連交都好似無鬧過，日日都好恩愛。
 
但唔知係咪真係有類似七年之癢嘅野呢，當我地過左十週年慶祝後，我對Queenie嘅感覺好似突然間淡左，而近排我仲鍾意左另一個同事，對Queenie嘅感覺就跌得更加急速。