精子is money: 第115章 聖誕聯歡會

「唉，我諗返起岩岩首歌，首歌好感人啊！」金天羽好感觸咁講。

我對金天羽翻一下白眼，一時之間唔知可以俾咩反應佢。

「我聽到差少少喊出黎。」金天羽雙目泛起淚光咁講。

「……！」我更加無言，唔通條友真係Gay既？


半個鐘後，同學們都食得七七八八，檯面上既食物都所剩無幾。



「各位同學仔食飽未？等我地玩返個活動消化下先。」林Miss講。

「玩咩呀？」同學仔齊聲話。

「第一個遊戲就玩踩氣球，首先我地分成兩組，分為藍隊同紅隊，藍隊係男仔，而紅組就係女仔，擊破對面隊全數氣球為勝利。」林Miss解釋。

「比賽開始！」

「Boom　Boom……！」男同學一開始就毫不留情咁踩向女同學腳下既氣球，幾個女同學都反應唔黎，女同學腳下既氣球因此變成碎塊。



後黎，唐梓晴開始指揮女同學改變策略。


突然間，只見女同學突然間聚埋一齊，然後迅速散開，由原本單對單變為2對1，即係兩位女同學進攻一位男同學。

「Boom！」一個男同學腳上既氣球被女同學踩爆左，一個男同學就咁敗倒係女同學既裙下。

隨住時間既流逝，同學們不但無氣喘既表現，反而更加落力咁去玩，遊戲愈黎愈刺激，男同學仍然採取個人主義者，以單對多進攻女同學個氣球，或者係防守住唔俾女同學踩爆自己既氣球。




「Boom！」一個男同學又接一個咁樣被人踩爆氣球，佢地帶住不甘既心情離場，男同學開始陸陸續續地離場，似乎唐梓晴既策略非常奏效。
 
到最後場上只得返兩個男同學，一個係我，另一個係白少添，而女同學就仲有八位，至於點解白少添可以生存落黎？

只因佢做事狠辣，即使係遊戲，不論面前是否女同學，佢都會用盡全力或者不擇手斷咁去取勝，有幾個女同學既小腿都俾撞白少添到紅曬。

相反地阿牛係自願被女同學踩爆氣球既人，阿牛表示唔忍心欺負女同學，而金天羽就係一開波就輸左果D人黎。

「Boom！」就連白少添都俾人踩爆左，原本圍住白少添果四個女同學都轉移視線，慢慢逼近我，我不斷退後……不斷後退。


「加油阿，積師父。」金天羽係場外吶喊助威。

「嗯！」正所謂擒贼先擒王，我決定要先踩爆唐梓晴既氣球先。



我鎖定唐梓晴腳下既氣球半瞇眼一踩！

「哎呀！」唐梓晴嬌聲一出，所有人都望向佢既方向，只見唐梓晴倒地禁住自己雙腳，似乎又再扭親，就如重演當天體育堂既跌法。

「你無事呀嘛？ Boom！」我彎腰扶起唐梓晴，我轉身低頭一望，原來呢一切都只係陰謀……