精子is money: 第114章 男神出風頭

「阿積係咪到呀…我想問你呢…平安夜果晚得唔得閒呀？」林舒寶氣喘喘斷斷續續咁講。

「阿寶？平安夜？做咩？」

「平安夜？」阿牛帶住迷茫既眼神講出呢句，似乎唔知平安夜係咩。

「！」我心諗平安夜失身夜？

「阿寶唔得呀，唔好意思，果晚我要返工。」聽到阿牛把聲，我即刻拒絕林舒寶。



「最多，我叫阿媽放你假囉。」林舒寶嘟起個嘴講。

「下，唔好啦掛，係放都係全員工放啦，點會只係我放呢……？」我都唔知要點應林舒寶好。

「放咩？你地講緊咩呀？」寶拉姐從遠處一邊行過黎一邊講。

「咁呀，不如改做聖誕節果日去玩啦。」林舒寶對住我講，佢唔講我真係唔記得聖誕節就快黎。

「聖誕節？阿寶話聖誕節果日一齊去玩放鬆下喎。」我向寶拉姐講。



「幾好呀，反正果日係紅日，你地咪放個假去玩下，當俾自己抖下囉。」寶拉姐向我地講。

「寶拉姐你都不如一齊黎玩啦咁。」我向寶拉姐問。

「唔啦，都幾十歲人啦，你地玩得開心D啦。」寶拉姐對我地講。

「邊係呢，寶拉姐你咁後生人又靚，直程係我姐姐黎啦。」李右婷望住寶拉姐講。

「哈哈，都係又婷識得哄人開心。」寶拉姐回應。



「好啦，今日時間都差唔多，收舖啦。」寶拉姐講。

「好！」聽到呢句既我地人都精神曬。

 
光陰似箭，日月如梭，話咁快就黎到三星期後學校舉行既聖誕聯歡會，鑑於一個月前，我地班拒絕參加班際合唱比賽，所以我地只係可以係台下欣賞同學仔既表演，雖說同學們的確係多才多藝，但睇得多都會厭悶。

「各位同學，節目已經接近尾聲，不過大家唔洗失望，之後落黎最後一個既表演保證壓軸。」司儀講。

「下……咁快，係咪咖？」同學們帶點失望既語氣講。

禮堂上既紅色布簾緩緩落下，禮堂燈光驟然一黑，眼前漆黑一片，數秒後，微弱既燈光映入眼簾，同時簾幕再次升起。呢個時候，禮堂上唔知幾時多左一台白色鋼琴，暗淡既燈光更突顯出白色鋼琴既色彩，非常注目。

「……？」同學們瑣碎既聲音落入我耳中。



「喂，上台啦上台啦。」突然有班女同學歡呼尖叫。

「邊個？」前幾排既女同學講。

「藍佑龍呀！」女同學話，原來藍佑龍仲係台下慢條斯理咁行去台邊，藍佑龍身穿棗紅色校嬲雙手握實一枝咪，佢跨過禮堂既梯級行到禮堂既正中間。

「藍佑龍，藍佑龍、藍佑龍……」佢既粉絲係到瘋狂呼叫。

「咳咳！」藍佑龍開咪示意安靜，全場即時靜落黎，再無其他嘈雜之聲。

「我今日要唱既係Secret Base君がくれたもの，希望可以將我既心意傳達俾一個女仔。」藍佑龍講完後眨一眨眼睛，全場既女仔已經俾佢電暈。

鋼琴開始響起……後來一把磁性既男聲插入，聲音有極大既穿透力，與琴音非常配合。

不久，同學們一邊哼住旋律，一邊為藍佑龍打拍節，顯然地陶醉於曲中。



「嗚嗚。」有女同學感動到流淚。