精子is money: 第五十三章 哥哥，歡迎回家

我咩住阿花一路行一路行，行到一處有幾間餐廳，不過我眼前中間既餐廳最為特出，呢間餐廳外面係黑白色，仲掛上迷你小飾物出黎。我望一望餐廳門口既食譜，

一打開，見到好特別既菜色名，價錢又唔貴。嗯，唔錯。無論食譜定係餐廳既外形同埋價錢都幾吸引，我決定入去呢間餐廳試一試。
 
不過我雙手已經用黎扶住阿花既大脾，我只能夠用腳踢開道門，我一腳踢開，門緩緩咁開，正當我以為自己係霸氣登場既時候，點知一開門，突然間有幾個身穿女僕裝既少女出黎撲向我身邊。
 
佢地用娃娃音再露出一個可憐既眼神講左句：「歡迎回家，哥哥～」
 
「下？」聽到呢句既我當堂嚇左跳，然後得啖笑，心諗咩料？
 


 
三個女僕裝少女拖住我隻手黎行，我一直俾佢地牽住走，佢地愈行愈急，由於我背上面依然咩實阿花，而我另外隻手就扶住阿花對大脾，跟唔上佢地步伐，差ｄ失去平衡，嚇到我心都離一離。
 
三個女僕少女停左係到拎轉頭望住我：「哥哥，真係唔好意思呀，小楓唔係有心咖。」之後女僕少女小楓不斷咁躹躬，再露出水汪汪既眼睛，流露出楚楚可憐既樣望實我。

「係啵，哥哥你都好耐無返黎屋企食飯啦啵，唔通你唔記得小露啦？」天真活潑既女僕小露吐一吐佢粉色小舌頭講。

小露講完呢句後露出一個迷人既笑容，小露瞇成半月既雙眼，長長既眼睫毛，露出一排潔淨既牙齒，臉上面仲有兩個小酒窩，不斷向我放電。
 
「咩料，其實我好想講從來都無黎過食囉……同埋呢到根本都唔係我屋企。」



 
不過當見到眼前既大眼少女楚楚可憐既神情，我都唔忍心講出呢句，將呢句說話埋藏係心底。
 
算啦，就坐呢張檯啦。我慢慢咁放低阿花，期間一路扶住阿花坐落張椅子。

檯係黑色以雲石製造，檯上有白色唔同大細既波點，張檯非常光滑，無任何既污點，而張椅子就形狀怪異，不過坐落去卻異常地好坐。