真人真事改篇﹕師生戀﹕《最接近的陌生距離》: 第六十八章之一

隻手好重，個心好重，隻戒指好重。重到我行唔郁，果然喺Vick面前，我係咁不堪一擊。
 
我搭緊𨋢返屋企，望住Vick托我送畀Miss嘅戒指，我就知道呢盒戒指價值不菲。對比起我嘅戒指，點見人呀⋯⋯屌，唔想送添。
 
呢個時候我Whatapps響咗下，係Vick Whatapps我：「匡仔，隻戒指一定要送到畀盈盈呀🙏🏻」
 
唉⋯⋯點解我而家先清醒係唔可以留Contact畀Vick呢？！ 佢而家隨時隨地可以搵我，睇下我有冇照佢吩咐去做。
 
吩咐？係呀⋯⋯我覺得我唔係幫佢，係照佢說話去做。好似Vick啲馬仔咁。幫情敵追自己條女，有冇咁痴線呀？
 




而家諗起頭先同Vick交手，無可否認，Vick 真係一個好有魅力嘅男人，可以話男女通吃。女嘅自然被佢財力、外表、穩重氣質所吸引。而對男人而言，Vick係學習成為成功男人嘅榜樣。
 
Vick好似有超能力咁，佢一眼就睇穿你心意，起清你個底，知你想要啲咩，然後佢就拎住你想要嘅嘢行去你面前。你接受咗，你就抗拒唔到佢。我手中嘅滷水鵝看似微不足道，卻可能係Vick為咗接近我嘅手段。頭先成個過程我唔覺得係Vick迫緊我，係我好自然去做到佢要求⋯⋯
 
叮——！𨋢到，我慢慢行返去屋企。家門一開，久違嘅暖意吹到我身上。
 
「阿媽，細佬返嚟啦！」家姐開門歡迎我。
 
家姐難得笑住叫我入屋，阿媽剛好蒸咗條魚拎咗出廳，老豆牛咁眼望住電視又好不滿瞄咗我一眼。呢一刻我先諗到，到底我有幾耐冇見過呢個畫面呢？
 




「細佬呀，快啲換衫洗手，我地開飯架啦。」阿媽放低條蒸魚，好耐都冇見過佢咁和藹可親。
 
「謝子匡！」家姐喺廚房拎咗兩碗飯出嚟，一面鄙視咁講：「幫你𢳂埋飯呀！由細到大都係我幫你𢳂！」
 
「嘩！真係多撚謝晒你呀謝子榆！」我對佢皮笑肉不笑。
 
「阿媽呀！細佬又講粗口啦！」
 
「你個謝子匡呀！我遲早就剪甩你個嘴！」阿媽拎咗碟冷盤出嚟邊鬧邊講：「快啲洗手換衫啦！然後幫你老豆拎枝啤酒出嚟！」
 




我照阿媽說話做，換晒衫洗埋手，拎埋枝啤就埋位。
 
「細佬，叫爸爸食飯。」阿媽用氣聲講，好似驚咗老豆咁。
 
「叫謝子榆嗌啦！」
 
「呢度你最細呀！」家姐拍鳩我個頭。
 
「屌，恰鳩我⋯⋯」我擰去老豆嗰邊，叫咗聲：「老豆！」
 
老豆輕輕放低報紙，露對眼出嚟，好似獵人咁啤住我。
 
「嘿嘿⋯⋯食飯啦。」
 
老豆放低報紙，再施施然咁埋位。




 
「大家食飯！」家姐拍住手宣佈食得，除咗我之外，全家人都起筷。
 
老實講，由踏入家門一刻起，屋企洋溢着溫馨嘅氣氛令我心情輕鬆咗好多。 Vick留畀我嘅陰霾都被呢個充滿愛嘅家庭驅散。
 
充滿⋯⋯愛？ 以前我會埋怨屋企窮，老豆阿媽為搵食唔多理我。因為家姐乖啲，讀書叻啲，怨老豆阿媽好似錫家姐多啲。直至同Miss一齊，認識咩叫破碎家庭，我先知原來自己屋企係咁完整溫馨。