真人真事改篇﹕師生戀﹕《最接近的陌生距離》: 第六十七章之四
「以盈盈個性格⋯⋯」Vick嘴角帶笑咁講：「佢一定要你守住個秘密嘅！」
秘⋯⋯秘密？仆街⋯⋯佢真係估到我就係Miss嘅新男朋友呀！？
「好⋯⋯不如同你玩個遊戲呀！我讀U時會玩。我問你答。我會問你三條問題，你只需要可以答係同唔係！如果三條內問到我想問嘅嘢，就係我贏。相反你可以守得住，令我問唔到嘢呢，你贏。嗱！唔可以講大話架！講咗就父母斷雙腳。好靈架！哈哈⋯⋯」
我要點應佢好呀？佢擺明想chok料啦！我未嚟得切反應時，Vick已經問第一條問題啦！
「盈盈被班老黑騷擾嗰日呀，佢話有新男朋友。呢句係咪真話？」
「係。」我額頭冒出冷汗。
「盈盈個新男朋友係咪喺學校識架？」
「係。」冷汗累積，形成大汗珠。
Vick雙眉一揚，個樣望落胸有成竹，笑說：「最後一條。」剛好又紅燈，Vick停車，望住我，一面令人心寒嘅友善：「盈盈個新男朋友——」
佢講到重點之處前，故意放慢嚟講，將車內氣氛操控到令人窒息嘅地步。我凝望住佢，故作鎮定，好驚一個錯嘅眼神、奇怪嘅回憶都令佢起疑。
「——係咪就係——」
.
「——嗰日被黑社會打傷嘅男老師呀？」
.
「黎⋯⋯黎Sir?」
「啊——！原來佢叫黎Sir。」
「係⋯⋯係呀。」咦？感覺上⋯⋯我好似篤咗黎Sir出嚟咁⋯⋯唔係！佢套緊我料！
「所以⋯⋯真係黎Sir？係盈盈新男朋友？」
「唔係唔係！」我即刻否認⋯⋯哎！我緊張到唔識講大話添！咁好嘅機會推落去黎Sir度！
「哈⋯⋯冇可能！點會唔係呀。佢好勇猛架喎！盈盈有事即刻跳出嚟做沙包。」Vick口講欣賞，實際係串緊黎Sir。咦？聽佢咁講⋯⋯佢當時係暗中觀察住？
「⋯⋯我真係唔知呀。」
「唉！都知你係義氣仔女嚟架啦。」Vick笑說，氣氛緩和咗，回望我笑說：「既然你應承得盈盈要守秘密。我就唔為難你啦！」
「係囉⋯⋯答應過Miss Wong架嘛！」
我講完之後，氣氛突然變得好靜，直至——「嘿⋯⋯」Vick自信一笑，呢個笑聲將寂靜打破，使我好奇咁望住佢。
「嘿⋯⋯嘿⋯⋯哈哈哈！」Vick笑出聲，聽到我好唔舒服。搞到我唔敢出聲。佢望一望我話：「你講大話！」
「咩事呀？」我又標緊冷汗！
「嘿⋯⋯你話Miss Wong唔會同你講私人嘢嘛。但你又答我會為佢守秘密，即係你知盈盈個新男朋友係邊個啦！」
仆街！我中撚晒佢嘅陷阱添！好⋯⋯好恐怖呀！
「咁⋯⋯就算被你知道Miss Wong個男朋友係邊個，你可以點呀？」
「我會⋯⋯」又一個燈位，Vick回頭對我笑住講—
.
「摧毀佢。」
.
Vick笑下笑下，但肌肉開始僵硬，兩眼定住，有一種說不出嘅寒意！
「哈哈哈⋯⋯！」Vick忽然笑出聲：「講笑咋！唉⋯⋯其實我都係想知道個男人對盈盈好唔好啫！」
架車嚟到順天邨停車場後， Vick繼續講：「話晒我同盈盈感情都好深，我都想佢有人錫。」
架車泊好咗，停低時，佢又向我望過嚟，一面情深咁講：「如果有人繼續幫我愛護盈盈，我會好開心。」
一時間我唔知畀咩反應。你話佢假又唔係，Vick呢刻眼神冇愛過Miss Wong的話係冇可能扮到出嚟！
但剛才佢講「摧毀佢」時嘅樣，真係太恐怖。到底Vick呢個人係點架？
Vick 落咗車，仲幫我開車門。
「唔⋯⋯唔該晒⋯⋯Vick⋯⋯」
「客咩氣呀。行啦。」Vick拍一拍我膊頭，一齊行去平台花園。
「咦？我到咗啦。你唔走嘅？」
「哈哈⋯⋯其實你知唔知呢我同你好緣架！我其實呢，以前就住喺呢條邨！」佢見到花園上有個馬騮架就一口氣爬咗上去。
咩話？！冇聽過Miss講過嘅！定係Miss根本唔知呢？
「我細個就係住喺天瑤樓。」Vick指住遠方嘅樓房：「今日返嚟其實係嚟探我阿婆嘅。估唔到我同你住同一條邨。」
「係⋯⋯係囉⋯⋯咁啱嘅。我⋯⋯我都要走啦⋯⋯我住嗰邊架⋯⋯」我指去另一邊。
「天池樓？」
「我⋯⋯屋企人等緊我開飯。走先啦，bye。」
「喂⋯⋯細路，等陣先。」
我回頭一睇，就見到Vick 喺馬騮架度跳返落嚟，佢一如頭先咁帶住令人感到友善嘅氣息，微笑同我講：「見同你咁有緣，我地撞過幾次，不如正式交個朋友呀。」Vick向我伸出友誼之手，笑說：「我叫阿Vick。你叫咩名呀？」
「我⋯⋯我叫阿匡。」我故作鎮定同Vick握手。
「咁我地就係朋友啦！匡仔，唔好介意我老你成截喎！」
「唔會嘅。有個生意人做朋友都幾好呀。」
「啱聽！男人最忌就係窮！等你大個啲，嚟我公司做嘢啦。我教識你投資、炒股。你幫我手搵錢，我幫你成為有錢人！」
「嗯⋯⋯好呀。」
「仲有一件事想搵你幫忙。」Vick伸手入件馬甲袋度，邊摷邊講：「你同盈盈咁熟，可唔可以幫我做一件事？」
Vick向我遞手，張手，捧喺佢手心嘅係一個黑色嘅戒指盒。
.
「幫我將呢份禮物送畀盈盈。」
望住盒戒指，我內心又泛起難以言喻嘅感覺。
.
「幫我同盈盈講聲『聖誕快樂，我等你。』」