真人真事改篇﹕師生戀﹕《最接近的陌生距離》: 第六十七章之三

㗩⋯⋯㗩⋯⋯㗩⋯⋯Vick單手揸車，另一隻手拎住個蟹腳食緊，搞到架車腥腥地，又充斥住食嘢嘅聲音。我望住佢食到咁地痞流氓咁，同佢一身型棍生意人嘅打扮有好大出入。
 
「Sorry呀！呢檔凍蟹我太耐冇食啦。我忍唔住！搞到冇晒儀態添！唔好介意！」
 
「唔緊要⋯⋯」
 
Vick瞄我一眼，就摷咗個蟹身遞畀我，笑住講：「細路，整件呀。肥佬明除咗鵝出名之外，凍蟹都一流架。」
 
「⋯⋯唔洗啦，我⋯⋯我驚整污糟你架車。」
 




「哈哈⋯⋯！我地都撞過幾次啦，仲同我客氣做咩呢？唔怕喎，肥佬明幫我拆晒蟹架啦！好易食架咋！唔洗怕整污糟喎！」佢瞄我一眼，又笑住話：「嗱！快啲要咗佢呀，你咁樣搞到我分心架。」
 
我好似被佢催眠咗咁，竟然接受咗佢嘅「禮物」。
 
「試下啦。爽架。」
 
我聽佢講食咗一啖蟹，的確係好食嘅。
 
「唔錯喎！」
 




「係呢！我冇呃你啦。」佢自己又摷咗件蟹，繼續單手揸車：「又會咁啱嘅？特登順天邨出嚟買打冷？識貨喎。」
 
「係呀，我爸爸好鍾意食呢檔。」
 
「你爸爸⋯⋯喺廟街附近做保安架？」
 
「係⋯⋯係呀！你點知架？」
 
「哈哈⋯⋯嗰間係保安飯堂嚟架。開到凌晨兩三點，通常啲夜更保安都會喺嗰邊食宵夜蛇王。」Vick向我望嚟，友善又用明白我嘅眼神講：「我老豆以前都係保安，佢成日買肥佬明啲打冷畀我食架。」
 




估唔到，我會同Vick有咁嘅相似之處。
 
「唉⋯⋯我最近唔太常食啦。一來我怕肥，二來⋯⋯冇人陪我食。」
 
「冇人⋯⋯陪你？」
 
「你Miss呀，盈盈。」Vick望住前路，一面無奈：「我地分手之後，我就冇嚟喇。佢成日鬧我食隻蟹都咁呢啡。哈哈⋯⋯我就笑佢太顧儀態，難整污糟隻手。」
 
佢提起同Miss嘅過去，令我心情難免一沈，隔咗陣先話：「Miss Wong? 佢都鍾意食⋯⋯？」由佢把口提Miss ， 我手腳都冰冷起嚟。
 
「係呀。初初一齊，我以為佢鍾意出入高級餐廳。但其實佢更加鍾意打冷。盈盈話細個屋企好嚴，阿媽唔會帶佢去廟街食飯，怕品流複雜。哈⋯⋯哈⋯⋯爆咗佢啲秘密你聽添。唔好講返佢知喎！」
 
「知⋯⋯知道⋯⋯」
 
「你同盈盈好熟架可？」




 
「係呀。呃⋯⋯我地全班同學都好鍾意佢。Miss Wong好好人，佢好錫我地。」
 
「嗯，咁就好。」Vick面露安慰，講：「佢初初搵到呢份工時，佢話壓力好大，又被同事蝦。好彩而家有你地呢班學生鍾意佢。咁我放心晒⋯⋯唉⋯⋯」
 
「⋯⋯你，冇事嘛？」
 
Vick搖一搖頭，嘆氣話：「冇，冇。只係歎息緊，如果當初我關心佢多啲，或者唔會搞到分手啫。」
 
「嗯。」
 
「哈哈⋯⋯唔知盈盈有冇同你提起我呢？嘿⋯⋯應該冇啦！我nobody嚟。」Vick望一望我，話：「我唔係一個好男朋友，嗰時煩緊大陸啲生意，要幫啲客搞start up。所以少咗見盈盈。盈盈好冇安全感，佢以為我出去搞其他女人。」
 
「嗯⋯⋯」我記得同Miss表白嗰晚，Miss有提到Vick喺出面搞三搞四。
 




「係呢。你知唔知道盈盈嘅新男朋友係邊個？你咁熟佢，你一定知啦。」
 
一嚟咁直接？一時間我被佢搞到不知所措，連忙講：「Miss Wong 其實唔會同我地講佢嘅私人事。」
 
「真係？」剛好紅燈，Vick向我望嚟，微笑咁講：「每次我都見到你同盈盈一齊，我以為你同佢熟到咩都肯同你講添！」
 
Vick笑緊，但我感覺到笑容背後有一種令人心底發毛嘅感覺。你以為佢笑，佢退後一步。但其實Vick好似迫緊你埋牆。
 
我一時間講唔到嘢，個心跳得好厲害。
 
「我知啦。」Vick望一望交通燈，轉咗綠燈，車繼續行。
 
「你知⋯⋯啲咩？」
 
「嘿⋯⋯？」Vick望一望我，笑咗一聲，就冇講嘢，專心揸車。




 
佢⋯⋯佢知道咗啲咩？唔通⋯⋯佢知道我同Miss Wong個關係⋯⋯？！