真人真事改篇﹕師生戀﹕《最接近的陌生距離》: 第六十七章之二

 
排咗大約半個鐘，家姐又打嚟話老豆想食滷水鵝。去到我嗰時，我同老闆講：「唔該，要一隻滷水鵝！」
 
「冇啦。」
 
「冇咩呀？成隻掛咗喺度喎！」
 
「留咗畀熟客啦！」
 
「吓，唔係吓話。咁有冇其他嘢食呀？樣樣都執啲畀我啦。」




 
「得返咁多咋！」老闆指住剩低嘅雜碎無奈咁講。
 
「唉⋯⋯我問下屋企人先。」
 
我跟手打電話畀家姐，同時間打冷店嘅老闆向我身後嘅人揮手叫道：「喂！大老闆！終於嚟嗱？」佢手起刀落，將成隻鵝斬件
 
「哈⋯⋯係呀，今日開工比較忙嘛。」
 
咦⋯⋯呢把聲？




 
「啲鵝又賣晒呀？仲有人排緊隊喎！」聲音嘅主人喺我旁邊行過，係個摺起袖、著住馬甲嘅西裝男：「好心你整多啲啦！咁好賣，整多啲賣多啲仲好啦！」
 
「好心？不如你做下好心讓畀呢個細佬啦！」老闆指一指我講：「睇佢都係孝順仔幫屋企人買架啦。」
 
西裝男向我望嚟，我亦望返西裝男⋯⋯
 
「Vi⋯⋯Vick？」我默默咁講咗聲⋯⋯
 
竟⋯⋯竟然⋯⋯竟然咁都撞到阿Vick？！




 
Vick望一望我，皺一下眉頭，就好似記起我係邊個，揚起雙眉講：「咦？你係⋯⋯啊！盈盈個學生！」
 
「喂？識得架？」打冷店老闆。
 
「係呀。熟人嚟架！我盒鵝讓畀佢啦。入我數。仲有冇凍蟹、凍烏頭呀？要咩有咩，執多個豬紅，我阿婆鍾意食呀！」
 
「有有有！留晒畀你架啦！轉頭整畀你！」打冷店老闆包好盒鵝塞比我：「嘩，細路！你發達啦！同大老闆做朋友一定有好關照！遲啲發咗達一定要成日嚟幫襯呀！」
 
「吓⋯⋯哦⋯⋯」我被Vick嘅出現搞到不知所措，一時間唔識同老闆拒絕Vick呢份好意。
 
「喂！肥佬明你講呢啲！」Vick指住佢笑說。
 
「咁係呀嘛！講開又講，你有今日咁高成就都係食我啲打冷大架！斬埋隻蟹畀你！等多陣！」
 




老闆忙緊其他嘢時，Vick就同我傾計：「識揀喎細路，呢檔好嘢嚟架。」
 
「⋯⋯呃⋯⋯我畀返錢你呀。」
 
「No No No。客咩氣呀！嗱，做男人唔好咁婆媽啦！」
 
Vick講得好溫柔又豪氣，但總係覺得有總之人無可抗拒嘅感覺。我惟有點下頭，講咗句：「咁⋯⋯多謝你先。我⋯⋯趕住返屋企啦。Bye。」
 
「好呀！係咁先呀！Bye!」
 
嘩⋯⋯今日搞咩呀？疑似撞到蟲蟲都算，居然咁都撞到Vick？！
 
每次提起甚至見到呢一個人，空氣中好似有一股壓力想將我壓死咁。我而家個心跳得好快，個腦都唔係好諗到嘢，竟然唔記得咗要搭咩車返屋企。
 
行到咁上下，我聽到有架車砵我。我應聲一睇，係架林寶堅尼地。此時車窗較低咗，內裡嘅人向我講：「細路，你住邊呀？」




 
我望一望，原來係阿Vick，我話：「呃⋯⋯我⋯⋯住順天邨⋯⋯」
 
「呢度冇你架巴士喎！你行錯路呀？」
 
「係⋯⋯係咩？」
 
「哈⋯⋯我兜埋你啦。」
 
此時架林寶度門向上自動打開咗。
 
「呃⋯⋯」
 
「快啦，我被人抄牌架啦！」
 




「好⋯⋯」
 
Vick嘅說話真係好友善⋯⋯
 
但卻帶住一種命令人嘅感覺⋯⋯