真人真事改篇﹕師生戀﹕《最接近的陌生距離》: 第六十二章之二

「7-11？」Miss望住個日又紅又綠嘅招牌打咗個突，然後佢慢慢向我望嚟，將「作死你呀？」四個字刻喺佢面上面。
 
我傻傻一笑，就拉住Miss隻手走入去七仔，喺琳琅滿目嘅貨架前對佢笑說：「盈盈呀，你知唔知呢，我地呢啲窮學生喺月尾嘅時候點樣過？」
 
「唔知。」Miss繼續嬲爆爆擰埋一面唔想望住我。
 
「我同阿偉喺七仔打滾咁多年，研發咗『最豪華嘅窮撚食嘢大法』！想唔想試下呀？」
 
「哼！」
 




「咩呀！畀機會你了解下學生喎！」Miss仲係唔想彩我，咁惟有出絕招啦。我向Miss攤大手板，話：「盈盈，畀張五十蚊我先。」
 
Miss白咗我一眼，嘴藐藐咁，好唔願意咁喺個銀包入面潛咗張五十蚊紙畀我。咁梗係啦，帶佢嚟七仔食嘢都夠衰，仲要問佢拎錢添！哈哈⋯⋯我就係鍾諗Miss發緊憫憎嘅樣！
 
我接過張銀紙後就話：「嗱，睇住啦喎！」我正面舉起張一百蚊紙畀Miss睇，繼續話：「盈盈，呢度係一張五十蚊紙。然後我大力一撕——！」
 
「喂呀！！」Miss見我作狀想撕爛張五十蚊紙，就驚到大叫出聲。
 
「——就變咗兩張五十蚊紙出嚟啦！哈哈！」我左右手各拎住張五十蚊紙揚下揚下。
 




本來嚇到花容失色嘅Miss見到我其實係變魔術後就即時笑返，但一秒後佢就嬲爆爆咁搣咗我塊面幾下，笑住咁鬧：「死低B仔咁大膽整蠱Miss? 」
 
「哎吔哎哋⋯⋯好痛呀⋯⋯哈哈！」
 
「你玩完未呀？肚餓呀，快啲買嘢食啦！」
 
「嗱嗱，唔好心急。你信唔信我用一百蚊內就可以請你食到鮑魚、花膠同滿漢全席呀？」我洋洋得意咁講。
 
Miss已經被我激到冇晒耐性，翹埋雙手唔出聲啤到我實一實。
 




我嘻嘻咁傻笑後就行埋一邊，喺貨架之間遊走，幫Miss砌個豪華窮撚大餐出嚟。Miss被我激到唔知好嬲定好笑，呢刻佢忽然老師mode on咗，當我揀緊嘢食時，佢就喺我背後睇到實，就好似驚我會偷嘢咁。
 
大幾十零分鐘左右，我已經揀好晒呢材料啦！
 
「先生，盛惠你$99.9。」
 
「see？」我對住Miss笑得好招積。激到Miss用唇形鬧我一句「低B仔」。
 
當我畀咗錢後，收銀員就同我講：「先生呢度十個印花。」
 
「Yes！齊章！」我即刻拎儲緊嘅印花卡出嚟貼埋啲印花。
 
呢個時候，我感覺到有一股膨脹緊嘅不滿喺我旁邊壓緊埋嚟，我本能咁一望，已經見到Miss嬲到頭頂出煙，叉晒要咁鬧：「啊！謝子匡！你帶我嚟七仔就係為咗儲印花！！」
 
嘩！Miss真係好聰明，一嘢就起清我嘅陰謀，我連忙耍手擰頭想辯解，但嘴巴已經好誠實地講：「咁⋯⋯咁⋯⋯呢期七仔換緊限量版經典九巴模型呀嘛！我就差款勝利二型咋！」




 
Miss本來嬲到想鬧多幾句，但當佢聽到九巴之後，面上啲怒意全清，好似靈光一觸咁講咗聲：「可以換巴士模型？」
 
收銀員接口講：「係呀小姐，除咗儲印花外，額外加多五十蚊就可以換多一部架啦！」
 
「係呀？」Miss開心一笑，就邊摷銀包邊講：「咁我換多部呀！咦⋯⋯？！」Miss摷摷下時怪叫咗聲：「明明有兩張五十蚊架？頭先畀咗一張低B仔⋯⋯」
 
「嘻⋯⋯⋯」我忍唔住，笑咗聲，但個心又驚到仆街，話：「兩張五十蚊用咗未冇咗囉。」
 
「吓⋯⋯？！頭先你變出嚟嘅五十蚊就係⋯⋯？！喂！謝子匡！你好過份喎！！」
 
「唔係點叫魔術呀？Magic！！」
 
「我記你大過呀！呢啲邊係魔術呀！」Miss鬧完之後，嘴角又忍唔住笑，話：「你⋯⋯點做到架？幾時偷走走咗我啲錢架？！」
 




其實我一早plan定帶Miss嚟七仔食嘢，呢個魔術都係計劃之內。所以喺頭先出門前，趁Miss唔為意就偷佢啲錢。佢而家充滿好奇嘅眼神加埋個嬲樣真係好可愛呀！我打趣咁講：「Magic！」
 
「哎吔⋯⋯你！哼！」
 
收銀員見我地掛住打情罵俏，滴晒汗，婉轉咁講：「呃⋯⋯小姐請問係咪換紀念品？」
 
「oh！ Sorry！」
 
哈哈⋯⋯我就係咁作死，係要激下Miss先安樂。另一方面我又咁諗，見佢嬲爆爆總好過見到佢喊嘅。
 
「盈盈呀，唔好嬲啦。」我抽住一大袋食材行去熱食部附近嘅枱上面，傻笑咁講：「最多變多個魔術畀你睇啦！」
 
「哼！」Miss下意識地撳住個手袋。我對佢冷冷一笑，就變埋今日最後嘅魔術。
 
我真係可以用一百蚊內掃到啲罐頭鮑魚花膠呢啲好嘢返嚟。唔洗十分鐘，Miss由嬲樣變到好驚訝，仲忍唔住嘩咗出聲。因為喺佢眼前嘅係一碗好足料，有牛肉、鮑魚、花膠、司華力腸嘅即食碗麵！啊！收多你兩蚊，搭多個凍檸茶添！




 
「嗱，盈盈！我冇呃你啦。一百蚊，請你食鮑魚、花膠同滿漢全席！」講真，嘢食唔洗貴，賣相同擺設靚都夠呃到人。睇下Miss個滿足樣就知我呢兜野深得佢嘅歡心。
 
「咩請我食呀？你用我啲錢買架！」Miss鬧我一句，然後佢扮到好挑剔咁撥下碗麵就話：「鮑魚同花膠就有啦⋯⋯咁滿漢全席呢？」
 
「你望下個包裝先。」我將碗面嘅包裝蓋冚返落嚟，大大隻字寫住「滿漢全席 紅燒牛肉麵」。
 
Miss知道又被我整蠱之後又激到爆炸咁鬧：「謝子匡！你又整蠱Miss！兩個大過呀！」又打又鬧⋯⋯啊！我真係好Enjoy呀！
 
「我冇呃你呀！真係『滿漢全席』呀！快啲食呀！啲麵浸耐咗會好難食架！」
 
「開學之後先同你計呀！」Miss鬧完我再食一啖麵，笑容喺嘴邊堆積，嘻咗一聲，笑說：「其實你點做到架？成日都可以將啲好普通嘅嘢食都整到好好食咁嘅？」
 
「Magic！」我笑說：「你唔記得咗嗱？我以前做七仔架嘛。」
 




「所以？」
 
「我會知道邊啲嘢食做緊推廣或者就過期，咁未可以用好
少錢但買到好多嘢囉。」Miss聽到我講「過期」兩個字後就嚇到停手，我即刻講：「你放心，你呢碗麵冇過期架！」
 
Miss微微一笑，好滿足咁食麵，繼續話：「你由細到大一到月尾就咁食架啦？好多味精喎。」
 
我攤一攤手，笑說：「咁冇計啦，零用又唔多。頂到肚就得啦。哈⋯⋯其實都唔係啲特別嘢，你好似好出奇咁嘅？」
 
Miss笑住搖頭，就話：「我屋企咁嚴，我媽咪連我食啲咩嘢都要管架。我未試過喺七仔食到咁豐富囉！又鮑魚又花膠⋯⋯我真係服咗你！」
 
Miss望住街景，好開懷咁笑，又望住我講：「成日咁多古靈精怪諗法！低B仔！」換係正常嘅老師，呢一句一定係用嚟鬧人。但出自Miss把口，就變咗一份認同、讚賞同仰慕。
 
「咁你鍾唔鍾意先？」
 
Miss白我一眼，就繼續食麵唔理我。呢個時候我終於忍唔住深深錫佢塊面一啖，就話：「只要你鍾意就好啦。」
 
Miss呆呆咁望住我。
 
「只要你開心，我就好滿足架啦。」
 
呢句說話又觸動到Miss嘅心靈，佢眼白開始紅起嚟，又開始水汪汪咁。我知佢又想喊，所以已經準備好幫Miss抹眼淚。點知Miss夾起啲麵，遞喺我面前想餵我食，佢話：「呀～～～」佢又夾硬將情緒壓低咗。
 
「嗯！」我點一點頭，張開嘴，Miss將啲麵送入我口中。
 
不過Miss忽然玩嘢，唔理我食唔食得切，就將大大舊嘅花膠塞埋嚟，搞到我好狼狽。
 
「哈哈！好似蒼鼠呀！」Miss笑到好似細路女咁，將想喊嘅衝動完全咁壓制咗。
 
剎那間，我好想將呢刻永遠咁停住。因為呢個咁開心自在嘅時刻真係好難得。
 
喺未來嘅日子，唔知仲有冇機會好似呢一刻咁開心呢？