真人真事改篇﹕師生戀﹕《最接近的陌生距離》: 第六十二章之一

溫暖嘅感覺好似簿紗咁覆蓋我身上。我緩緩張開雙眼，只見到一片暖和嘅景象。
 
早晨嘅陽光係暖暖嘅橙色，為Miss嘅房間添上唔少朝氣。我定神望住天花板幾秒，始終記唔起琴晚係幾時返上床瞓，或者大概因為想忘記琴晚唔開心嘅事吧？
 
Miss挨住我膊頭瞓，佢兩隻眼仲係好腫，眼角滲緊淚水。佢兩眉漸漸深鎖，呼吸都急起嚟，睇嚟瞓得唔係咁舒服。我輕輕咁掃佢髮際時，Miss「啊」咗一聲叫出嚟，兩眼睜開，瞳孔猛然收縮，一面驚醒嘅樣子。
 
「盈盈？」我輕聲叫道。
 
Miss一時間冇回神過嚟，兩眼好驚咁四圍望。佢彷彿仲喺夢境中，好驚會有嘢突然出嚟嚇佢。此時我又叫多佢一聲，Miss神情好似被點醒，兩眼先慢慢放喺我面上。
 




「發惡夢呀？」我柔聲咁講，輕輕撫佢頭頂。
 
Miss知道自己真係醒過來後，佢鬆咗一口氣。然後輕輕摸我塊面，只係搖一搖頭就當係答我：「我冇事。」
 
我放心微笑，正想整個morning kiss 畀Miss。
 
「唔⋯⋯」Miss好厭惡咁叫咗聲，一面退開，手指抵住我唇上，話：「你未刷牙，唔准錫！」
 
佢其實有啲欲拒還迎，嘴巴微微笑住，我抱緊Miss條腰嚟追Kiss， 搞到佢係咁避我，邊鬧邊笑咁講：「喂呀，你好口臭呀。」最終Miss放棄回避我，輕輕喺我唇邊錫咗啖。
 




「今日嘅Kiss Kiss賣晒啦。」Miss抱住我面再甜蜜一笑，令我安心起嚟。
 
「我去煮早餐呀。」我親吻Miss額頭。
 
「吓？屋企冇咩嘢食喎，廚房好似得返啲罐頭咋。」Miss。
 
「夠做啦。你乖乖地等我，我變魔術你睇呀。」
 
Miss先係懷疑咁望住我，然後突然咬我個鼻頭。
 




「哎吔⋯⋯！」仲唔細力添！痛死我。
 
Miss俏皮咁笑，再將綿被包住自己，一面幸福咁講：「煮好再叫醒我。」
 
見到Miss變返以前咁，我個心就定咗，起碼呢一刻佢情緒冇受到琴晚嘅事影響，琴晚嘅事終於過眼煙雲。
 
Miss向來唔習慣買新鮮嘢食，所以佢雪櫃基本上係空。我喺廚房好似玩尋寶遊戲咁，幾經辛苦終於搜刮到啲食物，有兩片方包、一隻蛋、一罐咸牛肉同一舊牛油果⋯⋯夠做有特啦屌！
 
「嘩⋯⋯」當Miss望到一份牛油果蛋牛治時，佢不禁讚嘆咗聲：「點做到架？」
 
「吓？好難咩？」我倒咗杯鮮奶畀佢：「你之前將牛油果、蛋呀、方包呀呢啲分開食架？」
 
Miss聽到我串佢時，白咗我一眼，然後喺枱底用力咁伸咗我一腳，搞到我痛到叫咗一聲。然後Miss好開心咁品嘗我為佢準備嘅早餐。不過當佢將份蛋牛治放近唇邊時，卻又停落嚟，面色一沉。
 
「做咩呀？唔啱食呀？」我問。




 
Miss搖一搖頭，愁眉深鎖，沉住聲音咁講：「琴晚⋯⋯」
 
「嗯⋯⋯」提起琴晚嘅事，我都唔知畀咩反應好，只係點一點頭。
 
Miss沉默咗幾秒，一面欲言又止，然後佢話：「我有冇嚇親你呀？」
 
我實在唔知點答，又搖頭又點頭咁。其實我更耿耿於懷嘅係，Miss琴晚講啲嘢好奇怪，好似仲有嘢瞞住我。此時，我覺得我地之間好有一盒好神秘嘅箱。個箱有塊布冚住咗。我同Miss都唔敢將呢塊布揭開，將個秘密好赤裸地曝露喺我地眼前。
 
我地個關係幾經辛苦先走到呢一步，我以為大家都已經唔會有咩秘密。但係Miss如果有嘢瞞住我，咁呢個秘密一定係直接影響我地嘅關係。
 
「Sorry⋯⋯」Miss低頭咁講，佢呢句道歉代表住好多好多事情。
 
霎眼間我都唔知點應佢，我「嗯」咗聲，點下頭，大家就靜咗落嚟，然後各自食早餐。或者，大家咩都唔理，將個秘密永遠埋藏住會比較好？
 




過咗冇耐，Miss搵到新話題緩和下尷尬嘅氣氛。
 
「你食完早餐快啲返屋企啦。」Miss輕輕抹一抹嘴角：「成晚冇返去，你爸爸媽媽一定好擔心。」
 
「吓，放假喎。佢地都唔理我架啦！」我騷一騷後腦，靈光一閃，就興奮咁講：「我地今日不如去行街呀。」
 
「我好忙架低B!」Miss放低份三文治，抱怨咁講。但我知佢係呻緊啲工作嘢。
 
「唓！同我做功課一樣之嘛。你啲簿呀，備課呀呢啲臨放完假前做都得啦！」
 
「你講多次。」Miss一提工作嘢就女王mode on 咗！嚇死我！
 
「對唔住Miss Wong ！」真係嚇到我成個人彈起，點知⋯⋯
 
「嘻⋯⋯！哈哈！」Miss原來扮嬲整蠱我，佢滿足笑咗幾聲，就話：「不過今日真係陪唔到你，我要去探我細佬呀。」




 
「梓恒嗰個衰仔呀？」
 
「係梓康呀。」Miss嘆咗口氣繼續講：「梓康佢有情緒同行為問題，所以上年就轉咗去群育學校寄宿。而家放聖誕假，學校其實要放佢返屋企。但你知我媽咪佢⋯⋯」當提起媽咪時，Miss就講唔到落去，佢抖咗啖氣就話：「總之今日除咗探細佬之外，仲要傾轉監護人，再同社工傾佢之後住呀、成長呀、出路等問題。唉⋯⋯好煩呀⋯⋯」
 
我邊尼佢講邊一口氣飲晒杯奶，然後起身，講：「咁行啦！」
 
「吓？」Miss仲未get到我想點。
 
「去探你細佬呀！行啦！」
 
Miss都仲好似未get到，我就話：「我講過架嘛。我一定會陪住你架！就算我咩都做唔到，可以陪住你就得啦！行啦！快啲啦！」講講下，我自己都熱血起嚟。
 
Miss眼神一怔，似乎記起之前我講嘅說話，剎那間佢熱淚盈眶，卻又用微笑去壓住想喊嘅衝動：「下午先去咋，成日都咁衝動！低B仔！」
 




= = = =
 
Miss嘅心情好咗好多，估唔到我嗰種好傻好衝動嘅熱血都可以令佢精神起嚟。Miss話下午先去梓康嘅學校，所以上午時間想同我拍下拖relax一下。
 
啊⋯⋯！真係感動！我好耐冇拖住Miss隻手行街啦！對上一次認真咁拍拖已經係做完義工嗰日呀。其實我地拍拖都冇咩特別嘢做，只係好冇目的咁行。雖然都係kill下time等探佢細佬嘅時間到，但咁樣靜靜地一齊行已經好滿足。
 
行到咁上下Miss停低咗抱住個肚，皺起眉咁話：「嗯⋯⋯肚仔好似有啲餓添。」使唔使咁可愛呀？
 
正想我問佢想食咩時，啊！呢個女人忽然嬲爆爆咁自己行開咗。W撚TF?! 唉，天下間所有女朋友一肚餓時嘅理智呀、智力呀、自理能力呀就急降⋯⋯屌！即係要我諗食咩囉！
 
嘿，身為屎橋王嘅我點會難到我呀，我大叫：「盈盈！」
 
「哼！」
 
「我帶你食好嘢呀！」
 
Miss 嬲爆爆嘅樣漸漸露出歡顏。