真人真事改篇﹕師生戀﹕《最接近的陌生距離》: 第五十九章之四

 
剛才嘅風波引嚟好多人圍觀，加上Vick嘅出現，令Miss腦袋空白一片。Miss剩係諗點樣盡快離開現場，去最近最安全啲地方避開人群。所以最後我地返去學校。
 
好彩嘅係學校冇咩人，老師同埋校長一早走人，得返校工喺度。Miss帶咗我同黎Sir去醫療室處理傷勢。Miss全程唔出聲，搞到氣氛好令人唔舒服。我地去到醫療室，黎Sir比我傷啲，我扶佢坐埋一邊。呢個時候Miss已經拎咗箱急救箱嚟，正想幫我地處理下傷口。
 
由頭先喺街到呢一刻，Miss好似變咗第二個人咁，閒話唔多，手腳好快咁搵咗急救箱出嚟。我知佢情緒好亂、好差，想搵啲嘢忙下分散下注意。但礙於黎Sir喺度，我唔可以盡男朋友責任去安慰佢。
 
細佬唔生性差啲害佢被人迫娘為娼，然後又被人言語侮辱同輕薄，比著邊個都頂唔住啦。而我更是難受萬分，成個過程我咩都做唔到，用武力去救Miss都被人打到仆街。Vick嘅出現，更突顯我嘅無能！果然錢真係解決到好多問題。
 
提起 Vick⋯⋯佢一定下定決心追返Miss。我望住默默幫我處理傷口嘅Miss，水汪汪嘅雙眼隱含住我睇唔透、望唔穿嘅想法。我唔知Miss同Vick嘅過去係點，亦都唔知佢地係咩原因而分手。假如⋯⋯佢地感情好深，而且因為小事分手，咁樣我未⋯⋯？！




 
「做咩呀？」Miss好輕聲同我講，感受到我嘅擔憂。
 
我搖搖頭，用唇形無聲地講：「我愛你。」
 
Miss微笑一下，就幫黎Sir處理傷口。
 
「呃⋯⋯呃⋯⋯唔⋯⋯唔使啦⋯⋯我自己嚟⋯⋯」黎Sir第一次感受到Miss嘅溫柔，即刻暈晒浪，語言能力大幅下降。
 
「當係我報答你啦。頭先唔該晒。」Miss真心答謝黎Sir：「其實頭先好危險架！嗰班人係黑社會，唔講道理架。你唔應該冒呢個險。幫我地報警就夠啦。」




 
「呃⋯⋯其實話報警都係呃佢地。阿匡著住校服，如果上咗差館就好麻煩。」黎Sir嘅廢話mode又開咗：「你知學校想點對阿匡架啦。我擔心學校唔理佢係咪受害者，上差館會影響學校形象，我怕又有藉口比學校趕走阿匡。」
 
「嗯，你有你道理嘅。」Miss點頭，面露感激表情：「不過都唔好以身犯險啦。」
 
「我冇辦法呀。一個係我學生——」
 
 
.
 




 
「——一個係你呀嘛。」
 
 
.
 
我瞪大對眼！呢個傻佬講咩呀？我識佢咁耐，呢啲懶浪漫嘅嘢絕對冇可能喺佢把口講出嚟架喎！難道⋯⋯佢真係聽我講好好修煉媾女嘅「說話藝術」？
 
不過好彩嘅係Miss呢刻心情差，其實都冇在意黎Sir呢招突擊，淡淡咁講：「嗯，多謝。」
 
Miss處理好我同黎Sir嘅傷口後，就默不作聲地離開醫療室。睇嚟Miss嘅情緒已經到咗臨界，佢好想出去抖下氣。
 
我冇追出去，以佢性格佢需要啲時間同空間去冷靜。我同黎Sir留喺醫療室，空氣中彌漫住好愁嘅氣息。我同黎Sir心情都非常之愁。
 
「愁乜鬼呀你。」我揶揄黎Sir:「Miss Wong幫你包紥。益你啦！」




 
「我知呀。我應該開心先啱。識佢咁耐，今日唔只同佢講得最多嘢。佢仲好感激我為你地挺身而出。」黎Sir眼神呆滯定喺一點。
 
「係囉，都唔知你愁乜鳩。」
 
「冇行啦⋯⋯」
 
「嗯？」
 
「我冇行啦。Miss Wong原來已經有男朋友。」
 
我擦一擦鼻子，壓住驕傲嘅語氣講：「係呀！你死咗條心把啦。」
 
「有男朋友都算。佢前度⋯⋯真係好勁。而且佢仲想追返Miss Wong添。」
 




聽到呢度，我同黎Sir不約而同咁「唉⋯⋯」一聲。黎Sir聽見後，奇怪咁望住我：「你唉咩呀？都唔關你事。」
 
我望住黎Sir，聳一聳肩，都唔知點答佢。只感覺到呢刻我同黎Sir關係好微妙。佢係我情敵，但我地卻為咗同一個原因而一齊嘆氣，我都唔知呢啲係咪叫同病相憐。情緒對推動之下，叫我好自然地向黎Sir擺出拳頭——
 
「brother。」
 
我都唔知自己點解咁做。可能我真係被Vick影響得好down， 如果阿偉喺度⋯⋯係呀，原來我需要兄弟！眼前嘅黎Sir，係我惟一嘅精神寄托，即使佢係我情敵，但呢刻嘅情緒只好依賴佢。
 
黎Sir望到我拳頭後就笑一笑。
 
 
.
 
「brother！」
 




碰拳。