真人真事改篇﹕師生戀﹕《最接近的陌生距離》: 第五十九章之三

點解佢會喺呢個時候出現架？有冇咁啱呀？唔只係我，連Miss都好驚訝。此時Vick眼神一厲，盯住囂張跋嘅西裝男。
 
「哼！又一個架樑！」西裝男兩手一揚，身邊兩位惡漢即時向Vick施襲！
 
然後我眼前一花，三個人影擾攘幾下，就聽到兩把男人痛叫嘅聲音，兩個大隻惡漢已經喺地下典下典下。神氣嘅阿Vick絲毫無損，默不作聲咁盯住個西裝男。
 
呢個阿Vick會唔會太勁？唔止有財力，仲有武力。好記得佢講過喺LA讀書時成日打交，睇嚟佢唔係吹水。此是我望去Miss度，雖然佢同以往一樣好厭惡Vick，但已經冇先前咁恐懼，表情都變得複雜起嚟。
 
Miss⋯⋯呢刻到底諗緊啲咩呢？
 




「係咪要錢呀？！」Vick緩緩走近西裝男，氣勢已經輾壓晒所有惡漢！
 
「五十萬！有定冇呀？」西裝男見識Vick嘅武力後亦唔敢輕舉妄動。哼！欺善怕惡嘅人渣！
 
「五十萬咋話？」Vick冷冷一笑，喺西裝褸裡面拎咗本支票簿，再喺其中一張撩咗幾下。嘶——一聲，豪氣地撕出一張支票，冷冷同西裝男講：「以後唔准騷擾呢位小姐！」
 
「㗎㗎㗎——！」西裝男滿意一笑，上前想拎走Vick嘅支票。
 
然而喺西裝男伸手一刻， Vick手一揚故意唔比西裝男拎走支票。西裝男心下有氣，眼神厲起，卻又唔敢發難，只暗暗咁講：「你想點呀？」
 




西裝男話音剛落，就——啪！一聲！Vick一巴車咗落呢條人渣度！
 
「仆街呀！」西裝男怒吼，卻——
 
啪——！啪——！啪——！Vick足足摑咗佢四巴掌！雖然我對Vick冇好感，但呢個畫面真係大快人心！
 
西裝男被Vick摑到口腫面腫，但怯於Vick嘅氣勢，佢只好敢怒不敢言！Vick冷冷地講：「知唔知要講啲咩呀？」
 
「多⋯⋯多謝⋯⋯」
 




啪——！又一巴掌！明顯答錯。
 
「道歉。」Vick冷漠得嚟有一種輾壓人嘅感覺。說話都變得簡潔。
 
西裝男雖萬不願意，但仍然烚熟狗頭咁同Miss講：「黃小姐，對唔住！」
 
西裝男喪家狗咁對Vick點頭，伸手將要拎起張支票時，Vick食中二指一鬆，張支票就自由飄落喺地上。
 
西裝男嬲到瞪實Vick。Vick冷笑咁講：「要面就唔好執囉。」
 
「我實搵人斬你死你！」
 
Vick聞言輕輕一笑，環視一眾惡漢，大聲咁講：「邊個幫我郁佢嘅！我即刻比20萬佢！」再對西裝男話：「睇下你吹雞快啲定我快啲。」
 
「你⋯⋯你好嘢！」西裝男無何奈何，只好彎身想執起支票。




 
然後Vick卻一腳踩住張支票，明顯Vick意猶未盡，要一再羞辱西裝男。
 
Miss自然知道Vick唔會咁易罷休，叫道：「Vick，收手啦！」Miss環視一周，見圍觀嘅人愈來愈多，面露不安神色。
 
Vick聽到Miss講之後，就鬆開隻腳，一面鄙夷咁望住西裝男。連番受辱嘅西裝男雖心有不甘，但面對財雄勢大嘅Vick後佢自知糾纏唔到落去，只好拎埋支票帶埋啲手下落慌而逃。
 
班壞人走晒之後，Miss扶返起倒地受傷嘅黎Sir，憂心咁講：「黎Sir你點呀?冇事嘛？」
 
「冇⋯⋯冇事。皮外傷啫！」
 
Vick亦都走嚟，拍一拍我肩，友善咁講：「細路你冇事呀嘛？識得保護女人，叻仔呀。」
 
Miss見佢主動撩我講嘢，冷冷咁代我答Vick：「佢冇事。」
 




「咁你呢？有冇事呀？」Vick對Miss嘅態度好溫柔，溫柔中亦帶點憂心：「頭先班人有冇對你做啲咩？」
 
「冇。」
 
「你學生同朋友都受咗傷，我送你地去醫院呀。」
 
「唔使。」Miss已一手拉住我，另一手拉住黎Sir，冷冷同Vick講：「嗰五十萬我一定會還返比你！」然後轉身帶埋我同黎Sir走。但係Vick好快從後追返上嚟，擋住我地嘅去路。
 
「盈盈，我好想同你傾下？」
 
「我地冇嘢好傾呀！」
 
Miss繞過Vick繼續行，但又被Vick截住。
 
「盈盈！你見唔到我嘅誠意咩？！我一早甩晒其他女人嘅關係啦！我地再重新開始呀！好唔好呀？」




 
「我唔想傾呀！我地完咗好耐架啦！」
 
「你真係唔比機會我？定呢度唔方便傾？咁約個地方慢慢傾囉。」
 
Miss抖咗一啖氣，強作冷淡咁講：「我地唔需要傾！你死咗條心佢啦——」
 
 
.
 
 
「我已經有男朋友架喇！」
 
 
.




 
 
Vick一怔，黎Sir瞪大隻眼，我都比佢嚇親。Miss呢下炸彈一嘢炸死三個男人！我心諗Miss唔係癲到即場公開我同佢嘅關係掛？Vick呆咗一秒，眼神落咗去黎Sir度，似乎誤會黎Sir就係Miss嘅男朋友。然後Miss冇再講啲咩就繞過Vick離開。