真人真事改篇﹕師生戀﹕《最接近的陌生距離》: 第六十章之一

喺醫療室抖咗陣，覺得係時候離開學校。由於Miss一直冇返過嚟，我有少少擔心佢。黎Sir更加唔使講，佢好想借機會媾Miss，呢條傻佬真係比以前進取咗好多。
 
我點勸黎Sir走都勸唔掂，最終變咗我同黎Sir喺學校周圍搵Miss。忽然間，我靈光一閃，就知Miss會匿喺邊度。為咗洗開黎Sir，我故意扮打電話比Miss，特登做個樣出嚟比黎Sir睇。
 
「Miss Wong, 你喺邊呀？我同黎Sir搵緊你呀。」
 
黎Sir見我「打」到比Miss，好緊張咁上前，想偷聽我地講嘢。我張一張手叫黎Sir唔好擔心，黎Sir又真係好聽我講冇行上嚟。
 
「哦⋯⋯哦⋯⋯係。知道⋯⋯咁⋯⋯⋯知道！我返屋企先啦。嗯，bye bye!」我背住黎Sir講，費事我表情出賣咗自己。我扮收線後立時轉身同黎Sir講：「阿Sir唔洗搵啦！」
 




「佢走咗啦？」
 
「係呀！」
 
「又會唔講聲嘅？」黎Sir好擔心咁講。
 
心諗你邊位呀？ 我繼續講：「佢心情差，想靜下掛。」
 
「都係嘅⋯⋯嚇都嚇死啦。」黎Sir點一點頭，卻又恍然大悟講：「唔係喎！萬一班壞人未走咁未好危險囉！」
 




「係喎！」我就係等你講呢句呀！於是我故作緊張咁講：「咁點算呀？黎Sir！」
 
「佢有冇話佢去咗邊呀？」
 
「佢話返緊屋企，平時佢會坐港鐵返去架！」
 
「哎吔！即刻頭先撞到壞人嗰度？！佢應該唔係行得好遠嘅！」黎Sir bye bye都冇講就跑開咗，但跑唔夠幾步就回頭命令我：「喂！你快啲返屋企呀！」
 
「哦！知道啦阿Sir!」望住黎Sir嘅身影消失喺我眼前，我滿意咁笑一笑。好彩黎Sir夠戇直，信晒我講嘅嘢。但亦都因為呢份單純，佢救我同Miss嗰時真係好勇，話做就做，冇諗過後果。黎Sir對Miss真係好真心，萬一⋯⋯哈哈⋯⋯唔會掛？
 




黎Sir比我水開咗後，我就繼續去搵Miss。我去到自己班房，見課室門半開半閂，就知道同我估計嘅一樣。當我走入班房，聽到陣陣嘅飲泣聲，我就暗暗咁講：「果然！」Miss真係嚟返4A班房。
 
「盈盈？」眼下四周好暗，空無一人，啲飲泣聲好似憑空出現咁。
 
我隨啲喊聲去尋找Miss嘅位置，最後我嚟到班房後方，Miss喺正最角落嘅座位旁，抱住膝坐咗喺地下。兩手掩面飲泣緊。Miss成個人縮埋咗，啲枱櫈就好似草叢咁，遮住咗呢隻受傷嘅兔仔。
 
我冇嗌佢，只係默不作聲地行近佢，坐喺佢身邊。Miss知道我嚟咗，啲喊聲開始大，就好似搵到個情緒著力點，終於可以冇顧慮咁釋放情緒。
 
Miss離家五年，家庭早已變得支離破碎。惟一仲可以維繫到屋企嘅，就係佢內心對家人嘅情。然而，呢個破碎嘅家庭就好似解咗體嘅船，各個破碎嘅船體喺驚濤駭浪上飄離緊，或者沉沒落海底。Miss就喺風雨中奮力咁拉住飄走緊嘅船體。
 
此時此刻，我望實壁報中嘅班相，我就知道4A班係佢惟一避風港。所謂嘅「家」得佢一個人住，教員室冇人鍾意佢，惟有4A班先令佢唔覺孤單。唔只係因為有我，亦係因為我地呢班馬騮仔。
 
我輕輕搭住Miss膊頭，溫柔咁抱住佢。Miss慢慢挨落我肩膀上繼續喊。佢喊咗大約兩分零鐘後，情緒漸漸平靜落嚟。
 
「Sorry⋯⋯」Miss輕輕撫著我手背上嘅傷，哽咽地說：「我又比麻煩你啦⋯⋯」




 
「冇呀。你冇麻煩到我呀。」
 
Miss搖搖頭，流著淚：「因為我，你冇晒朋友。亦都係因為我，搞到你今日比人打！」
 
仲有之前被周Sir迫害⋯⋯其實我知，呢段師生戀帶比我嘅影響已經一早出現，未來亦只有更多更難更痛苦嘅問題發生。
 
「我唔想影響到你呀⋯⋯嗚⋯⋯我係你嘅老師呀！我係應該教導你、幫助你成長架嘛！但係我⋯⋯我成日阻礙到你成長⋯⋯我⋯⋯我實在⋯⋯嗚嗚⋯⋯」
 
我將Miss抱埋嚟，深深喺佢額頭錫咗一啖，彼此都冇講嘢，只聽見Miss嘅飲泣聲。我唔知要點安慰佢好，因為我自己都好亂，亂嘅原因就只有一個——Vick。
 
我應唔應該慶幸Vick及時出現救咗Miss呢？的確如果冇Vick，Miss一早被人迫咗去做雞。即使唔係都好，都一定上硬差館，咁又係死路一條。Vick嘅出現，誇張啲講，係一個眨眼之間就解決咗個危機。佢唔只有錢，仲好好打添，權財勢佢全部都有，Vick真係保護到Miss。
 
我最愛嘅女人竟然要由其他男人嚟保護，一種無力感油然而生。我好似預視未來阿Vick一定會用盡好多攻勢追返Miss返嚟，面對咁強大嘅情敵，我可以點樣應對？
 




= = = =
 
「究竟可以點做呢？」我望住挨喺我膊頭上嘅Miss，輕聲咁講，呢個問題由離開學校一直問我自己問到呢一刻。Miss嘅煩惱、Vick嘅進擊、我嘅無能⋯⋯唉⋯⋯
 
而家其實我身處喺Miss屋企，今晚去咗佢屋企瞓。
 
今日係好唔愉快嘅一日，喺課室搵返Miss後，我地默默坐咗成個鐘，最後Miss話攰，要返屋企休息。當時見佢個樣咁頹，我就放心唔落。於是我又搵家姐幫忙，同老豆老母講今晚會去家姐個宿舍度屈蛇，所以我而家先可以陪住Miss。
 
「你瞓唔著呀？」喺我懷中嘅Miss輕聲咁講。
 
「你冇瞓到嘅？」我以為佢瞓著咗，驚訝咁問。
 
Miss起一起身，正面對住我，語氣忽然嚴肅起嚟：「你唔開心。」語帶哽咽。
 
我都未應得切Miss，佢就閉起雙眼錫咗落嚟。Miss好進取，佢燙辣誘人嘅舌頭已經鑽咗入我嘴巴入面。而佢隻手更伸入我褲内，刺激我下體。我倆體溫立時上升，慾火焚身，邊熱吻邊互相愛撫。




 
然而，我卻感覺到Miss呢一刻唔係純粹滿足大家嘅需要，佢更似係想安撫我。佢比以往更主動，更媚態萬千，當刻嘅佢唔似Miss Wong，更唔似黃梓盈，婉如變成另一個人。