真人真事改篇﹕師生戀﹕《最接近的陌生距離》: 第五十九章之二
「得得得！我最聽老師話架啦！」西裝男笑住張起手，示意惡漢停手。
Miss又驚又嬲，喊到氣喘，一時講唔到嘢！西裝男吸咗啖煙，又好無賴咁又對Miss吹煙，張起一口煙屎牙講：「嗱，黃小姐。我就做生意嘅。你細佬幫我打得工，就要規規矩矩！」
做生意？睇呢班人兇神惡殺！絕對唔係做合法嘢啦！
「但係仆你個臭街！琴日你細佬幫我走緊批貨。佢一個屈尾十，就將批本來屬於我嘅貨轉左手，佢自己就食咗個差價！」
「咁你問佢拎返啲錢囉！我教書架咋！」
「你條死蠢閪！拎得返就唔使問你拎啦！一口價，五十萬！有定冇？有就即刻放你細佬走！」
「五⋯⋯五十萬？！」Miss嚇到眼突，梓桓真係衰撚到舊數未清，而家再整多條數比Miss歎！照咁睇嚟，分分鐘梓桓想快啲清咗之前條數，所以食咗人地夾棍呀！
「冇呀？」西裝男目露凶光，對住電話大嗌：「同我打！」
「唔好呀！！」
「啊———！家姐⋯⋯家姐⋯⋯救我呀！啊——！」
Miss急到剩係識得嗌，而我⋯⋯啊——！可惡呀！我咩都做唔到呀！
「停！」西裝男一聲令下，電話傳嚟嘅打鬥聲即時停止，只聽到男人嘅痛苦嘅呻吟聲。片刻之後，電話傳嚟Whatapps提示聲，西裝男收到一張照片。此時西裝男向Miss展示whatapps裡面嘅相，Miss即刻喊到失晒聲！
「你地唔好咁過份喎！你地求財啫！使唔使打到我細佬咁樣呀？」
「我唔同你浪費時間，五十萬定係你細佬隻手？三聲後你要答我！一！」
「我而家邊有五十萬呀！」
即使呢班人唔係加害於我，但我都感受到當中嘅壓迫感！感受到Miss嘅恐懼同無助！
「二！」
「家姐！家姐！救我呀！搵老豆！搵阿媽都得架！老豆分咗層樓比佢架嘛！⋯⋯啊！唔好呀！大佬唔好打呀⋯⋯唔好呀！」
「唔得呀！梓桓你點可以——？！」Miss對呢個細佬真係傷心到爆，死到臨頭仲想拉埋老母落水！
「咦！我好似聽到啲好有趣嘅嘢喎！」西裝男對Miss笑咪咪咁講：「你老母原來有層樓架？咁你識做啦！」
Miss嘅淚眼閃過怒意，堅決咁講：「唔得呀！如果我細佬犯咗法嘅，你應該去報警！而唔係走嚟勒索我呀！」
西裝男攤一攤手，就話：「咁即係冇得傾啦！」佢再對電話講：「喂屌你老母！想要手定腳呀！」
「家姐！你真係想我死呀！佢地⋯⋯佢地而家想斬我呀！」
「停手呀！要錢咋嘛！我⋯⋯我⋯⋯」Miss緊閉兩眼，佢一定考慮緊惟一可以救到子桓嘅方法——阿Vick！
然而西裝男上下打量Miss後，突然揚起令人不安嘅笑臉。佢似乎睇中咗Miss嘅美貌！
「唉！算啦！睇你咁後生就出嚟教書，都唔慌有錢架啦。不如咁啦⋯⋯嘿嘿嘿⋯⋯」西裝男突然釋出善意一定唔慌好嘢！西裝男緩緩上前，揚起噁心笑意，話：「你都唔想細佬少咁忽架啦！我有份兼職比你，睇下你有冇興趣啦？」
兼職？咩兼職呀？Miss都知唔係好事，狠狠咁盯實西裝男。而西裝男見佢又驚又嬲，佢嘅笑聲慚慚猥瑣起嚟，竟然一再上前，上下打量Miss嘅身材，就話：「我最近開咗個Spa場，過嚟幫我手呀。女教師為咗細佬下海，幾夠綽呀！實大把人幫襯呀！到時你細佬條數實好快搞掂啦！」西裝男講完之後，周圍嘅惡漢一同大笑。
仆你個街！條友想推Miss落火坑？！
我已經握實咗拳頭，就嚟按奈唔住！
Miss聽到佢咁講都嚇咗一跳，連忙後退，直至撞到背後嘅惡漢先停落嚟。此時西裝男已舉起手，輕輕咁托住Miss下巴，笑淫淫咁講：「啊！生得真係靚！又夠大波！落去做之前，不如今晚陪咗我先啦！」
Miss嚇到緊閉雙眼，佢唔可以發難反抗呢個噁心嘅猥瑣男人，難道就咁閉眼忍受被人輕薄？
屌你！我唔撚忍呀！我點可以眼白白睇住自己女朋友比人非禮架？！
「唔准掂Miss Wong呀！」我一聲怒吼！就拔足衝上前！右拳已蓄勢待發！
Miss聽到我叫時即刻張開雙眼，佢連忙搖頭，嘴巴仲未嗌停我之時，我已經被身邊而嚟嘅勁力撞低咗！喺我天旋地轉之際，赫見一輪拳腳如雨咁灑落我身上！劇痛難擋之下，我只識得連聲呼叫！
然後呢輪圍毆卻維持數十秒，因為我聽到一把男人聲將呢班人喝停晒！
「停手呀！我報咗警架！」
呢把聲好熟，我抬要張眼，只見一個高大又熟悉嘅身影擋咗喺我面前！直至Miss將我扶起時，我先知道呢個咁Man咁勇敢嘅男人就係黎Sir！
頂呀⋯⋯佢呢刻個背影好似識發光咁！救世主呀！但——
「你地頭先打人唔啱架！你地知唔道知道係犯法架！嗱！我已經報咗⋯⋯」
唉屌你個黎Sir⋯⋯又做口水佬！明明出場咁撚型，啲老黑見佢身材健碩以為好揪得！點知原來係——
「郁佢！」
原來係戇鳩！仲唔圍毆你咩？！
事情一發不可收拾！我同Miss驚到震晒，啲惡漢打完黎Sir之後，再對我地目露凶光！正盤算點教訓我地！點樣迫Miss就範！
西裝男亦唔再怕被路人圍觀，囂張跋扈地同Miss講：「嗱！臭閪！五十萬！一係即刻磅水！一係而家跟我走。否則我就將你細佬逐件寄返去你屋企！」
西裝男步步進迫，我同Miss只好無助咁後退，直至——
.
「想要錢啫，唔洗蝦女仔呀嘛？」
.
又有一把男人嘅聲介入喺呢次危機之中。然後有一個身形健碩嘅男人從我後面行上嚟。當佢同我地並排企時，嗰個男人溫柔咁對Miss講：「盈盈你冇事嘛？」
我望住嗰個男人，心諗救星到，但呢位救星同時令我感到極度不安！因為——
「阿Vick？」Miss驚訝地瞪眼！