真人真事改篇﹕師生戀﹕《最接近的陌生距離》: 第五十九章之一

仆街——！Miss最驚嘅嘢終於發生咗！佢個垃圾細佬嘅債主追數追上門呀！
 
我好驚呢班男人會傷害Miss! 喺恐懼同擔心之下，我最終生出一絲勇氣，踏前一步叫咗聲：「Miss Wong！」
 
六個男人！十二隻眼即時望住我！令我瞬間石化！
 
「低B仔！」Miss叫喊，連忙搖頭，示意我唔好埋去。
 
呢班惡漢見我係細路仔都廢事理我，領頭嘅西裝男繼續揚起邪惡嘅笑意：「黃小姐，唔使驚喎。我想同你傾下生意啫。」
 




「傾⋯⋯傾咩生意呀⋯⋯我都唔識你地嘅!」
 
西裝男望一望周圍包圍Miss嘅惡漢，就故作教訓咁講：「你班閪仔見女就圍！嚇親人啦！全部同我散開！」
 
惡漢緩慢退開，其實西裝男唔想太顯眼，免得被路人報警。其中一個惡漢走嚟仲撞我一下，成座山咁企喺我身後！我唔知佢想點，亦唔知佢會做啲咩嚟傷害我！一陣寒意由尾龍骨發緊出嚟！
 
「我唔會幫我細佬還錢架！你死咗條心啦！」Miss儲夠勇氣，喝斥西裝男。
 
 然後西裝男嘶啞一笑，就話：「咩還錢啫？你細佬都冇問我借錢⋯⋯嗱！呢張係我卡片。」
 




Miss一面驚訝，眼前嘅西裝男居然唔係細佬啲債主？Miss望一望西裝男嘅卡片，唔打算拎嚟睇，佢一直瞪住個西裝男，既惡又驚咁講：「咁得啦！我都唔識你！你唔比我走就報警架！」
 
「𠹳𠹳𠹳𠹳⋯⋯！」西裝男嘶啞一笑，好似有啲欣賞Miss嘅膽色，只見佢打咗一記響指，佢身邊其中一位惡漢就遞咗陪電話上嚟，西裝男對住電話講：「同你家姐講兩句啦。」
 
西裝男開咗個speaker， 向Miss 遞起電話，傳出一把慌張嘅男人聲：「家姐！救我呀！今日找唔到條數佢地唔放過我架！」
 
Miss好想出聲，但見佢好似忽然諗起啲嘢，就強行冷靜落嚟，厲聲就話：「哼，點證明係我細佬呀？你搵人扮我細佬把聲嚟勒索我都得架啦！」
 
好彩呢一刻Miss都仲可以鎮定到。西裝男嘅笑意更濃，仲帶多咗份欣賞，拍一拍手，就指一指Miss冇講啲咩。然後西裝男對電話講：「喂！你家姐由得你死呀！」
 




「家姐！救我呀！佢地真係會斬死⋯⋯嘩⋯⋯呀！唔好打呀！啊——！」
 
電話傳嚟拳腳交加嘅聲音，配上男人絕望嘅慘叫，我旁邊聽到都心寒起嚟。然後Miss仲保持冷靜，諗緊點拆招。過咗冇耐，西裝男嘅電話傳嚟Whatapps嘅提示，佢撳開個Whatapps，向Miss展示出一張相——一張成面瘀青嘅男人相！
 
Miss一望，即刻「噫——」一聲，兩眼通紅，驚到想喊出嚟！證實咗電話另一邊嘅男人就係細佬黃梓桓！雖然Miss好憎呢個垃圾細佬，但講到尾都係親人！而且呢班惡人絕非善男信女！而家可以打到梓桓豬頭咁，下一秒真係唔知會唔會斬埋佢隻手落嚟！令Miss終於冷靜唔到，兩眼淚水奪眶而出！
 
「你想要錢之嘛！使唔使打人呀？！」
 
「打人？算便宜佢啦。佢欠我嘅嘢，一隻手一隻腳都唔夠賠啊！」
 
「咁你想點呀？！你要點先肯放人呀！」
 
西裝男點起煙，特登走近Miss面前對佢吹出一口二手煙。呢下我唔忍，我本能之下叫道：「唔好搞Miss Wong——嘩呀！」然而一句未講完，我身後嘅惡漢就一腳將我踢低！
 
「匡！」Miss Wong 氣急敗壞咁同西裝男講：「唔准打我學生呀！」




 
「啊哈？老師嚟喎！」西裝男冷笑幾聲就同其中一位惡漢講：「聽唔聽到Miss講咩呀？唔好搞佢個學生呀！扶返起個細路啦！」
 
「係！」
 
我身邊嘅大漢即刻的返我起身，西裝男繼續講：「人地個學生比你搞到成身灰塵呀，幫手拍返乾淨啦！拍！乾！淨！啲！呀！」
 
西裝男一句講完，我即時混身痛楚，正正被惡漢以拍乾淨個身為名，實際係連番咁拍打我心口同背脊！
 
「停手呀！」Miss急到喊晒口！