真人真事改篇﹕師生戀﹕《最接近的陌生距離》: 第五十八章之四
禮堂嘅聖誕Show完晒之後，就係班房活動。Miss訂咗pizza比全班食，又一齊玩下game，成個氣氛都好開心，好有節日嚟之前嘅輕鬆愉快。不過我同Miss卻唔可以盡興，我扮下投入同同學玩game，而Miss就行去窗邊望遠景。見佢心事重重，我就唔想再扮落去，靜悄悄咁行到佢身邊。
「你去同朋友玩啦，唔使理我。」Miss兩眼望住遠景，語氣憂愁。
「你做咩事呀？」Miss情緒變得好down ，搞到我好擔心。
Miss歎咗口氣，再對我強顏歡笑，話：「呢度唔方便傾呀。返去同朋友玩啦。」
我知佢因為頭先阿波嘅事而唔開心，同時又明白我地呢刻唔可以太親密，佢先對我咁冷淡。
我望下四周圍，見冇同學喺我同Miss附近，就細細同佢講：「放學一齊走？」
「但係要等我做埋啲嘢先喎。」
「冇問題，我等你呀。」
Miss對我微笑，眼神示意我快啲返去同朋友玩。我當然唔想啦，女朋友唔開心，梗係想陪佢耐啲嘛。然而，呢個時空、當下嘅環境同人物，卻令我地彷彿隔住咗個鴻溝。
雖然同Miss一齊咗兩個月，我地都好明白喺學校係唔可以太親密。但呢一刻嘅距離態係前所未感受過。彷彿呢兩個月出現嘅問題同危機都只係熱身，真正嘅難關今日先開始。Miss 同我正正就係有呢種預感。
喺望住Miss嘅笑容漸漸收起之時，班房後邊有一把聲傳嚟：「Miss Wong！ 一齊過嚟玩呀！」
我同Miss一齊望去聲音來源，見到成班同學已經圍成一圈（惟獨阿波缺席，佢應該去咗「空中花園」散心。）
「唔使啦，我睇你地玩呀。」Miss雖然笑住講，但係好冇精神，佢又被負面嘅情緒支配住。
此時，我靈光一閃，諗到方法令Miss打起精神，忘形地捉住Miss隻手叫道：「過嚟呀！」
「喂！」Miss好驚我地嘅動作太親密，連忙細細講：「快啲放手啦。」
「睇住我地玩邊開心架！跟埋嚟一齊玩啦！」我唔理咁多！只要可以令Miss打起精神嚟就夠！
我拉住Miss坐去遊戲圈當中，班手足見到我埋班之後就歡呼四起，因為由中一到而家，佢地都好明白只要有我主持嘅遊戲就必定好玩。我行到遊戲圈嘅中心，環視一眾同學，亦見到Miss對我投下懷疑嘅眼神，大概心諗我又想搞啲咩花臣出嚟。
「難得Miss Wong都一齊嚟玩，不如我地玩特別啲囉！」
「有咩特別野好玩呀？」其中一位同學好期待。
「扑！傻！瓜！」我好自豪咁講，但——
「屌——！」坐班不約而同咁爆粗喝倒彩。
「喂—！ 係咪想全班記小過呀？」Miss 一聽到粗口自然著晒機啦，成班同學即刻收斂。
我繼續講落去：「都話咗玩特別啲囉！呢個「扑傻瓜」正式名稱叫『暴力扑傻瓜』。」
其實玩法同普通版一樣，坐喺度嘅人要設法保護自己，喺自己被「鬼」扑時，嗌其他人嘅名，等隻「鬼」打唔到被叫名嗰個。但今次玩法唔同，不論做鬼嘅定坐喺度嘅同學，所有人都會拎住碌棍。當有人被「鬼」扑中後，佢旁邊嘅人都可以上前圍毆佢。
成班手足聽完我解記後就異常興奮，惟獨Miss個樣好想鬧鬼我又諗埋啲屎橋，佢應該擔心會玩出禍嚟。
喺開始前Miss就話：「個遊戲都有危險性，但今日係Christmas Party我唔想掃大家興。如果一陣失控嘅，我會立即中止遊戲。」
Miss講完之後，好惡咁厲我一眼。我對佢傻笑，因為佢呢個反應總好過頭先望遠景咁悶悶不樂。
我身為主持，自然做第一個「鬼」。我拎住由舊報紙捲成嘅棍喺圈中徘徊。當我搵到第一個目標時，對方就即刻嗌第二個同學嘅名，令我即時轉身去打另一個目標。如是者，我好似被操控嘅人偶喺圈中來回咁走，直至——
「啊———！Miss Wong!」原本將會被我打嘅同學即時將厄運轉嫁落去Miss度！
係！我為咗令Miss打起精神，我等呢個機會好耐！一於令佢更緊張更驚，所我好兇狠咁撲到Miss而前，起手就———
「!」Miss 眼神一厲！
我嚇到停咗落嚟！Miss呢個時候竟然眼神制敵！佢翹住手，女王氣勢突然暴現！佢眼神更彷彿同我講——
.
「夠膽你就打落嚟！」
.
我⋯⋯我邊夠膽呀⋯⋯
但係！如果我唔打落去，啲同學覺得我偏心，會懷疑我地有嘢喎！
所以——啪⋯⋯！我好輕力咁拍咗Miss膊頭一下。Miss 身邊嘅同學即時起手，準備圍毆佢！
「等陣！第一回合熱身啫！等Miss習慣下嘛！」Miss身邊嘅同學冇打落去，Miss就對我揚起一個意味深長嘅微笑。其實頭先我打得咁慢，就係想Miss可以叫另一個同學個名。但佢冇咁做，即係話⋯⋯Miss特登輸嘅？
「好！係咪到我啦？」Miss忽然收起女王氣勢，變得好似大姐姐咁歡容。佢起身嗰下除咗順手拎走我碌棍，我同佢仲眼神交接，我好似感覺到佢眼內蘊釀住惡意嘅趣味。
點知⋯⋯我坐都未坐穩——
「123！」Miss Wong好快數3聲開始！
啪——！我聽到好大嘅拍打聲，然後頭頂一痛！緊接住正係一連串嘅拍打聲，身體各處傳嚟陣陣痛楚，正係我被身邊嘅同學圍毆緊！
棍花散開，我天旋地轉之際，見到Miss好滿足咁笑。我就知道佢頭先趁我未坐穩就打落嚟，啲同學見我中招就即刻上前圍毆。
睇到Miss笑意盈盈，佢似乎感受到呢個遊戲好玩嘅地方喺邊——展現男朋友嘅人際「魅力」！唉⋯⋯未就係咁囉！成個遊戲好成功咁令我成為眾矢之的⋯⋯唉，Miss真係S架，佢好鍾意睇我點比手足蝦！
最慘係我同手足感情愈好，佢地就愈打得狠！因為激嬲我冇成本嘛。不過更重係，成班同學真係好錫Miss，每當有人嗌Miss名時，做鬼嗰個必定會放水。即使Miss作狀被人打中都好，旁邊嘅同學都係象徵式咁打咗下就算。有趣嘅係，玩玩下遊戲規則都變埋，大家都以保護Miss為己任，當Miss成為目標時，就衝出嚟被鬼打。
玩到咁上下，Miss好感受到佢班學生係幾咁愛佢。我更加想比佢知道，Miss即使面對緊狂風暴雨，唔只有我喺呢條船度。成個4A班嘅同學都陪緊佢。見到成班同學都咁錫自己，Miss終於好開懷、好真心咁笑。佢好感激咁望住我，係我令佢記起存在呢一班嘅意義。
「不如我地影張合照呀！」我拎起手機提議，已經走在眾人面前，準備自拍
「好呀！！」成班同學或做yeah 手勢，或做鬼面，或扮動漫人物。大家將Miss圍住喺中間，見眾人嘅眼神充滿喜悅同滿足，令Miss嘅笑容都變得開懷起嚟。
卡嚓——！時空定格在最開心嘅一刻。係呀， Miss Wong。你唔只對我好重要，你對我地成班都好重要。
= = = =
下午三點，行去港鐵站嘅路上。
「嘻⋯⋯哈⋯⋯哈！」Miss邊行邊睇手機啲相，笑得好開心，剛才Christmas Party嘅相，佢已經來回睇咗好幾次。
「盈盈，睇路呀。」街上人流唔算好多，但我好驚佢會撞到人。
由於呢排風聲緊，即使同Miss一齊走都好，我地都唔敢行咁埋。而家我同佢正正隔咗兩個身位距離。
「你而家開心返晒未呀？」
Miss對我翁一翁鼻做咗個鬼臉，但嘴角卻忍唔到甜蜜嘅微笑：「古靈精怪。哼。」
我笑一笑，呢一句算係佢對我嘅讚賞。
「嘻！低B仔！你睇下你！你被同學打到⋯⋯哎呀！」Miss正想舉起手機向我分享時，佢突然痛叫一聲，歡樂嘅氣氛即時煞停。
我應聲一望，原來係Miss唔小心撞咗落個男人度。個男人好似山咁大，Miss撞落去嗰下食返晒啲力，手機都揸唔穩，成個人仲後退咗幾下。
「Sorry呀！」Miss連忙道歉，正想執返部手機時——
躂——！個男人兜腳將手機踢開咗！
「喂！有冇搞錯呀？！」我指住個男人鬧！當我連忙幫Miss執返手機後，準備開個男人拖。但係——
.
對腳好似被無形嘅釘，狠狠咁釘落地下！
我想郁都郁唔到到！
.
一股恐懼無聲無息咁迫近，令我唔敢輕舉妄動！
因為喺我執返手機時，Miss已經被幾個惡形惡相嘅男人包圍！
「企開啲呀，細路！」其中一個紋身大漢對我厲咗一眼！
撞親人啫，洗唔洗咁惡呀？幾個男人兇一個女人？
Miss嚇到個人面都青埋，無助向我望過嚟！此時，我聽到又有一把男人喺我旁邊擦過——
「你就係黃梓盈呀？」
個男人身著西裝，身材比眾惡漢矮小，樣子都比較斯文，但頸上金鏈顯得佢一身俗氣，點都掩飾唔到佢身為打手嘅屬性。
西裝男走到Miss面前，把玩住長得離譜尾指指甲，𠹳𠹳𠹳聲咁笑住講：「我地公司呢排財困——」
.
「——你細佬話你可以幫到手喎——」
.
「——𠹳𠹳𠹳——！」
Miss嚇到兩眼通紅，唔敢正視面前嘅西裝男。佢閃縮嘅眼神最後定睛落我度。
但係我⋯⋯
我可以點做呀？！