真人真事改篇﹕師生戀﹕《最接近的陌生距離》: 第五十八章之三
今日係聖誕假前最後一日返學，學校搞咗聖誕party。理應係好輕鬆同開心嘅。但我心情難免被今朝七仔嘅事影響。即使眼前嘅聖誕Show幾咁好睇都好，我都冇晒心情。
我除咗擔心同Miss嘅戀情會曝光外，蟲蟲嘅亦事都令我好耿耿於懷——我搞到佢抑鬱症嚴重返，仲要成個星期返唔到學⋯⋯我要負好大責任。
「班長。」
「係⋯⋯係！」
我掛住諗今朝嘅事，諗到入晒神，要Miss叫我先識醒。
「到你出場啦。」Miss微微一笑，但眼內盡是擔憂，我有咩心事都逃唔過佢嘅法眼。
今日呢個Show係班際比賽。我同阿偉佢地由中二開始組band，我係主音同副結他、杰少係主結他、阿波係bass而阿偉就係鼓手同團長。
唔洗我講大家都知咩事，杰少同阿偉都唔喺度，自然有新成員加入頂替阿偉同杰少。即使阿波仲喺度，我同佢貌合神離，我地隊band一早唔以係前嗰隊。
音樂係最好嘅溝通語言，我地四兄弟兄默契喺音樂中表露無遺。但今日呢場show，我感覺琴好生硬嘅陌生感。阿波同新成員夾得好好，但偏偏我呢個主音就好似唔啱用嘅零件夾硬啪落去咁。一切都係因為阿波對我嘅冷淡態度，令我覺得我唔屬於呢隊band。
即使我地嘅表演贏到全校嘅掌聲，但夾成點我係知。返去後台時，兩位新成員同阿波傾返頭先夾成點。我想趁機會上前同阿波破冰，點知阿波佢瞄到我行緊上嚟時，阿波求其講咁個藉口想行開。
識咗佢咁耐，盲嘅都知佢想避我。我加快步伐，上前同佢並肩行：「波哥。」此時剛好打小息鐘，party中場休息，同學魚貫離場。
「係。」阿波瞄我一眼後，眼神有啲閃縮，最後先對我勉強一笑：「咩事呢？」
「想問返你覺得頭先夾成點之嘛。」我笑說，想令個氣氛唔好咁尷尬。
「都幾好呀。」
講完之後，阿波想轉身走。剛好Miss都嚟到，見佢手上拎住咗三份小禮物，就親切同阿波講：「阿波，聖誕快樂。呢啲係Miss Wong嘅心意，送比你架。」
然而阿波卻面有難色，佢唔覺意後退咗一步。佢身體語言明顯講緊佢非常抗拒。搞到Miss好尷尬咁笑說：「你可唔可以順便幫我比埋杰少同阿偉？Miss Wong⋯⋯好掛住佢地兩個呀。」
因為我嘅關係，Miss對阿偉佢地三個早已超出師生嘅感情，喺課後Miss早就當佢地係朋友。
阿波望住三袋禮物，唔識比反應。Miss疑惑咁望住阿波，笑容都勉強起嚟。然後阿波搖住頭，正當我想鼓勵佢收Miss準備嘅禮物時，阿波講咗句好令我同Miss感到詫異嘅說話：「唔⋯⋯唔好啦⋯⋯」
「嗯⋯⋯咁唔緊要啦。」Miss慘食檸檬，表現有啲尷尬。
然而阿波唔知發咗咩癲，情緒開始唔穩定起嚟，話：「⋯⋯你⋯⋯你地唔好迫我啦⋯⋯」
「阿波，你講咩呀？Miss Wong都冇迫你要份禮物。」我上前輕拍阿波肩膀，點知我呢下動作卻刺激到佢！
「都話咗唔好迫我呀！個個都係咁！」阿波無端端喊咗出聲。Miss察覺到阿波有異樣，正想開口追問之時，被阿波激動嘅說話截停咗：「你地想我點呀？已經避緊你地啦！仲走埋嚟！」
我意會到佢應該講緊我地四兄弟散晒呢件事！明顯發緊我脾氣！但佢無端端燒埋落Miss度時，我就按奈唔住，不滿咁講：「關Miss Wong咩事呀？佢一番好意送禮物比你！你鬧埋佢做咩啫！」
「阿匡！」Miss 喺旁邊即時撳停我。同時阿波都對我同Miss發脾氣。
「關呀！你地唔係一齊就一天都光晒架啦！」
屌！阿波眾目睽睽下咁樣講！即刻嚇到Miss面都青埋！
我即刻環視四周，好彩周圍冇人，壓低把聲屌鳩阿波：「你傻咗呀！咁大聲！」我唔止嬲佢講得咁大聲，仲嬲佢將不滿發洩埋落Miss度！
「唔好迫我呀！個個都係咁！」
「我同Miss Wong幾時迫過你呀？你唔想要份禮物未走開囉！」
此時，Miss走埋我身邊輕聲叫我。我見佢搖一搖頭，就話：「比阿波講埋落去。」似乎Miss知道阿波有啲苦衷。
「阿偉話冇兄弟做，咁未冇兄弟做囉！我可以點呀？未聽佢說話做囉！」阿波一邊講，一邊退後：「杰少講你地壞話呀，我話佢唔好再中傷Miss Wong呀！佢連我都嬲埋呀！我冇晒兄弟啦！冇晒朋友啦！」
我同Miss互望一眼，立即意會到原來阿波背後有咁大苦衷，頭先我仲好大聲鬧佢，搞到我心底愧意大作。可惜當我正想上前同佢道歉時，阿波情緒更激動，大嗌：「唔好過嚟呀！我咩都唔知呀！我唔講呀！唔好迫我呀！」
佢一邊退後一邊講：「你地個個都迫我！迫我同你地扮冇事！迫我冇兄弟做！仲要迫我爆你地嘅秘密！唔爆就飛我！我唔知呀！我唔識你地呀！！」
阿波一邊大喊一邊跑開。Miss望住遠去中嘅阿波，除了一面憂心外，仲有不解。
我歎咗口氣，輕輕講句：「我知咩事啦⋯⋯」
然後我同Miss解釋阿波一方面好聽阿偉話，冇兄弟做就冇兄弟做。搞到佢咁辛苦，全因為阿波仲當我係兄弟。亦都因為咁佢仲幫我守住同Miss拍拖呢個秘密。即使Apple用分手威脅佢，佢都仲死守住。
「所以佢寧願避開我同你。」Miss婉惜咁講。
我望住Miss，無奈地搖頭。一直以嚟，我以為愛情只係屬於兩個人嘅事。但愈喺呢條愛情路上奔跑時，愈發現呢段師生戀原來唔只係我同Miss嘅事。身邊嘅人亦都不知不覺間受到影響⋯⋯