真人真事改篇﹕師生戀﹕《最接近的陌生距離》: 第五十八章之二

 
「起身啦！低B仔！」
 
一大清早，Miss就send咗段錄音比我。聽佢把聲感覺好精神，佢應該心情好返啲。
 
我自拍咗張相send比Miss，然後幾秒後佢就覆返我「咁乖仔嘅？」
 
梗係乖仔啦，我唔只早起身，仲一早喺七仔揀緊早餐。Miss見我揀早餐後，就即刻whatapps我，想搭單買多份比佢。 個傻妹呢排懶瞓，成日瞓到過晒龍。Miss 而家就飛的返緊學校。
 
我買咗兩份早餐後，就去排隊比錢。唉⋯⋯搞乜鬼，今日七仔特別多人，個收銀應該新嚟，啲手腳慢到不得了，條龍去得妹慢。喺我排緊隊時，有把好熟嘅女仔聲喺我後面傳嚟——




 
「Apple，你仲信星座書？咪晒錢啦。」
 
聽把聲，似係杰少條女冬冬⋯⋯
 
唔係嘛，喺度撞到蟲蟲啲朋友？咁即係話，蟲蟲都喺呢度？
 
「唔係架！星座書起碼有9成係準！你睇下我同波波幾幸福就知啦！」Apple把聲咁八婆又咁大聲，似乎係特登比我聽到。
 
「咁剩低嘅一成呢？」冬冬啲語氣好做作，又係擺明想比我聽到。




 
「唉！咁就慘啦。之前本書就話，雙子座嘅女仔會遇到雙魚座啲男仔，本來以為係真命天子啦。點知原來係負心漢！」
 
雙⋯⋯子座？蟲蟲好似係雙子座。而我就係雙魚座。
 
「係呀？點負心法呀？」
 
「本身有女朋友，但好濫情！雙魚男對雙子女好溫柔。搞到個女仔鍾意咗個雙魚男。我地由中一就做姊妹架啦，好熟佢啦！係咪？雙子女莫講話叫佢信人呀！叫佢鍾意男仔都冇可能呀！」Apple愈講愈大聲，驚死我聽唔到咁。
 
「咦？佢唔係拍過拖架咩？」




 
「係，拍過。但都係快閃之嘛。點知佢今次第一次好認真鍾意人喎！不過星座書又好準嘅，個雙魚男真係對佢好好，比到安全感佢，咁又好難怪雙子女愛到不能自拔啦！」
 
「哎吔！雙子女好缺安全感架。有時連我地都唔信呀！」
 
「係呀！你諗下個女仔知知男仔唔開心，仲日日陪佢喎！哼——！到頭嚟得個吉！個男仔而家仲同緊女朋友一齊呀！」
 
「搞錯呀！仲同人Kiss！搞到雙子女會錯意啦！好心啲人有女朋友就專！一！啲！啦！」冬冬個尾句大聲到成間七仔都聽到。
 
我完全捱打，想反駁都唔得。事實上，佢地係講得啱，我係好濫情⋯⋯
 
「雙子女就慘啦，唔係早退就唔返學。請咗病假成個星期啦！」
 
「唉⋯⋯人地細細個就被屋企人虐待。平時見佢咁惡，都其實心靈最脆弱。聽講佢啲抑鬱症係呢一年叫好返少少咋 ⋯⋯Apple呀，佢同渣男一齊時真係開朗啲架。開口埋口都提起個賤男！但而家又⋯⋯唉！」
 




此時我一怔，好想立即轉身問佢地蟲蟲而家點！但係⋯⋯佢地咁敵視我，所以一定唔會同我講。
 
「佢以為見到希望，以為真係有人錫佢。唉⋯⋯冬冬呀，你知唔知世上咩痛楚係最痛架？」
 
「生仔嘅痛？」
 
「係無情力呀。特別係好無情、無心、無意地拎走人地希望嘅力係最最最最——最痛架！」
 
「唉⋯⋯好心啲人呀，做渣男就徹底啲啦。懦夫、偽君子，害完人仲想做暖男比希望人！」
 
此時我幾經辛苦排到上收銀前，正準備離開apple同冬冬對我嘅精神轟炸。點知我將早餐放上收銀時，背後嘅apple又搵到位攝——
 
「嘩，啲人買兩份早餐喎！」
 
「個賤人唔似咁大食架喎！」




 
「咁一定係買比女朋友啦！」
 
「咦？其實佢女朋友係邊個呀？」
 
「唔知喎，斷估唔係上次見到嗰個掛？」
 
「下？Miss Wong？！⋯⋯唔會掛？」
 
「點知啫！今日我再問下波波先。八到再話你知！」
 
上次⋯⋯見到？！咦！係喎，上次我同Miss返學比apple呢條八婆撞到架！咦⋯⋯？！Miss話呢排我地啲嘢穿穿地煲，難道⋯⋯我同Miss嘅事係由Apple開始傳起嘅？
 
呢啲緋聞如果由女校傳到我學校，咁Miss未好大鑊？！
 




剎那間我情緒被刺激，Apple呢個滿身脂肪嘅人形豬實在太可惡！但我要冷靜，一切都係我估計，如果佢冇咁做，突然出手的話就大鑊。
 
所以當我買咗早餐後，就即時離開七仔。