真人真事改篇﹕師生戀﹕《最接近的陌生距離》: 第五十七章之一
「早晨呀，Miss Wong。」
時間係早上六點二十五分，我屋企樓下。Miss比原定時間早咗五分鐘到。同Miss冰釋前嫌後，繼續之前嘅習慣，佢過咗嚟接我一齊返學。
「嗱！早餐呀！」我將一份三文治送到Miss手上。
「咦？點解嘅？」Miss好驚訝：「仲熱嘅？啱啱整架？」
「係呀！匡記茶餐廳出品，蛋牛治！」我好自豪咁講。
「蛋牛治，實肥死啦！」Miss皺起眉頭，然後佢喺紙袋度拎咗個飯團出嚟，話：「我以為你又唔食早餐添！搞到我買咗飯團比你，哈哈！」
「你講過返學前一定要食早餐嘛！反正都係，整個豐富啲嘅，食肥你！」
Miss暗暗鬧我一聲低B仔，嘴角帶住甜笑，就話：「行啦，遲到啦！」
我地一如往常一齊返學，日子好似回復返正常。
不過我同Miss都知道，其實而家同往常嘅日子唔再一樣。喺返學途中，我想搵下話題，最後我心底愧意大作，傻笑對住Miss講：「Miss，之前⋯⋯Sorry。」
本來食蛋牛治食得好滿足嘅Miss，聽到我咁講後就皺起眉頭話：「做咩無端端講Sorry呀？」
「我呀⋯⋯誤會你同李Sir⋯⋯哈哈！我仲鬧佢添，搞到佢⋯⋯最後都頂唔順要爆⋯⋯哈哈⋯⋯」
Miss嬲到即刻停落嚟講：「你仲好意思提嘅！哼！」
「盈盈，對唔住呀。」我兩手合什。
「講咗好多次我同佢朋友嚟咋！點會有嘢呀！」
「咁⋯⋯嗰時你同李Sir啲舉動真係好親密嘛！佢好似你男朋友咁。我未⋯⋯誤會咗囉。」
「唉⋯⋯算啦！我其實真係忽略咗你嘅！你咁冇安全感，要誤會都唔出奇啦。Sorry呀，低B仔。」Miss繼續一路行一路食蛋牛治：「我同李Sir係姊妹嚟咋！大學嗰時我地成日傾時裝、化妝呢啲，我地傾下韓星oppa呢啲，其實⋯⋯佢絕對冇可能鍾意我架！」
「吓？點解嘅？」
Miss停低，歎咗口氣，再指住我講：「低B仔，你要承我，絕對唔可以講出去！」
「嗯。」
「我唔想你再誤會我先講比你知咋！李Sir其實係⋯⋯係Gay架！」
「咩話？！」我好大反應
「你低B架？！仲咁大反應！」Miss佢狀想打我，佢左顧右盼，好怕隔牆有耳，然後再壓低把聲同我講：「佢比學校知道咗會好麻煩架！所以我點敢同你解釋喎！呢啲嘢愈少人知愈好嘛！」
「而家社會開放咗咁多，點會仲歧視人搞基架？」
Miss反一反白眼：「第一好多老師都仲係好保守，包括校長。第二，家長唔接受先係最大問題！你諗下，周Sir件事燒到今日呀。然後呢間男校請咗個Gay嘅老師，即使我信佢、你都信佢，全校學生都信Alex。家長覺得有問題就係有問題！」
Miss無奈咁搖頭，繼續講：「我地做老師嘅，24小時都要揹住道德嘅枷鎖。以前社會嘅家長會好尊重老師，但我地呢一代已經唔係。老師最怕邊個？唔係校長，係家長呀！就好似周Sir呢件事，連校長都驚家長，因為好影響收生呀！其實唔好話同性戀啦，日我同你嘅事⋯⋯比家長知道咗⋯⋯唔只我有事，我驚到時你都有事。」
Miss一面擔憂望住我，個腦諗緊好多擔憂嘅事情。我同佢拍咗拖兩個幾月，或多或少學識諗嘢成熟啲，以前我可能會講：「算啦！理得人點諗！」但今日唔同，特別我知佢背負住好多責任時，我就唔可隨便同佢講「算！」或「睇開啲！」。
所以，我只好微微點頭，講咗聲：「Sorry。」 係，我唔想連句安慰都講得好草率。
只見Miss聽到我咁講後，佢兩眼有神起嚟，彷彿知我用意，就安慰咁笑說：「咦？你真係⋯⋯大個咗啲啲喎。」
「哈⋯⋯有咩？」
「哼！行啦！」佢搣一搣我面龐後，我地繼續行。
不過行行下我心諗，計埋阿偉佢地三個同蟲蟲，李Sir應該係第五個知我同Miss拍拖嘅人。
咦——！咪住先！李Sir係Gay的話，咁我之前叫黎Sir同佢friend 啲⋯⋯咁咪⋯⋯？！
死啦！黎Sir話李Sir做佢形象顧問，又帶佢買衫⋯⋯哎吔！呢次仆街啦！！！
= = = =
接住嘅日子都係對卷同對卷。唉⋯⋯考得唔係幾好添。而Miss擔心嘅嘢真係發生咗。
我喺每級都收到風，一啲向來成績同操行差嘅同學陸續被學校通知要喺聖誕假返嚟補課，然後假期後補考肥咗嗰科，有啲更一早call家長傾升留班問題。
上學期都未完，會唔會早得滯呀？據Miss講，周Sir上次嘅事件搞到學校聲名受損，校長幾乎要揹鑊。校長自己為咗頭頂烏紗，不得不由學生到老師以及成個校政進行大刀闊斧嘅改革！
至於我⋯⋯當然on the list 啦。假期後要補考返英文，如果唔係⋯⋯Out！
「子匡爸爸媽媽，早晨，我係4A班嘅班主任Miss Wong。」Miss 今日嘅衣着比以往更端莊，更散發出成熟知性魅力。望落仲有啲似電視嘅新聞主播添！
我估一年入面，係得呢一日先可以見到Miss著得咁得體、咁型、咁靚。因為今日係——家！長！日！
嘩——！呢鑊有趣喇！而家畫面係老豆老母夾咗我喺中間，老師枱嘅對面就係Miss，佢地三個準備對我行刑！老實講，每年都有家長日架啦，慣都慣晒，冇咩特別。但今日呢個組合就唔同啦！因為——
.
Miss Wong係我女朋友嘛！
.
Miss Wong係我老師，又係我女朋友，即係話今日「家長日」呢三隻字係有雙重意義！除咗代表派成績表要見家長外，亦都係女朋友見家長嘅大日子呀！
正常人透過一餐飯嚟介紹男女朋友比父母識。但Miss就喺「家長日」，用男朋友老師嘅身份去見男朋友嘅老豆老母呀！
哈⋯⋯我一陣就睇下Miss會唔會出現身份錯亂嘅搞笑嘢先！