真人真事改篇﹕師生戀﹕《最接近的陌生距離》: 第五十六章之三
Miss話好怕比人見到我地一齊飛的，所以叫我早一個街口落，佢自己就坐到去學校門口。終於，我可以打鐘前趕到返學校。然而，一踏入校門，就有個人令我好驚訝！
「黎⋯⋯黎Sir?」
嘩，我差啲唔認得佢！
「入嚟先啦！唔好令我難做啦！你仲喺個閘外面架！打鐘就當遲到架啦！」
我呆晒慢慢行返入校門，定睛望住黎Sir。
「做⋯⋯做咩呀？我⋯⋯」佢即刻望一望件衫，慌張咁講：「係咪⋯⋯好唔得呀？」
我搖頭，因為佢真係⋯⋯型咗好多！
上次見佢時換咗髮型，又戴咗Con，成個人個樣已經唔同。不得否認，黎Sir個「底」唔錯，執一執就型晒。今日佢仲換晒啲衣著風格，將以往嘅格仔毒男裇衫同鬆泡泡毒男西褲換成白色裇衫同卡其色修腳西褲！成個人簡直⋯⋯由教中史嘅柒頭Sir變成教英文嘅靚仔Sir！
怪唔知得頭先我瞄到對面女校啲女仔望晒過嚟啦！佢地一定以為學校請咗新老師！
「唔係呀！好得呀！」我同佢比咗兩隻手指公：「點解嘅？」
「你講架嘛！」
「吓？我講咗啲咩？」
「你話⋯⋯」佢捉埋我一邊，扮到要罰我咁，其實就靜靜地講：「你話過我要執下外表，注意下談吐架嘛！」
「執嚟做咩呀？」我完全忘記咗同佢講過咩。
「追Miss Wong 囉！你教我咁做架嘛！」
我先啞咗，我教佢嚟追自己條女⋯⋯啊！好似有咁講，但個目的唔係叫佢追Miss咁傻啦！我係叫佢趁機同李Sir 老友啲，阻住李Sir接近Miss！
「我⋯⋯記得啦！」
「多謝你呀匡少！我發覺我真係有啲唔同咗，哈⋯⋯女人緣好似好咗。教Art嗰個Miss Lam同我傾多咗計。」
「哦⋯⋯吓話？」
「嗱嗱，唔好誤會呀！我唔花心架！我依然仲係⋯⋯」
「得！唔使講，我明。」我張一張手叫佢唔使講，我梗係唔想聽佢講鍾意Miss啦！
「總之多謝你啦匡哥！你真係橋王嚟架！」
「唔使客氣，brother呀嘛。」我唔知點解硬係好唔自在：「衣着呢啲嘢，唔係話變就變喎！你點做到架？」
「李Sir！」
「又關佢事？」
「關呀！你叫我同佢老友啲嘛！唔只夠老友添呀，佢仲教我點著衫添！佢仲帶埋我出去買衫，教我點揀呀！仲教我啲男士護膚知識、點樣做運動、點操肌⋯⋯哈哈！佢而家係我形象顧問呀！」
我打量黎Sir，難怪佢呢身打扮咁有李Sir風格！此時剛好打鐘，走之前我不忘回頭一望黎Sir，個心⋯⋯總係覺得我之前做錯咗個決定，將來好似會發生啲好差嘅事。
= = = =
「Good Morning Class!」
Miss一入班房即時回復返從前嘅狀態。佢點緊名嘅聲音依然係嚴肅同冰冷，完全冇受到今朝見返阿Vick呢件事影響。Miss真係好專業，公同私可以分得咁開。然後當佢點到阿波個名後，就停咗落嚟。
Miss抬頭望住班上兩個空咗嘅座位——杰少同阿偉，神情難免有啲難過。
「謝子匡。」
我個名正正係杰少同阿偉之後。
「到。」
佢繼續點名、將感受收返埋。我同Miss此時此刻都一同因為四兄弟四分五裂而感到惋惜。
一如以往，繼續正常咁上堂，課堂比以往更靜。雖然我地班經Miss嘅鐵腕整治後，上佢堂真係好靜，但總有歡笑同活力。因為我地四兄弟係歡樂製造機，即使我地被Miss調開晒四個角落頭，我地總有方法傾到計、搞下事。而4A嘅手足更樂於見到我點樣被阿偉陰，再搞到被Miss罰。Miss亦都因為係我女朋友嘅關係，罰得特別重手。
呢啲一切都冇晒，令到今日嘅課堂唔只安靜，要用死寂去形容。
接住嚟就係對卷，除咗中文科外其他科都輪住咁派卷。唉⋯⋯成績方面⋯⋯
「⋯⋯⋯」Miss沉默咗好耐。
時間係Lunch，Miss特別叫咗幾個同學留低喺課室傾返初步出咗嘅考試成績，當然我係其中一位。我前面嗰三個因為考得差，逐個比Miss省咗鑊金之後走咗。最後得返我同佢喺度，老師枱前，我同佢各坐一邊。
Miss睇住我其他科嘅卷沉默咗好耐，唉⋯⋯呢次大鑊。
「⋯⋯點解嘅？」聽佢把聲好似好失望，呢一句似女朋友多過老師。
「咁⋯⋯嗰時我同你冷戰緊嘛。我邊有心機⋯⋯溫書喎⋯⋯」
Miss望一望我，面無表情咁講：「心情差就可以考到咁架啦？」
我唔敢望住佢，自知無話可說。但佢散發嘅老師氣場令我好自然咁講：「Sorry呀，我知我考唔到你想要嘅分數⋯⋯」
講完之後我都準備好比佢片一鑊，然而——
.
「你又知我想要咩分數？」
.
「冇八十都七十先啦！」
「吓？！」
「吓咩呀？」
Miss恍然大悟，然後忍唔住有少少發嬲咁講：「你又覺得我想鬧你呀？」
「吓？數學、經濟呢啲剛剛好合格咋喎！」
「你即係認為我覺得你今次考得好差啦！」
「你唔係想我考好啲咩？你講架嘛『謝子匡你一定要考好聽日嘅試！』剛剛合格咁都叫好呀？」
「哦！即係你覺得我頭先又嬲你！你又誤會我！」
「吓？唔係咩？」
「低B仔！你真係誤會我架喎！你覺得我小器！！」
我個Ram唔係好夠用添！呢個女人想點架？一時變係我老師嘅？！又一時變返做我女朋友！我接唔到波喎盈盈！
「唔係呀，盈盈——！」
「你叫緊熊貓呀？呢度學校呀！叫Miss Wong!」
吓？！又想點呀？！
「Miss Wong⋯⋯⋯咁頭先嘅同學考六十分都比你片到喊晒口喎！」
「佢地退步晒就抵鬧啦！佢地之前考頭十名架！」Miss個樣嬲嘅時候其實係女朋友感覺多：「你由十幾分變做合格呀！咁大進步邊叫差喎！」
「唔係吓話？我好驚呀嘛！我以為你想鬧我呀！」
「即係話我好恐怖啦！係咪呀？！」
「唔係唔係⋯⋯哎呀，對唔住呀盈盈⋯⋯」
「都話咗！呢度係學校呀！！」
然後我一邊氹佢，佢又一邊鬧我。成個過程好有趣，佢好想用老師態度同我傾成績。但就因為女朋友嘅身份，總係有不可理喻嘅理由去鬧我——
佢嬲我以為佢嬲緊我但其實佢冇嬲我但又因為我以為佢嬲我所以真係嬲咗我，然後佢因為真係嬲咗我覺得最衰都係我。
睇唔明？唔洗明架，天下間所有女朋友嘅思維都係咁上下，男人係唔會明架！做男人只需要識講——
「Sorry呀！」我雙手合十咁講。最後我同佢企咗去窗邊，佢嬲到背住我，鼓起個腮咁望風景。
「咁我緊張你先識驚啫！係咪？」
「哼！」Miss哼咗一聲，就兩手抱胸向我回望。雖然個樣仲嬲緊，但佢嘴角好sweet咁笑緊：「算你啦。你仲識得氹我！」
「所以⋯⋯我其實考得好好？」
「算係嘅！大部分都合格。」Miss講完就歎咗口氣：「你真係比以前進步好多。但係惟獨英文你真係要加把勁呀。」
我見佢一擔心，就問：「英文啫，唔洗死掛？」
「之前周Sir件事帶嚟好大影響。加上學校banding跌緊，學校想清走所謂嘅『瘀血』。」Miss好不忿咁講，睇黎所謂嘅「瘀血」係指我，而且佢一定喺背後幫我頂住班老屎忽。
「你呀，低B仔。由中一開始成績操行咁差，學校想整走你好耐啦。我擔心佢地會執你英文唔合格呢一點，借機會唔比你升班，再令你心灰意冷咁自動退學。」
「咁留班好閒啫。反正你都喺度啦！」
「唔得呀！」Miss稍為惡少少咁講：「你唔可以被人睇死！要爭氣啲呀！而且萬一我出年唔喺度，咁你點算呀？」
「你點會走呀，我喺度喎。」
「如果學校唔續我約呢？我⋯⋯我工作表現唔係咁理想架咋！你諗下，我被校長延長咗試用期架。」
「唔係呀！盈盈你好叻架！你教好咗我呀！邊個老師做到？得你可以做到咋！」
Miss無奈咁笑，好似笑我睇得太簡單，嘗試解釋話：「我有冇得留低，係睇好多因素架。周Sir件事影響好大，其實我已經被校長black list咗。未來下學期，唔只你要加油，我都要加油。你留班或者升到班，但我被人炒。咁你就好慘架啦。」
我知Miss嘅問題唔係佢所講咁簡單，呢一刻我都收起嬉皮笑臉，認真咁點頭，再捉住佢隻手，深深咁喺佢手背上錫咗一啖。
.
「嗯！我地一齊努力！」
.
「係呀。我好想可以繼續做你班主任，睇住你中六畢業，睇住你大個仔呀！」
Miss最後呢一句，幫我打咗好強嘅強心針。剎那間，我感覺到新嘅挑戰即將嚟到。而呢一次嘅考驗係直接考驗我同Miss。