真人真事改篇﹕師生戀﹕《最接近的陌生距離》: 第五十六章之二
「呢個鐘數好難截車架。不如——」
.
我應聲回頭，眼前嘅人比帶比我無形嘅壓力！
「不如我車你返去啦。」
Vick，Miss嘅前男朋友，再一次毫無預警地出現！嚇到我連氣都唔敢抖！Vick唔似上次咁樣著住西裝，但佢一身優閑polo shirt同短褲，更顯佢嘅活力。佢留住鬚，但唔覺得好不修邊幅，反而令人感覺企理乾淨，展現出事業型男士嘅成熟魅力。
Miss仍然瞪眼結舌，似乎都冇意料到Vick喺嚟個時候出現!過咗一兩秒後，Miss先講：「唔洗。」Miss回應得好冷淡，將Vick拒之門外。
Vick並冇放棄，望一望錶，就話：「我記得你返七點架喎。你遲晒大到啦。嚟啦，我車你返工啦。」佢講完之後，望咗我一眼，就好友善同我打招呼：「咦？你好面善⋯⋯啊！我記得啦，有次喺學校門口見過你嘅。你好似叫做⋯⋯」
正當我想應Vick時，Miss眼神銳利向我望嚟，以好惡嘅語氣同我講：「唔好同陌生人講嘢。」
氣氛瞬間冰冷起嚟，令我地三人都唔出聲。片刻過後，Vick繼續滿面笑容同Miss講：「反正你學生都喺度，我車埋你地啦。你都唔想你學生遲到架？」
Miss望一望Vick，又望一望我。喺佢眼神令我感覺到Miss有些微嘅軟化。Miss其實擔心我遲到多過擔心佢自己。然而，Miss好矛盾又好複雜，佢好憎Vick，唔想同Vick有任何接觸，更唔想我面對Vick呢個咁強大嘅情敵。
所以Miss衡量過後，繼續冷冷同Vick講：「唔需要。」
Vick仍未心息，說：「盈盈，你仲嬲我掉低你？我搞掂英國嗰邊啲生意即刻返嚟香港搵你。我好想同你重新開始。」
呢句說話刺中我心，呢次仆街，我最強大嘅情敵想追返Miss呀！
Miss冇聽佢講，注意力放喺截車上面。過咗一陣終於截到車。喺我地上車前，Vick講咗句說話：「子桓前日搵過我⋯⋯」
Miss雖然背住我，但佢成個人好似石化咗咁，成個人僵硬晒，唔使望都知佢呢一刻嘅表情相當難睇。
「子桓講得好隱晦，我唔知發生咩事。但如果係關錢事，我可以幫到手。你隨時開聲，我一定會幫你。」
Miss冇理到Vick，只係細細聲同我講：「上車。」
我聽Miss話，我地兩個就上咗的士走人。
Miss一上車即刻打咗電話。但睇嚟電話嘅另一邊唔係好想接電話。Miss急call咗幾次後先有人接，佢即時用既冷靜又嬲嘅語氣講：「子桓，係我，家姐。」
Miss深吸口氣，忍住怒氣就問：「你點解要搵Vick。」
我見Miss閉著眼深呼吸，似乎夾硬想令自己冷靜啲，睇嚟電話另一邊嘅子桓講緊嘅嘢非常難聽。
「爸爸已經幫你還咗少少。下一期錢你自己還返！」
電話另一邊炸出幾句粗句，但我聽唔清楚係咩。
「你唔好煩媽咪！仲有！我同Vick分咗手架啦！我同佢再冇任何關係！你唔使指望人地會幫你還錢！！」
「⋯⋯你⋯⋯想我⋯⋯死呀⋯⋯我⋯⋯仲⋯⋯百萬⋯⋯」呢次我隱約聽到少少佢個衰細佬講緊咩。
「我已經幫到盡！你自己搞出嚟嘅事自己搞返掂佢！」
最後Miss唔想再聽落去直接cut線，然後佢低頭暗自飲泣。我好想安慰佢，但因為礙於係喺的士度，Miss搖頭示意我唔好同佢太親密。於是身為男朋友嘅我，就被迫聽住女朋友嘅喊聲而冇任何野可以幫到手。
唉，本來今朝嘅氣氛係非常之好。但Vick嘅出現，卻好似投石入湖咁，引起陣陣漣漪。
我心情⋯⋯唉，唔識講。驚就一定有架啦，Vick，一個事業有成嘅成功男人！揸跑車，高大靚仔！邊個女人會唔鍾意呀？
而我仲係個細路，就當我個樣、未來好有發展潛力⋯⋯但愛情係比即時嘅戰鬥力架嘛！而家我就好似龍珠初期嘅細路仔孫悟空，要時空穿越打Z時期嘅完全體斯路呀！
望見Miss呢一刻咁無助，我又諗前日同佢講嘅說話——「有我喺度陪你！」當刻講梗係型！梗係powerful架！實際幫到啲咩？
冇！
而Vick剛才一句——「錢嘅嘢我可以幫到手！」蠢嘅、盲嘅、聾嘅都知Vick呢個先係解決Miss問題嘅方法！
望住飲泣中嘅Miss，忽然間我唔知佢諗緊咩？走投無路？好需要錢？始終都係自己細佬，佢真係堅持唔靠Vick要細佬搞返掂？
唉⋯⋯⋯。
「你又冇信心啦？」Miss冷靜返，忽然咁講。似乎我心中嘅歎息大到連Miss都聽到。
我都唔知點應Miss好，好驚答錯又令佢更唔開心。
「『唔好諗自己冇嘅嘢』。」Miss向我望嚟，展現我喜愛嘅微笑：「『要諗自己有嘅嘢』。阿偉嘅說話你忘記咗啦？」
「嗯！」我笑住點頭。我地彼此微笑，大家都彷彿搵到個抖氣位，等我地唔好比絕望蠶食。而Miss嘅笑更堅定，佢對我好有信心。
「子桓，喺19歲嗰年⋯⋯」Miss提起個衰細佬心情難免會難過起嚟：「因為冇心機讀書，本來佢可以讀大學。但佢嗰時已經群咗啲壞人，好想搵快錢，所以連大學都唔讀。我好驚佢出事，所以我拜托Vick比份工佢做。當時我同Vick一齊緊，我希望子桓就算唔讀書都好，不如出嚟做嘢早啲搵錢。嗰時我好理想咁諗，如果子桓好似Vick咁叻識做生意，咁都唔錯呀！子桓天資聰敏，實可以做到！點知⋯⋯我真係太理想。」
「子桓最後放棄咗？」
「嗯⋯⋯佢向來驕生慣養，屋企除咗爸爸外個個都驚佢，喺屋企做慣小霸王。佢真係以為個世界係圍住佢轉架！加上佢咁聰明，由細到大都習慣贏第一。所以當佢出社會做嘢，跟住Vick嘅時候，就知道世界並唔係佢咁諗。」Miss嘆一口氣，續道：「嗰時Vick真係好錫我，佢知我好錫屋企人，所以真心想教識子桓，可以話Vick當咗梓桓係自己細佬。亦都因為咁，Vick對佢比一般下屬更嚴厲⋯⋯」
「所以佢咁大個仔終於嘗試失敗。」
「嗯！」Miss點頭，續道：「所以佢就返翻去最令自己覺得舒服嘅圈子，繼續佢嘅春秋大夢。終於⋯⋯今日就⋯⋯唉⋯⋯」
同時我都明白咗梓桓點解會搵Vick求救，原來有咁嘅淵源。
「不過，Miss。Vick真係可以一口氣搞掂晒梓桓條數，所以你其實會唔會——！」
「唔會！」Miss未等我講完就好決絕咁拒絕，但佢停一停，眼神複雜似乎諗緊嘢，我估計佢唔係冇考慮Vick嘅幫忙。
我冇追問落去，Miss卻繼續個話題：「低B仔，你記住，做人唔可以隨便接受人地好意。」
我不解咁望返Miss，見佢一面後悔，又憂心咁講：「如果接受咗，人地想要你做啲咩你都冇得拒絕！」
當下以為佢講明唔接受Vick嘅幫忙，但似乎話中有話，唔只係教我做人，更似係講出一種後悔。
接住呢程車中，我地冇再講Vick，Miss唔想心情勁差咁開工。最後我地嘗試講下啲開心嘢，令大家都開心啲。例如聖誕假去邊度玩咁。
「係呢！Miss Wong ，你聖誕假期打算去邊度玩呀？！」我講得隱晦啲，費事比司機感覺古怪。
「我諗好咗啦！」提起放假，Miss都開心起嚟：「之前冷落咗男朋友，我好想成個假期都陪佢！」
「真係？！」頂！我真係好想快啲放假呀！我問道：「咁你有咩打算呀！」
「嗯⋯⋯我好耐冇去迪士尼啦！就去迪士尼玩呀！！」
「好啊！」由開幕到而家！我都未去過迪士尼架！
呢刻我開心到好想同Miss Sweet下。但有司機喺度⋯啊！有計！
我張背囊平放遮住隻手，Miss首先覺得好奇怪，直至我偷偷咁握住佢隻手時，佢好怕醜咁笑，望咗窗外一眼後，再對我露出美麗嘅笑容。我知佢想講咩，佢一定想鬧我氹女仔啲屎橋真係好唔得。
但，佢覺得呢一刻嘅幸福真係好寶貴。