真人真事改篇﹕師生戀﹕《最接近的陌生距離》: 第五十六章之一

唉⋯⋯開心過頭添。
 
情到濃時，我同Miss錫咗好耐。不過就冇趁Miss病，乘勢「鼓掌」！但呢一吻都夠我喺Miss身上惹咗啲病返嚟⋯⋯
 
「話咗你架啦！」Miss喺床邊叉晒腰勁不滿講：「琴日同你講咗我病緊呀！仲錫埋嚟！低B!」
 
「咁⋯⋯我愛你嘛盈盈⋯⋯」我頭痛到癲，攤咗喺Miss張床度休息。
 
「錫還錫！點一下就算啦！你⋯⋯你仲伸埋⋯⋯哎呀！激死我啦！成日搵嘢嚟激我！低B仔！」
 




是咁的，琴日我搵家姐過橋，叫佢同老豆老母講我去咗佢hall屈蛇溫書。家姐知我同Miss好返後，就二話不說幫我呢個忙。咁我就可以全日全晚照顧Miss。
 
點知今朝一醒，哈哈，到我發燒⋯⋯。而Miss呢？精神到可以打死老虎！嘿，經我細心照料後，佢終於好返啦！所以⋯⋯哈哈⋯⋯今日到佢照顧返我啦！
 
「哼！枉我好感動你咁識照顧我呀！你睇下你！都未讚你呀，你就同我病！」
 
「盈盈，我愛你。」我對佢甜笑，然後見佢想出門口我說問：「你去邊呀？」
 
「去賣餸煮粥比你食呀！」
 




煮⋯⋯粥⋯⋯煮粥？！吓！Miss煮嘢食？
 
喂！唔係原隻未剝皮嘅田雞粥吓話？！
 
「Miss!唔⋯⋯唔使啦！我好返啦！唔好呀——！」
 
叫極都唔停！呢個女人嘅執行力同效率真係好驚人！果然係喺一個又變態又嚴嘅家庭中成長！大約個零鐘後，就有一鍋熱辣辣嘅粥放喺我面前。
 
「低B仔。」Miss坐咗我對面，佢好滿意又好幸福咁笑說：「快啲食呀。」但我聽到係「快啲死」。
 




呢煲粥望落正常，粥底仲要好錦。我有啲詫異望住Miss，佢竟然可以煮到呢個程度？
 
Miss雙手托住面珠，兩眼笑瞇瞇咁，似乎好期待我讚佢。真心，今次佢煮嘢嘅賣相唔只正常，仲要高水準。令我不禁驚歎Miss嘅學習能力！難怪佢之前咁爛玩都可以讀到大學啦！
 
好啦！今次應該正常嘅，我放心咁同Miss講：「我唔客氣啦！」
 
𢳂一羹，食一啖，我沉默了。
 
「點呀？好唔好食呀？」Miss表現好心急，好想我快啲讚佢。
 
「咩肉嚟？」
 
「雞柳囉！好健康架！」
 
「嗯，冇解凍嘅？」




 
「解⋯⋯凍？咩嚟架？」Miss知自己又衰咗，可愛咁扮傻吐舌。
 
「嗯。」
 
繼續食啦，想死咩。唉，讚得佢太快添。至於Miss之後再煮咗啲咩⋯⋯由於呢個係一個好純（甜）嘅愛情故事，獵奇嘢唔好多講。總之好彩嘅係，星期一學校放假，我可以偷多一日休息！而嘅我身體為咗唔想再食Miss嘅「暗黑料理療法」而強行發揮狼人嘅自癒能力！
 
終於星期二！我同Miss都好返晒啦！！
 
「好嘢！我地又可以一齊返學Lu！」我著好咗件冬季校服，等緊Miss化好妝就出門。至於件冬季校服點嚟？Miss都知我一定死拖爛拖，拖到缺點變小過先換季，所以早喺半個月前佢已經幫我買多件校服。
 
此時，Miss喺睡房出返嚟，動作有啲急忙，一手提手袋，另一手就戴緊耳環。病好嘅佢又回復返初初識佢時嘅美貌同氣質！
 
「你真係呢！」Miss見到我又訓導上身執一執我啲儀容，埋嚟幫我整返好條呔：「呔又打得差，又唔攝衫！我真係想而家就記你校服違規呀！」
 




我開心咁對佢笑，因為以往有活力嘅佢返咗嚟！但Miss冇我咁好氣，勞氣咁講：「仲笑？遲到啦！又係叫極都唔醒！我比你搞到遲埋到啦！」
 
「咩呀！八點先打鐘，而家七點三咋喎！」
 
「老師要七點返到去呀！呢度去你學校坐鐵都要八個字呀！」
 
「嘻！五分鐘內我跑到返去啦！」
 
「謝！子！匡！」Miss怒瞪住我，示意我望下佢著緊咩鞋。
 
「哈⋯⋯哈⋯⋯」我傻笑咁講：「咁⋯⋯我地坐的士啦。」
 
Miss哼咗我一聲就嘴角帶笑地同我拖住手出門。雖然由佢屋企到行出去大廈外面嘅路程好短，拖手嘅時光頂多得分零鐘，但我地都已經好滿足。
 
可惜嘅係，呢份幸福被Miss嘅焦慮所取代。我地喺街度截的士截咗好耐都係冇車。搞到Miss係咗望錶，又急又嬲咁瞄我一眼。唉⋯⋯佢怪緊我懶訓起唔到身搞到佢遲大到。




 
喺我地好無助嘅時候，我聽到有把男人聲喺我地身後傳嚟——
 
 
.
 
「盈盈？」
 
.
 
 
呢把聲好磁性，好熟，熟到有一種不安喺我心入面發出嚟！Miss一怔，佢應聲一望，成個人氣息即刻變晒！變到好複雜⋯⋯有悲、有憤、更好似有一種⋯⋯我唔識講，總之就唔多對路。我都冇深究落去，因為Miss接住嘅反應實在令我相當震驚——
 
 
.




 
「阿⋯⋯阿Vick？！」
 
.
 
 
Vick?!係⋯⋯係⋯⋯Miss個Ex？！