真人真事改篇﹕師生戀﹕《最接近的陌生距離》: 第五十一章之一

「啦啦啦啦⋯⋯」影完相之後，我同蟲蟲落返去商場中庭。蟲蟲佢拎住疊相一邊哼住歌，一邊欣賞啲相。佢表現得好開心，開心到差啲撞到人。
 
「喂，睇路啦。」
 
「有你幫我睇緊路嘛。」蟲蟲繼續掛住望啲相，望都唔望我，續道：「我撞到人就入你數。」
 
「痴線。」
 
行到中庭嘅展覽，蟲蟲忽然回頭大叫咗聲：「啊——！」
 




「哇！嚇死人咩？！」我即刻忽佢嚇死：「咩事呀痴線妹！」
 
「我突然好想食啲好香口好脆口嘅嘢呀！」蟲蟲諗一諗之後，就兩眼發光咁講：「太安樓炸大腸！嘩⋯⋯我嚟啦！」佢好似跳咗線咁，情緒突然高漲，就一枝箭跑去港鐵站。
 
「喂！等埋呀！」我喺後面差啲追唔切。
 
蟲蟲有心跑得好快，佢知我一定跟上嚟。入到車箱我索晒氣咁，蟲蟲見到就開心恥笑。
 
「你⋯⋯你⋯⋯嗄⋯⋯成日整蠱我！」
 




「我唔咁做，你會跟我嚟咩？哈哈。」蟲蟲任性笑說。
 
「嗄⋯⋯即係⋯⋯你認你想我陪你啦？」
 
「錯！係我陪緊你，你睇下，你心情係咪好左好多呢？」
 
「是⋯⋯是旦啦⋯⋯嗄⋯⋯邊個都一樣啦⋯⋯」
 
「嘻⋯⋯咁未好囉！我地今晚剩係食同玩！咩都唔洗理！」佢yeah完笑完，就擺個拳頭出嚟：「brother!」
 




呢個動作以往令我好熱血，但今日卻令我感到萬分失落。
 
蟲蟲見我遲遲都未擺個拳頭出嚟，就話：「喂，你至少仲有我呢個brother呀嘛！」
 
此時，我情感又複雜起嚟。明明幾日前佢喊住話鐘意我，而家又話做返我兄弟。到底佢係點諗嘅呢？
 
「brother。」我同蟲蟲碰拳。或者，「兄弟」呢兩個字，對蟲蟲來講係佢嘅「最接近的陌生距離」，而且亦係佢嘅安舒區。
 
蟲蟲呢個時候拎起咗張相，就係佢所講嘅「蟲蟲俠智擒色狼匡」嗰張，笑住話：「呢張真係好好笑呀！」
 
「我隻手仲痛緊呀痴線妹！」
 
「哈！抵你死啦！鬼叫你搞我條辮呀？！」蟲蟲講完就鼓起泡腮。
 
「使唔使咁大反應呀？最多未放啲頭髮落嚟！」




 
「就係唔得！你咩身份呀？想睇我放頭髮落嚟個樣？」蟲蟲對我輕輕翁一下鼻。
 
「brother囉。」
 
「係囉！你又唔係我男朋友！」
 
佢講完之後，我地彼此沉默咗數秒。我嘅沉默係驚訝佢咁快放低咗我？好輕易做返兄弟？ 而蟲蟲嘅沉默，彷彿有一種責怪自己嘅衝動。
 
「得啦，巴之閉。」我笑說，想打個完場：「你都幾搞笑喎，人地女仔就話留返個處比個老公啫。你就想未來男朋友睇你放長頭髮個樣。」
 
「係呀！我就係咁古怪架啦！」蟲蟲叉住腰講。剛好到咗油塘站，喺車門打開嘅一瞬間，個痴線妹竟然——
 
「咁撚串呀嗱！！」
 




「哎吔！」
 
佢竟然一腳踢我上五寸下五寸！！然後一枝箭標走咗去對面月台！呢個時間去港島嘅列車都到咗，佢上車就恥笑我：「行快啲啦！唔等你架！」
 
車門嘅嗶嗶聲響起⋯⋯
 
焦急嘅我叫道：「等埋！」
 
由於太痛嘅關係，令我一拐一枴咁行，車門亦都馬上關上。最後好彩我都趕得切！
 
望住蟲蟲惡作劇一樣嘅奸笑，我連聲嘆氣。但當我地彼此互望時，好想大笑出聲，眼神卻又分開。
 
我同佢，或者正在努力扮做一對好兄弟。