真人真事改篇﹕師生戀﹕《最接近的陌生距離》: 第五十章之三

「哎吔⋯⋯影邊部好呢？全身定半身⋯⋯」蟲蟲喺眾多嘅貼紙相機中穿梭，佢起碼揀咗成十幾分鐘都仲未揀好影邊部。
 
睇到蟲蟲而家咁嘅樣，我其實內心好複雜。佢揀嚟揀去都揀唔落手，代表佢好重視呢個時刻。因為⋯⋯佢鍾意我。換係我當然想同愛人影靚啲啦。
 
我諗返起蟲蟲向我表白當晚，佢明明喊晒講佢好多嘅擔憂出嚟。然後呢幾日又唔見人，我仲以為佢唔想再見我添。但點知，蟲蟲總係我唔開心嘅時候出現。其實而家呢刻同前幾日一樣，佢想我開心啲。
 
不過明明佢已經同我表白，佢已經越咗界。但係佢今日又若無其事做返我兄弟⋯⋯呢個女仔個腦諗緊咩架？
 
「阿匡！快啲過嚟呀！」蟲蟲好焦急咁同我揮手，叫我去一部影全身相嘅貼紙相機！
 




「5、4、3⋯⋯」部機用日文倒數緊！嚇到我好急忙咁衝咗入去！
 
「搞錯呀！入咗錢先叫我入嚟！」我一入去部機入面即刻抱怨咁講。
 
卡嚓——！貼紙相機閃咗下。螢幕上出現咗我鬧蟲蟲嘅樣。有趣嘅係，蟲蟲夾到時間，佢做咗「驚到吃手手」嘅動作。
 
「哈⋯⋯哈⋯⋯刺唔刺激呀？」
 
「唔得呀！我咁樣衰！」
 




「咦？你醒返晒啦喎！」
 
「5、4⋯⋯」部貼紙機又倒數啦！我同蟲蟲即刻緊張起嚟！
 
「點呀！點呀？！要擺咩post好呀？！」我緊張講。
 
「你喺我前面痞低少少先！」蟲蟲非常焦急！
 
「3、2⋯⋯」仲有兩秒！我即刻照蟲蟲說話做！
 




「笑下啦！」蟲蟲好粗暴咁拉我兩邊面頰！想夾硬幫我整個笑樣出嚟！
 
卡嚓——！貼紙機閃咗下！頂⋯⋯我好柒呀？！但影到佢笑得好靚！！
 
「搞錯呀？又影得咁樣衰！」我抱怨道。
 
「你樣衰唔關陪機事架喎！」
 
「5、4⋯⋯」下一張準備嚟啦！
 
我地好慌張咁就位擺pose。衰妹呀，連續兩次都比你搞到咁樣衰，今次輪到我整蠱你先！
 
「3、2⋯⋯」
 
蟲蟲喺我身前已經擺定pose，佢條馬尾辮咁可愛，唔知拆咗落嚟佢會唔會成個癲婆咁呢？我奸笑一聲，就伸手想掹佢條橡筋。




 
點知蟲蟲啲觸覺好敏銳，feel到我想掂佢條辮時，就喝斥一聲：「你想點呀？」
 
「哇⋯⋯哇⋯⋯好痛！」我痛叫住⋯⋯真係好痛！因為佢隻手好快，我都未縮得切，佢一下轉身再擒住我手腕，又唔知點扭，搞到我隻手成隻雞腳咁嘅形狀咁⋯⋯總之就好痛啦！
 
「好痛⋯⋯放⋯⋯放手⋯⋯對唔住呀蟲姐！對唔住！」
 
我冇諗過蟲蟲啲功夫真係堅料嚟架！佢唔係用死力壓住我，係用扭曲關節引起嘅劇痛收我皮！
 
「唔准搞我條辮呀！！」
 
卡嚓——！終於我地就影咗張最有趣嘅相⋯⋯蟲蟲覺得最有趣嘅相。
 
「哈哈⋯⋯係蟲蟲俠智擒色狼匡呀！」蟲蟲天真可愛咁邊拍手邊跳住講。
 




「5、4⋯⋯」
 
「喂！比我靚仔一次先啦！」
 
「好啦好啦。今日你唔開心，你大晒架嘛！」
 
於是，我同蟲蟲好開心咁影咗好多相。我真係好驚訝自己明明唔開心緊，都可以好快投入起嚟，同埋蟲蟲一齊癲。
 
癲癲下連因咩事而唔開心都忘記咗。蟲蟲⋯⋯呢個女仔真係好特別。