真人真事改篇﹕師生戀﹕《最接近的陌生距離》: 第五十章之二
阿偉走咗、阿波走咗、杰少走咗⋯⋯留返我一個人喺「空中花園」。
我呆坐一邊，任由啲鼻血流乾，唔知時間過咗幾耐。盈盈同我分手，蟲蟲消失埋，而家連我最重要嘅兄弟都⋯⋯
我唔知自己留喺學校幾耐。唔知⋯⋯我咩都唔想做，咩人都唔想搵，只知自己一出校門就一直咁行，冇目的咁行。
我只想靜一靜。
我⋯⋯我⋯⋯
「咦？」我怪叫一聲，原來我已經去到大馬路邊。
人來人往，馬路上異常咁繁忙。我就置身於煩囂嘅都市中，但偏偏有種奇怪嘅感覺出現喺我背後，令我好奇地轉身一望。
我眼前係擠逼嘅街道，人群好似水流咁喺我身邊經過。而家係收工時間，呢個繁忙嘅現象係正常不過。但我總係覺得人群之中匿埋咗個人喺度⋯⋯
唔理啦⋯⋯我想散心，我繼續冇目的咁行。大腦自動閃過好多片段，先係近排發生嘅一切不幸、我地四兄弟成長嘅一切一切、最後我同盈盈最甜蜜同快樂嘅時光⋯⋯一切都成為泡影。
「咦？」
背後奇怪嘅感覺又嚟，此時我已經喺商場入面，搭緊扶手電梯。我隨奇怪嘅感覺轉身一望，身後全都係人。今次我卻見到有個身影動作比較迄突，好似怕我見到，即刻搵人遮住。
邊個嚟架？
呢個人搞到我心情有啲煩躁！我咩都冇晒啦！連最後一刻嘅安靜都想剝奪埋？當電梯抵達中庭嘅樓層時，我加快腳步，好想擺脫背後嗰個鬼鬼祟祟嘅人！
穿過人群，走到中間廣場。我嘅耳朵唔知點解更容易感應到背後跟蹤緊我嘅人。於是我即刻轉身一睇——我發現唔到跟縱緊嘅人，但我好似感應到佢嘅存在。廣場上剛剛好有event, 擺左大大小小唔同嘅商場檔攤。直覺覺得跟縱我嗰個人其實就匿喺呢啲檔攤入面。
我喺攤檔中搜索，最後我喺一個零食攤入面見到一個熟悉嘅身影。佢身穿女校校服，唔及膝嘅格仔校裙，同埋一頭青春馬尾——蟲蟲。
蟲蟲雖然揀緊零食，但佢動作好唔自然，我一睇就知佢扮晒嘢。佢可能都感覺到我發現左佢，扮作驚訝咁向我望嚟：「咦？你喺度嘅？」佢表情好做作，又有啲尷尬。
「你做咩跟蹤我呀。」我心情差到語氣變到好似機械人咁。
「鬼得閒跟蹤你呀！痴線！」
「哦，sor。」我機械式講完後，轉身就走。繼續漫無目的咁行。
離開中庭，我唔知點解又搭電梯去緊上層。期間我又感覺到背後有人跟埋嚟，於是回頭一睇，見到蟲蟲若無其事咁望去第二度，但動作依然好唔自然。當到達上層後，我決定喺電梯口等佢。
「哎——！」蟲蟲一上到嚟見到我木無表情咁望住佢，即時嚇咗佢一跳。佢連忙抱怨咁講：「你傻架？特登企喺度嚇人！」
「你夠特登跟蹤我囉！」
「痴⋯⋯痴線！邊有呀！條⋯⋯條路你行晒架？」蟲蟲極力否認，但表現同以前唔一樣，好少見佢咁失態。
「我想靜下。唔好跟埋嚟。」
我懶得再理佢，再見都冇講就走咗。然而蟲蟲嘅出現真係打擾我嘅寧靜，搞到我行唔夠幾步就要周圍望。唉⋯⋯個痴線妹window shopping 緊，但睇佢動作唔止唔自然，有時仲唔小心同我有眼神接觸，明顯偷望緊我啦！咁樣比佢吊住尾法真係想靜下都難。
「喂，蟲蟲！？」我企喺一間玩具店前，向企喺對面飾物店前嘅蟲蟲叫道。
蟲蟲初初扮聽我唔到，眼神別去一面。佢係要我行前一步接近佢，佢先將目光放喺我身上。蟲蟲緩緩走嚟，步伐帶住小跳步，似乎係刻意俺識緊張同尷尬。佢兩手放喺身前，不安地玩緊手指。
雖然識咗蟲蟲兩個月左右，但我好了解佢係「傲嬌」型性格。頭先我兜口面拆穿佢時，佢嘅「傲嬌」就發作，佢愈口是心非，就愈表現出內心嘅想法。
諗深一層，佢之所以跟住我，係因為⋯⋯佢知我唔開心？
「咁啱呀，又撞到你喎？」我惟有咁樣兜個圈講，蟲蟲先有個落台階。
果然⋯⋯
「哼！明明就係撞到，但你就鬧人係跟縱你！」蟲蟲抱怨咁講，但態度冇頭先咗慌張焦急，變得自然起嚟。
「對唔住啦，我衰囉。我有被害妄想呀。」
「嗯。」
我同蟲蟲對望，冇講啲咩。但我感覺到有一種奇怪嘅氣氛喺我地之間擴張。大概因為呢一刻係繼上次佢同我表白後，我地第一次見面。
我同蟲蟲嘅關係自從嗰晚後就改變咗。我地唔可以再好似兄弟咁對待大家。
蟲蟲沉默不語，只見佢向我遞咗張紙巾，柔聲咁講：「你仲流緊血呀。」佢指住面龐講。
「嗯，多謝。」
難道蟲蟲咁大費周章跟蹤我，就係想比張紙巾我？佢又係點知道我出咗事呢？
我接過紙巾後，求其咁印幾下。搞到蟲蟲皺晒眉，，就一手搶走我手中嘅紙巾：「邊有人咁樣hi下就當處理咗傷口架？」
佢憫憎咁哼咗聲，就自己行開咗。我意會到佢想我跟嚟，於是我跟住蟲蟲行，就去到洗手暗啲長椅坐低。
「你等我一陣呀。我去萬寧買啲嘢呀。」
「哦。」
其實我唔知佢要搞咩，我只係好機械式咁認佢。過咗一陣，佢就拎住啲生理鹽水、消毒藥水呢啲急救嘢返嚟。
「你唔知自己好傷咩？」蟲蟲用消毒酒精紙清潔雙手。
「唔知。」
「你冇感覺架⋯⋯嗱，忍住啦。」佢講完之後，就料理我嘅傷口。然後佢好驚訝咁講：「嘩！你真係唔痛架？」
「咩呀？」
「我用緊火酒同你洗面上啲傷喎！」
「有咩？」
「唉⋯⋯我知啦。唔開心大晒嘅！」
「你又知？」
「你咪理。」
「嗯。」
我冇心機去諗點解佢好似知我出咗事。只感到佢好細心咁幫我處理傷口，唔只面上，手肘呢啲身體其他部分嘅傷都佢都照顧周到。
「搞掂晒！」蟲蟲拍手叫道。
「嗯⋯⋯咁我走先啦。」我企起身想走人。
「吓！你就咁走啦？」蟲蟲失望地講。
「咁⋯⋯唔該晒囉。」
我轉身想走時，蟲蟲喺我背後叫聲：「喂呀！」
回頭一望，蟲蟲鼓起腮子，黑起塊面，成個扭計樣。
「咁你想點啫？」」我皺晒眉頭講，救命呀我真係好想一個人靜下呀！
「你⋯⋯你好似好悶咁喎？」
「九唔搭八。係咁先啦。」
我廢事理佢，點知蟲蟲追咗上嚟，嬲爆爆咁講：「你唔好咁過份喎！我⋯⋯我⋯⋯我叫咗你好多次啦！」
我搖頭嘆氣，蟲蟲啲「傲嬌」病真係幾嚴重，我話：「你想我陪你未出聲囉。」
「邊⋯⋯邊有呀！我洗鬼你陪！」
「咁bye bye！」我揮手叫道，喺佢身邊行過。
「謝子匡，你⋯⋯？！⋯⋯哎吔！！明明係我陪緊你！哼！！」
蟲蟲鬧咗一聲，我步伐停低。佢又跟上嚟，一面生氣咁講：「上次我地都未玩頭D！我地個賭局未完架！」
我搖頭，一面愁容：「唔打啦。冇心機呀。我真係想一個人靜下呀。」
「咁⋯⋯上次比賽我贏咗兩局喎！」
「是旦啦，你鍾意啦。」
「你話贏咗嗰個決定大懲罰架嘛！」
唉⋯⋯救命呀！我想散心！我想靜咋！我內心如此吶喊，但表情照舊如同機械人咁。
「呢次你想點玩殘我呀余小姐？」
「um⋯⋯」蟲蟲邊諗邊喺我面前踱步，當佢諗通後佢就笑住同我講：「幫我做啲嘢呀！」
「又想點呀？」
「嘻嘻⋯⋯陪我去玩呀！」
蟲蟲笑一笑，就好似細路女咁走咗，搞到我要喺後面叫住佢。