真人真事改篇﹕師生戀﹕《最接近的陌生距離》: 第五十章之一
咩⋯⋯咩話！！阿偉有病？！
此時，阿波終於都忍唔住，佢喊得好大聲：「嗚⋯⋯嗚⋯⋯呀⋯⋯嗚⋯⋯⋯！！」我從來都冇見過佢喊得咁慘。
我個腦袋放空，面部肌肉都僵硬起嚟，難以置信咁講：「咩呀？我唔明你講緊咩呀！」
「唉⋯⋯」阿偉低頭嘆氣，然後抬頭寬容咁講：「我屋企仆街囉。冇錢留比我都算。但就遺傳咗cancer比我。鼻咽癌呀，之前成日見我流鼻血嘅。未就係因為咁囉！」
「冇嘢嘅。好閒啫？應該有得醫架嘛？」我壓住悲傷嘅情緒去講。
「哈哈⋯⋯咁撚易咩？冇啦！啲仆街癌細胞走撚到成身都係啦！」阿偉愈係輕鬆咁講，就愈令我心痛：「唉⋯⋯真係老撚土。拍戲都冇咁橋。sor呀兄弟！呢次係我唔啱！哈哈⋯⋯應該有病益埋你地架嘛係咪？」
阿偉兩手搭住我同杰少。但杰少條仆街鬆一鬆肩，鬆開咗阿偉嘅手。搞到阿偉有少少尷尬，此時見到阿波一直喊，一直喊，冇停過，於是阿偉搭住阿波膊頭喺佢耳邊安慰幾句。之後阿偉就話：「本來我唔想講嘅，瞞得幾耐就幾耐啦。哈哈⋯⋯我諗諗下，波哥太真心，一直都唔識守秘密。所以今次呢⋯⋯哈哈⋯⋯我比個考驗佢！你知啦，波哥知匡哥同Miss Wong拍拖，要好守得秘密架嘛！哈哈⋯⋯睇匡哥同杰哥而家嚇到食屎咁嘅樣⋯⋯哈哈！波哥！做到嘢喎！」
阿偉豪邁咁同阿波拍肩。但阿波個情緒平復唔到反而喊得更勁。
「所以⋯⋯」阿偉望住我同杰少，眼神誠懇地講：「你兩個係咪咁唔比面我先。我就嚟死喎，唔好留遺憾比我啦。得唔得先？」佢捉住我同杰少嘅手，誠懇咁講：「嚟啦！兄弟呀嘛，揸個手就冇嘢架啦！」
我唔想阿偉帶住遺憾落棺材，即使我幾咁憎杰少都好，今次低低地認一次衰仔都值得。
「杰少。」我對杰少伸出友誼之手。
阿偉嘴角欣慰地笑。
杰少望咗我隻手一眼，佢慢慢伸出手嚟⋯⋯
啪——！
「死撚開啦！」
杰少一手拍開我隻手！然後怒氣沖沖咁撥咗開我同阿偉，正想離開「空中花園」！
仆街仔！我唔撚再忍佢啦！
「張禮杰！你咪咁撚過份呀！」我擋住杰少，一手抽住佢衣領，怒斥佢：「阿偉有事呀！你係咪咁絕情呀？」
「放手！」杰少捉我手腕叫罵！
「你欠我嘅！欠盈盈嘅！我可以當咩事都冇發生過！」我用力頂返佢，叫道：「阿偉最想我同你好返！當係為咗佢得唔得？！」
「你好放手喇！！」
「你想我點呀？要我跪低叩頭定想打我一身呀？出聲呀？！」
「你地嘅事！唔關我事呀！」
「阿偉會死呀！扮下嘢揸返手都唔得？！仲做乜撚嘢兄弟呀？！」
「佢死佢事呀！！」
「仆街——！」
碰——！理智斷線，我一拳打落杰少塊面度！杰少感到天旋地轉，就失咗平衡跌喺地上。
「你個冚家產又打我？！」杰少怒吼！
我想上前捉返佢起身，教訓佢幾下，叫罵：「仆街仔咁撚自私！對我係咁！對盈盈係咁！連對阿偉都係咁！！」
「係又點呀？」杰少大腳一伸，踢我下腹！
「哇——！」今次到我跌喺地！
我趕唔切起身，杰少成個人壓咗落嚟！臉上一陣劇痛，我正在比佢抽住衣領狂打，佢叫道：「咩都係我錯！兄咩弟呀？！我當你地係兄弟，你地有冇當我係兄弟！有冇呀？！」
「癲咗呀你？！你講咩呀？！」我不斷掙扎，但佢真係好大力，我完全比佢撳住咗。我邊掙扎邊叫：「我地幾時冇當你兄弟呀？！」
然後我面上一陣擦損嘅灼痛，杰少佢捉住我個頭喺地上磨擦！呢招上次我對佢用過，估唔到佢咁樣報返仇！
「你地三個笑我窮！請我食飯、請呢樣嗰樣！個個當我乞衣！唔撚洗你地可憐呀！」
此時，我左手抓住咗園圃嘅泥巴，大喝一聲：「你講咩呀！」手一揮，將泥巴灑落佢塊面度！佢即時雙眼入沙，對我嘅肘制即刻鬆開！
「你咁樣睇我地三個？你傻咗呀？」我連忙打佢幾拳。杰少幾聲痛叫後，到我起返身擒返佢。終於我地兩人喺地上扭打一團！互相指控！互相辱罵！
「我係記仇咁點呀？你鬧我老豆抵死！抵跛腳呀！」
「你搞到我同盈盈分咗手呀！」
「你屈我偷試卷！我點解釋你都唔聽！你為條女咩都做得出！」
「你為自己夾硬迫兄弟幫你又點計呀！」
「你唔係我兄弟！永遠都唔係！」
「仆街！去到今日仲死不認錯！」
「你屈我呀！你又啱得晒咩？！」
「諗下阿偉啦！阿偉有病呀！會死人架！」
「又唔係我死！關我撚事呀！」
我地唔知打咗幾耐，只感到全身上下都被痛楚嘅網羅包起，劇痛纏身！
過咗陣，我先聽到把聲叫喊住：「停手！停手呀！」
係阿波把聲⋯⋯「哇呀！」我被阿波嘅聲音分咗神，冷不防就比杰少一拳打落鼻樑！剎那間鼻血如泉流出，痛到我滾喺一邊叫喊。
杰少見到我爆咗缸，好似消咗氣，冇再追打，只係緩緩咁行埋一邊。
阿波連忙地向我走嚟，扶我到長椅坐低。我低住頭，任由鼻血流出。隱約見到坐喺我對面嘅阿偉神色沉默。
阿偉面上冇多餘嘅表情，只係好淡然咁將眼神定喺一點。我知道呢個係阿偉最嬲時嘅表情⋯⋯
不，應該係話係心死嘅表情。
「哈⋯⋯」過咗陣，阿偉笑出聲，話：「你地真係呢⋯⋯哈哈⋯⋯！」佢搖住頭，然後咳住咁起身。
阿偉精神好差，腳步都好浮，阿波即刻埋去扶一扶佢。阿偉張手示意阿波唔洗扶，用一把嘶啞嘅聲音講：「原來一直都只係我一廂情願⋯⋯」
我地三個人冇出聲⋯⋯
「係我咁傻仔仲當你地係兄弟。」
阿偉面部抽搐住，似係努力地壓住情感。
「仲要一做就做咗傻仔差唔多十年。哈哈⋯⋯真係⋯⋯」
佢搖頭嘆息。
「算啦⋯⋯算啦⋯⋯枉我以為自己真係咁重要⋯⋯原來⋯算啦⋯⋯算啦⋯⋯」
佢笑，但帶住無比嘅痛。
佢慢慢行到去「空中花園」嘅出入口上，本來想走，但卻又回頭望返我地，以沙啞嘅聲音講：「由今日開始，我地四個——」
.
.
「——唔再係兄弟。」
剎那間，時間停頓
冰冷嘅雨水彷彿喺我眼前停低。