真人真事改篇﹕師生戀﹕《最接近的陌生距離》: 第四十九章之二

我應聲回頭，就見到一個令我好安心嘅人企咗喺「空中花園」嘅出入口之上！
 
當我見到佢時，我真係好撚激動！有一種終於等到救星嘅感覺！令我忍唔住大叫：「阿偉！！」
 
係大哥呀！
 
阿偉見到我亦都忍唔住喜上眉梢！我地兩兄弟一見面，就忍唔住衝上前擁抱！
 
「你搞咩呀！咁耐冇返學！」我興奮到拍佢背脊。
 




阿偉一邊笑一邊輕輕推開我，佢奸笑一下就話：「逗一逗先！」條仆街突然作狀要逗我隻雀。阿偉都係扮下嘢，但都令我嚇到要避一避。
 
「幾歲呀你！痴撚線！」我笑住講，即刻兩手捉作雙肩，有少少哽咽咁講：「你比我望一下你⋯⋯頂你個肺，咁耐唔見人，你做咩瘦晒架？好彩我仲認到你咋！兄弟！」
 
講完之後我地兩兄弟互相擁抱，阿偉喺我耳邊講：「係呀，我再唔出現我怕你真係唔記得我呀！所以我今日未返嚟囉！」
 
我地對面哈哈大笑，我話：「做咩揀今日呀！你條仆街唔早啲返嚟？你早啲返嚟就好啦！我而家含晒撚呀！」
 
「考試嘛。抖夠未返嚟溫書追返啲成績囉！」阿偉笑說，佢好少咁認真講嘢。此時我望清佢個樣，發現佢唔止瘦咗一圈，仲一面病容，面色好差。
 




「我都唔知你搞咩？剩係知你係咁請病假。我問伯母咩事，佢話有心有心就耍開咗我。阿波又話唔講得！喂！偉哥，唔夠兄弟喎！」我雖然笑住講，但講講下竟然帶住抱怨嘅意味。可能我心底好介意佢點病點有事都唔同我呢個好兄弟講，更抱怨佢喺我最需要明燈指引時，佢又唔喺我身邊。我繼續講：「嗱！你唔好瞞我啦！講，你發生咩事？當唔當我係你細佬先！」
 
「痴線！你係我大哥呀！」
 
「咁有冇當我係大哥呀！」
 
阿偉搭住我膊頭，我感覺到一種比人照顧嘅力量，佢話：「一日係兄弟！一世都係兄弟！brother!」
 
佢擺個拳頭出嚟。
 




我即刻同佢撞拳：「brother！」
 
點知佢縮開咗，就奸笑咁講：「咪住先！都未人齊！」佢對住出入口大叫：「阿波！杰少！出嚟啦！」
 
杰⋯⋯杰少？
 
我興奮嘅心情忽然降溫。我張眼望去出入口，見到個蹣跚嘅身影，然後我見到垂頭喪氣嘅阿波行咗入嚟「空中花園」。
 
「Hi⋯⋯」阿波見到我同阿偉揮一揮手，但個樣充滿心事。
 
見到阿波咁我就覺得有啲唔好嘅預感。阿波係我地開心果，佢好少會⋯⋯唔係！阿波從來都唔會咁愁！即使佢比人欺凌都冇試過咁愁！
 
「杰少呢？」阿偉收起笑意，佢好少會咁認真。
 
阿波對阿偉言聽計從，連忙對出入叫咗聲：「快啲啦！阿偉本來今要休息架！」




 
我聽到阿波咁講就覺得唔對路，對阿偉講：「阿波佢講咩呀？」
 
阿偉唔理我，依然若無其事咁大笑。
 
然後我見到杰少緩慢咁入嚟。佢一身便服，仲染到成頭金。佢好刻意唔望住我，老大不願意慢慢行過嚟。阿波不斷催佢行快啲，搞到脾氣最好嘅阿波都憫憎上嚟。
 
「好！人齊啦！」阿偉拍住手，就話：「我地坐低慢慢傾啦！」
 
成個氣氛變得好嚴肅，即使阿偉仲開心笑緊。但我知道阿偉想做咩——佢想拆店我同杰少之間嘅矛盾。
 
「空中花園」有四張長椅，我同阿偉坐。阿波坐喺我對面。而杰少好唔願意咁行埋一邊，但過咗分零鐘佢先埋位，坐咗我斜對面，翹起腳眼望去第二邊。
 
呢種氣氛係我地四兄弟未曾出現。阿偉想令氣氛好啲，就笑住講：「好耐冇見呀！咁多位大佬，細佬講聲sorry先！之前因為私人理由，我就神隱咗⋯⋯波哥我冇返嚟幾耐？」
 




「半個月。」
 
「係啦！多謝波哥有心！對唔住呀匡哥、杰哥、細佬我十幾歲人先嚟割包皮呀！你知啦，我碌嘢成公里長，條包皮要切成半個月架！」
 
我地冇人笑得出。因為阿偉呢個笑話實在太迄突。愈迄突，我就愈覺得唔對路。
 
「有嘢快啲講呀。我仲要返工架。」杰少繼續望去另一邊，隻手玩緊打火機。
 
阿偉行出嚟，但喺中間，似乎有重要嘢要講，佢話：「我地做咗兄弟幾耐啦？」
 
冇人回答。
 
「我地點解要做兄弟？各位大佬有冇諗過？」
 
依然冇人敢答。




 
「我、匡哥、杰少，小學三年班就係好兄弟。波哥你小學五年班就加入。」阿偉慢慢變得嚴肅咁講：「我地做得兄弟除咗因為我地性格、喜好一樣之外，我地屋企背景都一樣！我地四個人，有邊個屋企唔係窮架？有邊個屋企係開心架？」
 
阿偉動之以情咁講，我瞄到杰少終於有啲反應。阿波就垂低頭，似乎蘊釀緊情緒。
 
「我地四個出身一岩一忽，冇錢嘅冇錢、窮嘅窮、傷心嘅傷心、冇希望嘅冇希望。正正因為咁，我地四個先走埋一齊！」阿偉講得激動起嚟，就走埋去指住阿波講：「波哥比人蝦，我地三個即刻救佢！佢唔開心，匡哥最叻逗到佢笑！雖然都係搣佢粒lin lin。哈哈哈⋯⋯」
 
阿偉然後走埋嚟指住我：「匡哥以前煩媾女，你地兩個有冇出力？有呀嘛！Miss Wong呢壇嘢我做埋佢軍師添架！」
 
然後阿偉走去杰少度，就話：「杰少係呢度最窮最需要錢嗰個。匡哥、波哥，記唔記得我地點幫佢？一碗拉麵我地四個人食呀！我仲記得——」阿偉指住我話：「匡哥話『食就食豪啲啦，食咩M記呀？』仆你個街呀，哈哈！嗰時我有返工啫，唔洗咁屈我吓話！頂你個肺，最後入間拉麵店，我最多嗌到一碗麵咋！不唔緊要！我地四兄弟一齊食，不知幾開心！幾滿足呀！」
 
阿偉嘆一嘆氣，叉住腰，搖一搖頭後再講：「我地四個可以走埋一齊，可以做到生死之交，係因為我地可以互相補足大家生命入面嘅缺乏！我當你地你兄弟！係親兄弟！一直都係！但係⋯⋯」
 
阿偉望住我地三個，我從來未見過佢咁認真、咁疑重：「阿匡、杰少！你兩個搞咩呀？」
 




雖然阿偉對我地三個哥前哥後，但真正嘅大哥係佢。阿偉呢刻用一個教訓嘅語氣同我地講，而且係前所未有咁嚴肅同認真。
 
「我唔喺度半個月啫，兩位大哥，咩事呀？」阿偉行嚟我度鬧我，然後佢行去杰少到又講：「我地冇嗌過交咩？冇打過交咩？最多嬲大家兩日之嘛！你兩條仆街仔竟然同我反面反足成半個月？！有冇當我係細佬呀？」
 
氣氛繼續寂靜，阿偉好識善用呢份寂靜，令我地三個好好諗下發生咩事。
 
點知第一個出聲嘅，係杰少。
 
「講完啦嘛？」
 
阿偉都比佢嚇咗一跳。
 
「你講完，我返工。」
 
「未講完！」
 
阿偉都撳得住杰少，令杰少起身嘅動作停止，慢慢坐返低。但杰少嘅耐性已經見底，黑起口面話：「咁你想點呀？仲有咩要講呀？！」
 
「揸手。」阿偉唔理咁多，直接點佢個目的出嚟：「阿匡，杰少。你兩個揸返手。我地四兄弟一個都不能少！」
 
「咁免吹啦。」杰少都好唔客氣。
 
阿偉望住我：「阿匡，同杰少揸手！即刻！」
 
望到杰少呢刻嘅態度，我就回憶起打交嗰日。仆街仔！到呢一刻竟然仲唔覺得自己冇錯？！我望住阿偉，輕輕搖頭。
 
阿偉嘶啞一笑，但我聽得出係充滿失望。
 
杰少率先發惡，就話：「兄咩弟呀？我個心一早死咗架啦！」
 
「自己攞嚟衰，關我撚事？」我當然回敬佢。
 
「條女做唔到嘢就算啦。仲屈鳩我。」
 
「老撚馮架屌你老母！」仆街仔！呢一刻仲怪罪落Miss度：「死不認錯！去到今日你仲係咁！」
 
「你屈我都算呀！咩抵我老豆跛腳呀！兄弟？兄弟咁講嘢架咩？！」杰少已企起身，鬧到面紅耳赤。隨時想同我開波。
 
「你搞著盈盈呀！我被你搞到同盈盈分咗手呀！」
 
「啱呀！抵撚你死架！」
 
「仆你個臭街呀！」
 
喺要開打之時，阿偉大大叫咗一聲：「夠啦！」
 
阿偉喺我地心目中好有地位，佢咁樣一叫，我同杰少即刻收斂，不過仍對望，彼此眼神充滿仇恨。
 
「哎吔⋯⋯哈哈哈⋯⋯」阿偉無奈咁笑，然後佢叉住腰狂咳。咳到個人冇晒力。阿波即刻上前扶佢坐低。
 
「你兩個真係好冇義氣，咁唔比面細佬我呀？唉⋯⋯哈哈⋯⋯」阿偉低頭笑說，笑出一種無奈。
 
當佢長長地嘆氣後，就抬返頭，深吸一口氣，睇佢表情好似要作出一個好難嘅決定。
 
「我係咪真係咁撚冇用搞唔掂你呢兩位大哥呀？」阿偉望下我又望下杰少，誠懇咁講：「揸個手啫？真係唔得？」
 
「我夠鐘返工！」杰少真係好唔比面，起身想走。
 
阿波即刻上前捉住杰少：「杰少呀！唔好咁啦！我地四個⋯⋯我地四個⋯⋯」阿波哽咽，忍唔住要喊。
 
「杰少、阿波、阿匡⋯⋯」
 
阿偉疑重咁講，疑重到連怒火中燒嘅杰少都覺得唔妥，即刻收起火，回望阿偉。
 
「同你地三個做兄弟，係我呢世仔最開心嘅事。」
 
我未見過阿偉咁疑重、咁認真。
 
「如果呢一世可以重新嚟過的話，我都會揀你地做我最好嘅兄弟。」
 
點解⋯⋯點解阿偉好似講緊⋯⋯？！
 
「去到今日，你地可唔可以為我做一件事？我唔想我走嗰日，我地四個散晒。」
 
杰少冷漠嘅表情閃過一絲吃驚。
 
阿波努力忍耐，但兩眼已經通紅。
 
「阿偉⋯⋯你講咩呀？」我已經心知不妙。
 
.
 
 
 
「對唔住呀。其實呢度四個當中，我先係最冇義氣嗰個。」阿偉笑得好開懷。
 
 
. 


咩⋯⋯咩話！！
 
此時，阿波終於都忍唔住，佢喊得好大聲⋯⋯
 
好大聲。