真人真事改篇﹕師生戀﹕《最接近的陌生距離》: 第四十七章之五
呢把慘叫聲相當嘶啞，個叫聲叫咗一秒都冇就喺空中監生煞停，係一種令人聽到都覺得好痛嘅慘叫。我同兩個紅綠MK未意會到咩事時，就見到蟲蟲好冷靜咁跑過嚟，喺兩條紅綠MK之間攝出，再拖實我隻手狂奔！
「走呀！」蟲蟲叫道。
我未意會到咩事，雙腳好自然跟埋蟲蟲搏命咁跑，只聽到身後跑MK不停粗口橫飛，就知今次大撚鑊！我輕輕回頭一望⋯⋯仆街佢地追緊嚟！
「哇！呢次仆街啦！」我邊跑邊叫。
「啊哈哈哈——！」蟲蟲竟然好反常咁大笑。
「 你傻架？仲笑？」我就嚟被佢激到暈低。
「好好玩呀！」
「痴線！有咩事我要同三個Mk隻揪架！」
「打啦打啦！我要買定炮谷睇呀！哈哈——！」
「講到好似唔關你事咁喎！」
「你慳返啖氣跑仲好啦！！」
我同蟲蟲都唔知發咗咩神經，明知走緊難都仲可以邊笑邊鬥嘴。大佬呀，當街著校服同人隻揪好大劑架，有咩事真係斷送晒呢幾個月嚟嘅努力！但唔知點解，我同佢咁樣拖住手跑，心係好驚好擔心，卻又覺得好刺激好好玩，同埋我覺得好⋯⋯
浪漫？
因為我同蟲蟲十指緊扣緊？
本來碎開嘅心，而家好似慢慢滋長緊甜蜜嘅感覺，令痛楚慢慢消失。
「哈哈⋯⋯」蟲蟲對我嘅天真爛漫咁笑，完全將危險拋諸腦後。呢下笑容總覺得正在觸動緊我。
我同蟲蟲喺商場狂奔，於人群中左穿右插，身後叫囂嘅MK令全個商場都注視緊我地。死啦，啲Mk仲係窮追猛打，點甩都甩唔到添！
此時蟲蟲情急智生，叫咗聲：「過嚟呀！」然後我被佢拉咗入去一間百貨公司入面，再跑去服裝部，匿喺琳瑯滿目嘅貨架之中。
「殊！」蟲蟲帶住我喺貨架前痞低，食指擺喺嘴前輕輕殊咗聲。
然後我聽到急速慌亂嘅腳步聲由遠至近咁埋嚟。
「佢地去咗邊呀？」
「頭先明明見到佢地入咗嚟喎！」
「分頭搵啦！一定要搵到條死妹釘為止！」
然後我聽到啲腳步聲分散咗，由三個唔同方向走埋嚟，或近或遠。我同蟲蟲氣息未順，抖氣聲仲好大，被佢地搵出嚟係遲早嘅事。萬一我地行蹤敗露，後果係不堪設想！
啲腳步聲漸漸走近，如同網羅咁漸漸收起。難道我同蟲蟲只好坐以待斃？
只見蟲蟲靜靜雞隨手咁拎咗兩頂帽，將其中一頂笠落我個頭度。
「嘻嘻—！」蟲蟲邊笑邊戴起cap帽，佢真係仲笑得出！
我唔知佢想搞咩，只知佢拉返我起身時，又隨手拎咗兩件衫。然後慢慢行返出去，探頭左顧右盼。
「安全啦。我地行啦！」佢輕聲咁講，再拖住我行出去。
然而——我左邊面feel一陣危機迫近，好奇一望，果然條金毛MK正喺遠處行緊埋嚟！
「噢！仆街！」我大吃一驚，即刻拉返蟲蟲入嚟，匿返去貨架前面⋯⋯唔止，我地仲損埋落啲衫入面痞低。安全起見，我仲將啲衫遮住我地！
我當刻驚魂未定，好驚頭先被金毛MK發現！但過咗幾秒都冇聽到有人喊打喊殺，我知道頭先條金毛MK發現唔到我地。
「哈哈哈⋯⋯」蟲蟲忍唔住笑，由氣聲慢慢變成笑聲。
「你仲笑？今次比你害死啦！」我用氣聲鬧佢！
「咁真係好好玩呀嘛！」蟲蟲忍住笑講。
「到時我被人圍毆就真係唔慌好玩啦！」
「哈哈⋯⋯抵撚你死！」
「你成日陷害我！」
「我係你剋星呀！」
「剋你個頭！」
「頭你老母！」
「仆你個⋯⋯？！」
兩個腳步或前或後咁迫近！嚇到我唔敢出聲！蟲蟲都知危險即刻掩住嘴，但眼角已經忍笑忍到標眼水。
原來兩條MK已經搜索到我呢條一行貨架，佢地一前一後咁相遇。匿喺啲衫入面嘅我即刻連抖氣都唔敢。
「有冇發現呀？」
「冇呀。屌那星！條八婆頭先真係重手！」
「佢打你呀？」
「佢拆我祠堂呀！」
嘩——呢一下！
「唔——！」到我忍唔到笑！蟲蟲即刻伸手掩住我個嘴。
「嘩！佢咁狠毒！」
「係呀！扮可愛引我埋去，再一個膝撞拆我祠堂呀！」
「哈——！」蟲蟲忍唔住想大笑，我即刻伸手想掩住。點知——
「唔唔⋯⋯！」點知蟲蟲一口咬實我隻手！痴線！佢竟然用呢個方法去分散笑意！
好彩百貨公司本身有背景音樂，加上我地匿喺堆衫入面，我地嘅笑聲同痛叫聲先冇比佢地發現咋！
「再分頭搵！總之一定要刮佢地出嚟！捉到條女我實即場姦撚咗佢！」
「佢咁靚，的佢去做雞化算啲喎⋯⋯」
兩個腳步聲漸漸離去時，蟲蟲帶返我出嚟。發現嘅MK唔喺附近時，蟲蟲就帶住我行去試身室前，佢似乎想匿喺試身室入面，咁應該會安全好多。但係試身室前竟然有兩個人等緊，搞到如意算盤打唔響！
然而眼前情況每一秒都變緊，我危機嘅直覺話我知，我左邊遠處正正有危險迫近！點知我一望過去時，有一個觸目嘅髮色正向我呢邊行嚟！就係嗰條綠毛MK!
「個青頭仔嚟緊啦！」我邊同蟲蟲講，邊緊緊盯住條綠毛MK！ 好彩百貨公司都多人，綠毛MK要喺人群中穿插，仔細咁搜查，一時間察覺唔到我同蟲蟲正正喺試身室前。
此時試身室有三個人走咗出嚟，前面兩個排緊隊嘅人入咗去後，蟲蟲即刻拉住我：「快啲入去啦！」
「得一個位咋！」
「死蠢！你估真係試衫咩！快啲啦！」
喺急忙之時，蟲蟲拉咗我入去試身室。與此同時，我依稀好似聽到綠毛MK已經發現到我地，喺我地身後——
「咪走呀！」綠毛MK大聲叫囂！
我眼角好似瞄到一個身影正在急速跑緊過嚟！！