真人真事改篇﹕師生戀﹕《最接近的陌生距離》: 第四十七章之四
「你頭先好奸囉！」
「咩呀！你都冇話唔可以用腳！」
「我下round要贏返你呀！」
我同蟲蟲行緊去搵打拳皇嘅街機，期間我同佢表達不滿。打拳機竟然用腳？！太奸懶啦！不過又得不佩服蟲蟲原來咁勁，食過夜粥！突然間我覺得有啲壓力，有一種會被蟲蟲打敗嘅威脅。
唔得！我身為一個硬漢！男人中嘅男人！點可以輸比呢個衰妹先得架？！
「呢次到我一定屈你機！」拳皇，強項啦！
「嗯。」蟲蟲好淡定點咗下頭：「好呀！」
我同蟲蟲即刻進入戰鬥狀態，各自埋位開始揀角色。我最熟就係用草薙京、八神、真悟呢啲。而蟲蟲呢，佢只係喺個「？」撳咗下，電腦就隨機幫佢組咗隊——不知火舞、七伽社同蔡寶奇。
我神氣咁望返蟲蟲，點知佢又一面淡淡定定咁，成個氣場同頭先好似，擺明會贏硬我咁。
「Ready——Fight!!!」
開打一刻，我控制草薙京對蟲蟲嘅蔡寶奇連環進攻！
鬼燒、荒咬、毒咬⋯⋯我唔理咩招式！總之打到佢殘！好快蔡寶奇就比我打到殘血！
「被我屈到咁！你真係唔識架喎！」勝利在望，我興奮咁笑！整招無式比佢嘆！完美嘅KO!
錚——！一聲！畫面一白，超必無式！
錚——！蟲蟲同一時間出超必！
但下一秒我就呆晒。冇我期待嘅畫面，我被蟲蟲所控制嘅蔡寶奇反殺！呢一刻的明白，蟲蟲唔係唔識，佢係等到殘血時狂出超必！
我眼白白睇住草薙京由滿血比佢屈死咗！
「喂——！」我吃驚咗叫道。
「下round讓比你啦。」蟲蟲邊轉緊枝珍寶珠邊講，衰妹托住個頭打咗個無聊嘅喊露：「我用蔡寶奇用到悶。想轉角色玩。」
「唔洗！堂堂男人使你讓我？」
「哈哈⋯⋯你話架！」
「Ready——Fight!!!」
第二局開始！
八神衝過去，用我最熟嘅連技轟落去！蟲蟲一直龜縮擋，加上佢血量少，其實頂唔到我幾多下，當夠能量時就一招八稚女收佢皮！
八神叫咗聲，正正係一招琴月陰！點知蔡寶奇一下碌地沙，就碌到八神身後⋯⋯唔使我講都知，我又眼白白睇住滿血嘅八神比蟲蟲慢慢咁吞食！
「嘿！點呀？真係唔使讓呀？」蟲蟲自信咁對我笑，攤開兩手：「我炒硬你架喎。」
正當我想不屑地回應佢時，有一把聲打斷我同蟲蟲嘅對話：「靚女，打得幾好喎。同我鏈返鋪呀？」呢把聲嘅主人行嚟我身邊，擺低咗個一蚊喺我面前。我隨聲一望，原來係個金毛MK仔。佢身後仲有幾個頭髮又紅又綠嘅柒頭，擔住口煙睇怕都唔係咩好人。
蟲蟲當佢地冇到，就話：「最後機會，讓定唔讓？」
「要人讓就咪撚打啦。」我旁邊嘅金毛MK搭嗲。
我都唔理條柒頭，應返蟲蟲：「真男人就算輸都會坦然面對！」
「唉，正柒頭！」蟲蟲搖頭嘆息。
around 3 開始！
真悟！真悟呀！呢次生性啲呀！！冇理由比佢嘅殘血蔡寶奇一直贏到盡架嘛！
荒咬！毒咬！朧車！鬼燒！轟落去呀⋯⋯點知，原來我同真悟一樣，啲招式只係得個「形」，蟲蟲接住嚟嘅技巧話比我知，我原來完全唔識拳皇嘅玩法。
今次蟲蟲唔玩超必，而係玩連技，一招駁一招！我睇佢揸操控桿嘅手就好似拎住高腳酒杯咁，右手每一個手指同肌肉都有自己意識！完全唔洗用個腦去諗點駁招。心諗，佢喺機鋪打滾冇咁上下年資，都唔會有呢啲技巧！
「KO!!」蟲蟲拍手歡呼，對住我笑：「你又輸啦！」
正當我想駁返蟲蟲時，我旁邊條金毛MK即刻攝埋嚟就話：「輸咗就行開啦！」佢再對蟲蟲講：「靚女同我打返鋪先啦！」
蟲蟲直頭當佢透明咁，離開座位繞過個金毛MK就拉走咗我，佢話：「我地去打頭D囉！」
我對佢微微一笑，只感背後涼涼，我回頭瞄一眼，見到頭先嘅金毛MK同佢啲朋友眼神唔多友善，仲慢步跟埋嚟。我即刻同蟲蟲講：「啲MK跟緊上嚟喎！驚唔驚呀？」
蟲蟲回頭望咗一眼後，就一手橋埋嚟，講咗句：「驚咩喎！成日都係咁架啦！」蟲蟲擺個姿態出嚟就係話比啲Mk聽佢有男朋友，叫佢地死開。正所謂做戲做全套，我都配合下同佢親暱起嚟，扮佢嘅男朋友。
「你仲有冇珍寶珠呀？」我見蟲蟲拆緊枝新嘅時候，好奇問下。
「得返士多啤梨味咋。」蟲蟲向我遞咗枝珍寶珠。
「唔要啦！我要可樂味！」
「呢枝？想食呀？」蟲蟲舉起枝剛剛拆開咗嘅珍寶珠笑道：「冇啦！」然後佢輕輕咁舔咗一下。
佢揚起惡作劇嘅笑意，喺我面前輕輕咁轉住枝珍寶珠，明顯笑我唔敢食佢舔過嘅珍寶珠。點知蟲蟲冇諗到我竟然咩都唔理，就一口擔走佢枝可樂味珍寶珠，再一枝箭標走咗。
「喂呀！」蟲蟲驚訝咁叫從後追返上嚟。
「點呀，你又想食呀？」我喺口中拎返枝可樂味珍寶珠，大返佢。
「衰人！我最鍾意食可樂味架！」蟲蟲嬲到鼓起泡腮，好可愛。睇到我⋯⋯咦？我個心跳好似⋯⋯
「咁比返你囉。」我笑說。
蟲蟲輕輕推開我手就話：「唔要呀！我地去打機啦！」此時佢笑返，我同佢去到玩頭文字D嘅街機前面。
正當我同蟲蟲吹水邊個勁啲時，我被從身後而嚟嘅力道拉開咗，然後有兩個不懷好意嘅身影攝咗入嚟。喺我眼前嘅正正係頭先跟緊埋嚟嘅紅毛、綠毛MK。
「冇你嘅事呀！走啦！」綠毛MK率先兇我。
「再唔走打柒你呀！」紅毛MK。
我點會比佢地兇到呀，我比較擔心蟲蟲嘅情況。只見個金毛MK趁機埋去蟲蟲度，雖然我唔係好聽到佢地講咩，但睇條金毛MK嘅身體語言可以知，佢對蟲蟲不懷好意。
我即刻焦急咗叫：「乜料呀你地。嗰個係我女朋友呀！想點呀？」說罷了，我想推開佢地兩個再拉蟲蟲走。點知條綠毛MK搶先我一步大大力咁推開我。
「你話係你條女就係你架喇？」
「我大佬今晚就食硬佢架啦！你識趣就而家快啲走！」
我懶理兩條柒頭喺度串柒柒，佢地夾硬嚟我就預咗同佢地開拖，話之佢咩背景，帶走蟲蟲先講。
點知當我正想開拖之際，蟲蟲方向傳嚟一陣驚呼！！
「哇——！」